ព័ត៌មានជាតិ

លោកអភិបាលខណ្ឌ ៧ មករា សំណូមពរពលរដ្ឋចូលរួមទុកដាក់សំរាម និងគោរពច្បាប់ចរាចរណ៍

បានផុស

១ ខែ មុន

នៅ

ថ្ងៃសុក្រ ២៥ តុលា ២០២៤

ដោយ

លោក ថេង សុថុល អភិបាលខណ្ឌ ៧ មករា បានសំណូមពរដល់ប្រជាពលរដ្ឋទាំងអស់គ្នាចូលរួមទុកដាក់សំរាមឲ្យបានត្រឹមត្រូវ និងគោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ហាសំរាមប្រជាពលរដ្ឋមួយចំនួននៅតែបន្តទុកដាក់ វេចខ្ចប់មិនបានត្រឹមត្រូវ និងបញ្ចេញខុសម៉ោងខុសវេលា ធ្វើឲ្យបាត់បង់សោភណភាព បរិស្ថានអនាម័យ តាមដងផ្លូវ ជាពិសេសជះក្លិនឆ្អេះឆ្អាបដល់អ្នកជិតខាងផងដែរ។ ដោយឡែក បញ្ហាគ្រោះថ្នាក់ចរាចរណ៍ដូចគ្នាផងដែរកើតឡើងហូរហែបង្កគ្រោះថ្នាក់ដល់មនុស្សរងរបួស និងឈានដល់បាត់បង់អាយុជីវិត ដោយសារតែកត្តាមនុស្សភាគច្រើនមិនចូលរួមគោរពច្បាប់ចរាចរណ៍ឲ្យបានត្រឹមត្រូវ។

លោក ថេង សុថុល អភិបាលខណ្ឌ ៧ មករា និងជាប្រធានកិត្តិយសអនុសាខាកាកបាទក្រហមខណ្ឌ បានលើកឡើងពីបញ្ហាការទុកដាក់សំរាម និងការគោរពច្បាប់ចរាចរណ៍នេះ កាលព្រឹកថ្ងៃទី ២៤ ខែតុលា ឆ្នាំ ២០២៤ ក្នុងពិធីចុះចែកអំណោយមនុស្សធម៌របស់កាកបាទក្រហមកម្ពុជា។

លោកអភិបាលខណ្ឌ ក៏បានសំណូមពរដល់ប្រជាពលរដ្ឋចូលរួមទុកដាក់សំរាមឲ្យបានត្រឹមត្រូវទាំងអស់គ្នា មិនត្រូវនាំគ្នាស្អប់សំរាមនោះទេ ព្រោះយើងទាំងអស់គ្នាជាអ្នកបញ្ចេញសំរាម។ ទន្ទឹមនេះ លោកបានសំណូមពរដល់ប្រជាពលរដ្ឋ សូមនាំគ្នាគោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់ចរាចរណ៍ ព្រោះបច្ចុប្បន្នករណីគ្រោះថ្នាក់ចរាចរណ៍នៅតែបញ្ហាប្រឈម និងធ្វើឲ្យបាត់បង់ជីវិតមនុស្សជារៀងរាល់ថ្ងៃ។ លោកអភិបាលសង្កត់ធ្ងន់ថា ទង្វើទាំងនេះគឺជាការចូលរួមចំណែកជាមួយសង្គម និងរាជរដ្ឋាភិបាល។

សូមបញ្ជាក់ថា នៅតាមមូលដ្ឋាន សួនច្បារ និងតាមដងផ្លូវសាធារណៈ មន្ត្រីអាជ្ញាធរ សហការជាមួយក្រុមប្រមូលសំរាម ក៏បានពង្រាយធុងសំរាមសម្រាប់ឲ្យប្រជាពលរដ្ឋទុកដាក់ផងដែរ។ បញ្ហាសំរាម និងករណីគ្រោះថ្នាក់ចរាចរណ៍ អាជ្ញាធរជំនាញពាក់ព័ន្ធ ក៏តែងតែផ្សព្វផ្សាយជាសាធារណៈដល់ប្រជាពលរដ្ឋគ្រប់លំដាប់ថ្នាក់ ឲ្យចូលរួមជាមួយអាជ្ញាធរ ដើម្បីទីក្រុងស្អាត បរិស្ថានអនាម័យល្អ៕

អត្ថបទ ៖ សុភា