ព័ត៌មានជាតិ

៩ ខែ នេះ ទេសចរបរទេសមកកម្សាន្តខេត្តព្រះសីហនុមានជាង ២៣ ម៉ឺននាក់ កើនឡើងធៀបឆ្នាំ ២០២៣

បានផុស

២ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

បើតាមមន្រ្តីសាលាខេត្តព្រះសីហនុបានឲ្យកម្ពុជាថ្មីដឹងថា ក្នុងរយៈពេល ៩ ខែឆ្នាំ ២០២៤ ខេត្តព្រះសីហនុទទួលបានភ្ញៀវទេសចរបរទេសមកកម្សាន្តមានចំនួន ២៣៩ ០៦០ នាក់។

លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា បើធៀបរយៈពេលដូចគ្នាឆ្នាំ ២០២៣ ភ្ញៀវទេសចរបរទេសដែលបានមកដើរកម្សាន្តក្នុងខេត្តព្រះសីហនុមានការកើនឡើង ០,២៤% ធៀបនឹង ០៩ ខែ ឆ្នាំ២០២៣ ដែលមាន ២៣៨ ៤៧៦ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្រ្តីរដ្ឋបាលខេត្តព្រះសីហនុ ខណៈទេសចរបរទេសមានការកើនឡើង យ៉ាងណាមិញភ្ញៀវទេសចរក្នុងស្រុកមានការថយចុះ។

លោក ឡុង ឌីម៉ង់ បានគូសបញ្ជាក់ថា ក្នុងរយៈពេល ៩ ខែឆ្នាំ ២០២៤ ភ្ញៀវទេសចរក្នុងស្រុកមកកម្សាន្តក្នុងខេត្តព្រះសីហនុ មានចំនួន ៣ ២៥៤ ០៧៧ នាក់ ថយចុះ ១៥,៧០% បើធៀបរយៈពេលដូចគ្នាឆ្នាំ២០២៣ ដែលមានចំនួន ៣ ៨៥៩ ៩២៥ នាក់។

កាលពីថ្ងៃទី ២៥ ខែតុលា ឆ្នាំ២០២៤ មានភ្ញៀវទេសចរចម្រុះជាតិសាសន៍មកតំបន់ពីអឺរុបខាងកើតប្រមាណ ៣០០ នាក់ បានចូលតាមច្រកអាកាសយានដ្ឋានអន្តរជាតិក្រុងព្រះសីហនុ ដើម្បីមកដើរទេសចរនៅខេត្តព្រះសីហនុ។ ជើងហោះហើរពិសេសបានដឹកនាំយកភ្ញៀវទេសចរចំនួន ២៧៧ នាក់ ដែលជាភ្ញៀវទេសចរចម្រុះជាតិសាសន៍ មានជនជាតិរុស្ស៊ី និងកាហ្សាក់ស្ថាន មកខេត្តព្រះសីហនុ។

លោក ឡុង ឌីម៉ង់ បានគូសបញ្ចាក់ថា នេះសឹងតែជាលើកទី ១ ក្រោយពីមានការរាតត្បាតដោយជំងឺកូវីដ-១៩ ដែលភ្ញៀវទេសចរបរទេសមកជាក្រុមធំៗតាមច្រកអាកាសយានដ្ឋានខេត្តព្រះសីហនុ មកដើរទេសចរក្នុងខេត្តព្រះសីហនុដោយមានការទទួលស្វាគមន៍យ៉ាងរាក់ទាក់ពីអាជ្ញាធរខេត្ត ជាមួយការយកចិត្តទុកដាក់ការពារសន្តិសុខជូនភ្ញៀវផងដែរ។

ខណៈដែលខេត្តព្រះសីហនុមានភាពទាក់ទាញដោយសារជាតំបន់ឆ្នេរ មានកោះជាច្រើនជាគោលដៅទេសចរណ៍ បើតាមលោក ឡុង ឌីម៉ង់ នៅអំឡុងចុងខែតុលា និងដើមខែវិច្ឆិកា ក៏នឹងមានជើងហោះហើរពិសេសៗជាច្រើនទៀតដឹកភ្ញៀវទេសចរបរទេសជាក្រុមធំៗមកទស្សនាខេត្តព្រះសីហនុ ដែលពួកគេនឹងស្នាក់នៅក្នុងខេត្តព្រះសីហនុពី ៥ ទៅ ១ សប្តាហ៍ និងមានមួយចំនួននឹងបន្តទៅដើរកម្សាន្តនៅខេត្តសៀមរាប៕