ព័ត៌មានជាតិ

ប.ស.ស បង្ហាញពីអត្ថប្រយោជន៍ការចូលរួមរបបសន្តិសុខសង្គមផ្នែកថែទាំសុខភាព ដោយស្ម័គ្រចិត្ត ដល់អង្គការសង្គមស៊ីវិល

បានផុស

១ ម៉ោង មុន

នៅ

ថ្ងៃចន្ទ ២៨ តុលា ២០២៤

ដោយ

កាលពីព្រឹកថ្ងៃទី ២៨ ខែតុលា ឆ្នាំ ២០២៤ នេះ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម នៃ ប.ស.ស បានអញ្ជើញធ្វើបទបង្ហាញចែករំលែកអំពីអត្ថប្រយោជន៍ នៃការចូលរួមរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តជូនដល់តំណាងអង្គការសង្គមស៊ីវិលជាច្រើនស្ថាប័ន ក្នុងវេទិកាសន្ទនាសម្ព័ន្ធសង្គមស៊ីវិល ក្រោមអធិបតីភាព លោក កឹមរ័ត្ន វិសិដ្ឋ រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានមានប្រសាសន៍ថា វេទិកាសម្ព័ន្ធសង្គមស៊ីវិល ព្រឹកមិញនេះ ជាវេទិកាសន្ទនាក្រោមប្រធានបទស្ដីពី«ការឈ្វេងយល់ពីតួនាទីអង្គការសង្គមស៊ីវិលក្នុងក្របខ័ណ្ឌយុទ្ធសាស្ត្របញ្ចកោណដំណាក់កាលទី ១» ដើម្បីបើកឱកាសឱ្យមានការពិភាក្សាយ៉ាងផុសផុល និងមានការចូលរួមយ៉ាងសកម្មពីសំណាក់អង្គការសង្គមស៊ីវិលក្នុងការបង្ហាញការពេញចិត្តនូវការផ្ដល់សេវាសាធារណៈនានារបស់រាជរដ្ឋាភិបាល ក៏ដូចជាផ្ដល់មតិដើម្បីកែលម្អបន្ថែម។

ជាមួយគ្នានោះដែរ អង្គការសង្គមស៊ីវិល អាចទទួលបាននូវពុទ្ធិថ្មីៗ និងអាចចែករំលែកបទពិសោធគ្នាទៅវិញទៅមកក្នុងការរួមគ្នាកសាង និងអភិវឌ្ឍន៍សង្គម សេដ្ឋកិច្ចកម្ពុជា។

សូមបញ្ជាក់ថា វេទិកានេះមានការអញ្ជើញចូលរួមពីថ្នាក់ដឹកនាំ នៃគណៈអភិបាលរាជធានីភ្នំពេញ ថ្នាក់ដឹកនាំ នៃរដ្ឋបាលខណ្ឌទាំង ១៤ ក្នុងរាជធានីភ្នំពេញ និងតំណាងអង្គការសង្គមស៊ីវិលសរុបប្រមាណជា ៣០០ នាក់ នៅសាលប្រជុំខេមរវិទូ នៃរាជបណ្ឌិត្យសភាកម្ពុជា៕

អត្ថបទ ៖ សំអឿន