ព័ត៌មានជាតិ

ប.ស.ស ប្រគល់បណ្ណសមាជិកជាង ៣០០ ជូនក្រុមប្រឹក្សាស្រុក-ឃុំ រដ្ឋបាលស្រុកកំពង់ត្រឡាច

បានផុស

៣ សប្តាហ៍ មុន

នៅ

ថ្ងៃអង្គារ ២៩ តុលា ២០២៤

ដោយ

បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំពិធីប្រគល់បណ្ណសមាជិក ប.ស.ស និងផ្សព្វផ្សាយអត្ថប្រយោជន៍ នៃការប្រើប្រាស់ប័ណ្ណ ប.ស.ស ជូនដល់ក្រុមប្រឹក្សាស្រុក-ឃុំ-ប្រធានការិយាល័យប្រជាពលរដ្ឋ មេភូមិ អនុប្រធានភូមិ និងសមាជិកភូមិ នៃរដ្ឋបាលស្រុកកំពង់ត្រឡាច ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះបានប្រព្រឹត្តិទៅកាលពីថ្ងៃទី ២៨ ខែតុលា ឆ្នាំ ២០២៤ នៅរដ្ឋបាលស្រុកកំពង់ត្រឡាច នៃខេត្តកំពង់ឆ្នាំង ក្រោមអធិបតីភាព លោក ស៊ឹម ប៊ុនធឿន ប្រធានសាខា ប.ស.ស ខេត្តកំពង់ឆ្នាំង និងលោក វន ស៊ីផា អភិបាល នៃគណៈអភិបាលស្រុកកំពង់ត្រឡាច ដោយមានអ្នកចូលរួមចំនួន ២៦៥ នាក់ ព្រមទាំងបានប្រគល់បណ្ណសមាជិក ប.ស.ស ចំនួន ៣២៨ ប័ណ្ណ ផងដែរ។

នៅក្នុងពិធីនោះដែរ លោក ស៊ឹម ប៊ុនធឿន បានធ្វើការពន្យល់អំពីរបបសន្តិសុខសង្គមផ្នែកហានិភ័យការងារ ផ្នែកថែទាំសុខភាព និងនីតិវិធី នៃការចូលប្រើប្រាស់សេវានៅតាមមូលដ្ឋានសុខាភិបាលជាដៃគូ ប.ស.ស ព្រមទាំងអត្ថប្រយោជន៍ផ្សេងៗ ជាច្រើនទៀត ដែល ប.ស.ស. ផ្ដល់ជូន។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គិតត្រឹមដើមខែតុលា ឆ្នាំ ២០២៤ បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានទទួលសមាជិករបស់ខ្លួនកើនឡើងដល់ ២ ៥៤៣ ៨៧០ នាក់ ស្រី ១ ៤១៣ ០១១ នាក់។

ក្នុងចំណោមសមាជិកសរុបជាង ២ លាន ៥ សែននាក់នេះ ក្នុងនោះបុគ្គលស្ថិតក្នុងវិស័យសាធារណៈចំនួន ៤៨២ ៥៧៧ នាក់ បុគ្គលក្រោមបទប្បញ្ញត្តិច្បាប់ស្ដីពីការងារចំនួន ១ ៥៨១ ៩៨៨ នាក់,បុគ្គលស្វ័យនិយោជន៍ចំនួន ៣៦២ ៣៥៥ នាក់, និងអ្នកក្នុងបន្ទុកសមាជិក ប.ស.ស ចំនួន១១៦ ៩៥០ នាក់ដែល ទាំងនេះបង្ហាញថា ប្រជាពលរដ្ឋកាន់តែជឿទុកចិត្ត និងយល់ដឹងច្បាស់ពីអត្ថប្រយោជន៍ នៃបេឡាជាតិសន្តិសុខសង្គម (ប.ស.ស)៕

អត្ថបទ ៖ សំអឿន