មន្ត្រីជំនាញថ្នាក់ជាតិ ត្រៀមជួយសង្គ្រោះរួចរាល់ ករណីមានគ្រោះធម្មជាតិធ្ងន់ធ្ងរណាមួយកើតឡើង ខណៈកម្ពុជារងឥទ្ធិពលព្យុះចំនួន ០២

កម្ពុជា កំពុង​ទទួល​រង​ឥទ្ធិពល​ខ្យល់ព្យុះ​ចំនួន ០២ មន្ត្រី​ជំនាញ​ថ្នាក់​ជាតិ នៃ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​ត្រៀម​ការ​ជួយ​សង្គ្រោះ​រួចរាល់ ក្នុង​ករណី​ប្រសិន​បើ​កើត​មាន​គ្រោះ​ធម្មជាតិ​ធ្ងន់ធ្ងរ​នៅ​ក្នុង​ប្រទេស។

លោក សុទ្ធ គឹមកុលមុនី អ្នកនាំពាក្យ នៃ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​ប្រាប់​ឱ្យ​ដឹង​ថា គិត​ត្រឹម​ថ្ងៃ​ទី ២៩ ខែ​តុលា ឆ្នាំ ២០២៤ នេះ ឥទ្ធិពល​ព្យុះ​ចំនួន ០២ គឺ ព្យុះ​ទី ២០ ឈ្មោះ ត្រា​មី និង​ព្យុះ​ទី ២១ ឈ្មោះ កង​រី ដែល​បាន​សាយភាយ​មក​លើ​ប្រទេស​កម្ពុជា​នោះ មិន​ទាន់​មាន​ជា​សញ្ញាណ​គ្រោះធម្មជាតិ​ធ្ងន់ធ្ងរ បង្ក​ជា​ផល​ប៉ះពាល់​ណាមួយ​ដល់​ប្រជាជន និង​ប្រទេស​ជាតិ​នៅ​ឡើយ​នោះ​ទេ។

លោក​បាន​បន្ត​ថា គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​ផ្សព្វផ្សាយ​ទៅ​ដល់​កងកម្លាំង​ជំនាញ និង​អាជ្ញាធរ​នៅ​ថ្នាក់​រដ្ឋបាល​ក្រោម​ជាតិ​ទាំងអស់ ឱ្យ​ត្រៀម​លក្ខណៈ​របស់​ខ្លួន​ជាស្រេច ១០០ ភាគរយ រង់ចាំ​ជួយ​អន្តរាគមន៍​ឱ្យ​បាន​ទាន់​ពេល ក្នុង​ករណី​ប្រសិនបើ​មាន​គ្រោះធម្មជាតិ ទោះបី​បច្ចុប្បន្ន​មិន​ទាន់​មាន​សញ្ញាណ​គំរាមកំហែង​ណាមួយ​ពី​គ្រោះធម្មជាតិ​ក៏ដោយ។

សូម​បញ្ជាក់​ផង​ដែរ​ថា ឥទ្ធិពល នៃ​ព្យុះ​ទាំង ០២ នេះ មាន​រយៈពេល ០៣ ថ្ងៃ គិត​ចាប់ពី​ថ្ងៃ​ទី ២៨ ដល់​ថ្ងៃ​ទី ៣០ ខែ​តុលា ឆ្នាំ ២០២៤ ដោយ​នឹង​បង្ក​ឱ្យ​មាន​ជា​ភ្លៀង​ធ្លាក់​លាយឡំ​ជាមួយ​ផ្គរ រន្ទះ និង​ខ្យល់​កន្ត្រាក់ នៅ​តាម​តំបន់​វាលទំនាប , ខ្ពង់រាប និង​តំបន់​មាត់សមុទ្រ។

គួរ​បញ្ជាក់​ថា យោង​តាម​ព្រឹត្តិបត្រ​ព័ត៌មាន​របស់​ក្រសួង​ធនធាន​ទឹក និង​ឧតុនិយម បាន​ឱ្យ​ដឹង​ថា ព្យុះ​ទី ២០ ឈ្មោះ​ត្រា​មី និង​ព្យុះ​ទី ២១ ឈ្មោះ​កង​រី នៅ​មាន​ឥទ្ធិពល​ខ្លាំង​លើ​របប​ខ្យល់មូសុង​ឦសាន ខណៈ​សម្ពាធ​ទាប​គ្របដណ្ដប់​លើ​សមុទ្រ​ចិន​ខាងត្បូង ឈូង​សមុទ្រ​ថៃ និង​គ្របដណ្ដប់​លើ​ភាគ​ខាងក្រោម នៃ​អាង​ទន្លេ​មេគង្គ និង​លើ​ព្រះរាជាណាចក្រ​កម្ពុជា៕

អត្ថបទ ៖ សុភា