អគ្គមេបញ្ជាការ រម្លឹកកងទ័ពឱ្យប្រុងប្រយ័ត្នកម្លាំងអមិត្តដែលចង់បំផ្លាញសុខសន្តិភាព

អគ្គមេបញ្ជាការទ័ព​ បានក្រើនរម្លឹកដល់បណ្ដាអង្គភាពកងទ័ពឱ្យប្រុងប្រយ័ត្នចំពោះកម្លាំងអមិត្តដែលតែងចិញ្ចឹមចិត្តចង់បំផ្លាញសុខសន្តិភាព ក្រោមរូបភាពញុះញង់ឱ្យសកម្មភាពបះបោរខុសច្បាប់ផ្សេងៗនៅក្នុងសង្គម។

លោកនាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានផ្តាំផ្ញើដល់មេបញ្ជាការទ័ពទាំងអស់ឱ្យយកចិត្តទុកដាក់ពីការគ្រប់គ្រងកម្លាំង ហើយជាពិសេស គឺការប្រុងប្រយ័ត្នចំពោះកម្លាំងអមិត្តដែលប្រើប្រាស់រូបភាពបដិវត្តន៍ពណ៌ និងកលល្បិច ប៉ុនប៉ងផ្តួលរំលំករាជរដ្ឋាភិបាល បំផ្លាញសុខសន្តិភាព ស្ថិរភាពសង្គម។

លោកអគ្គមេបញ្ជាការ លើកឡើងបែបនេះ ក្នុងឱកាសដែលលោកអញ្ជើញជួនសំណេះសំណាល និងនាំយកអាវរងារជាអំណោយរបស់សម្តេចតេជោ ហ៊ុន សែនប្រធានព្រឹទ្ធសភា និងប្រមុខរាជរដ្ឋាភិបាល​ សម្តេចធិបតី ហ៊ុន ម៉ាណែត ផ្តល់ដល់កងកម្លាំងប្រដាប់អាវុធឈរជើងការពារបូរណភាពទឹកដី ទិសទី១ ខេត្តព្រះវិហារ ដែលពិធីនេះបានធ្វើនៅទីបញ្ជាការកងពលតូចអន្តរាគមន៍លេខ៨ នារសៀលថ្ងៃទី៣០ ខែតុលា ឆ្នាំ២០២៤។

នាយឧត្តមសេនីយ៍ វង្ស ពិសេន បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងប្រកបដោយឆន្ទៈមោះមុត និងស្មារតីទទួលខុសត្រូវរបស់ថ្នាក់ដឹកនាំ នាយទាហាន នាយទាហានរង និងពលទាហាន ក៏ដូចជាកងកម្លាំងប្រដាប់អាវុធផ្សេងទៀត នៅក្នុងភារកិច្ចការពារបូរណភាពទឹកដី និងដំណើរការ កសាង ពង្រឹងអង្គភាព ដោយទទួលបានស្នាដៃ និងសមិទ្ធផលគួរឱ្យកត់សម្គាល់។

នាយឧត្តមសេនីយ៍ អគ្គមេបញ្ជាការ បានគូសបញ្ជាក់ពីសភាពការណ៍ជាតិ អន្តរជាតិ សំខាន់ៗដែលកើតមានក្នុងពេលបច្ចុប្បន្ន និងថាមពលដឹកនាំរបស់រាជរដ្ឋាភិបាល អាណត្តិទី៧ ដែលមានសម្តេចធិបតី ហ៊ុន ម៉ាណែត ជាប្រមុខ បន្តថែរក្សាសុខសន្តិភាព ឯករាជ្យជាតិ បូរណភាពទឹកដី ពុះពាររាល់កិច្ចការដែលសេសសល់ពីរាជរដ្ឋាភិបាលអាណត្តិមុន និងស្វែងរកបច្ចេកវិទ្យាថ្មីៗ ដើម្បីប្រកួតប្រជែងនឹងបណ្តាប្រទេសលើសកលលោក។

អគ្គមេបញ្ជាការកងទ័ព ក៏បានបន្តណែនាំផងដែរដល់កម្លាំងទ័ពឱ្យចូលរួមកិច្ចសហការជាមួយអាជ្ញាធរមានសមត្ថកិច្ច ក៏ដូចជាស្ថាប័នពាក់ព័ន្ធទប់ស្កាត់ បង្ក្រាបរាល់បទល្មើសនានា ជាអាទិ៍ ការជួញដូរ ប្រើប្រាស់គ្រឿងញៀន និងការជួញដូរមនុស្ស ជាដើម៕