សមត្ថកិច្ច លម្អិតករណីវៀតណាមជាប់ឃុំម្នាក់ រត់ចេញពីពន្ធនាគារស្វាយរៀង ពេលមន្ត្រីយាមកាមធ្វេសប្រហែស

អ្នកទោសជនជាតិវៀតណាមម្នាក់ ដែលជាប់ឃុំនៅពន្ធនាគារខេត្តស្វាយរៀង បានរត់គេចចេញពីពន្ធនាគារកាលពីវេលាម៉ោង ១៦:៤០នាទីរសៀលថ្ងៃទី២៨ ខែតុលា ឆ្នាំ២០២៤។ ករណីនេះ ត្រូវបានផ្សព្វផ្សាយពាសពេញបណ្ដាញសង្គម នាប៉ុន្មានថ្ងៃចុងក្រោយនេះ។

ក្រោយកើតមានករណីនេះ អគ្គនាយកដ្ឋានពន្ធនាគារ បានចាត់តាំងក្រុម ការងារជំនាញចុះធ្វើការស្រាវជ្រាវជាបន្ទាន់។ តាមរយៈសេចក្ដីបំភ្លឺចេញនៅថ្ងៃទី៣១ ខែតុលា នេះ  អគ្គនាយកដ្ឋានពន្ធនាគារ អះអាងថា ឆ្លងតាមការពិនិត្យ គឺឃើញថា ខ្លឹមសារមួយចំនួនដែលបានចុះផ្សាយលើបណ្តាញសារព័ត៌មានមិនបានឆ្លុះបញ្ចាំងនូវការពិតទាំងស្រុង អំពីហេតុការណ៍ជាក់ស្តែងក្នុងអំឡុងពេលកើតហេតុនោះឡើយ។

តាមសេចក្ដីបំភ្លឺអគ្គនាយកដ្ឋានពន្ធនាគារទទួលស្គាល់ថា ពិតជាមានហេតុការណ៍ជនជាប់ឃុំជនជាតិវៀតណាម ម្នាក់ ឈ្មោះ ង្វៀង តុងហ្វីង (NGUYEN TRONG NGUYEN) ភេទប្រុស បានរត់គេចចេញពីពន្ធនាគារខេត្ត ស្វាយរៀងកាលពីរសៀលថ្ងៃទី២៨ ខែតុលា ឆ្នាំ២០២៤ ពិតប្រាកដមែន។

តាមអគ្គនាយកដ្ឋានពន្ធនាការ ការរត់គេចខ្លួនរបស់ជនជាប់ឃុំជនជាតិវៀតណាមខាងលើ មិនមែនជាសកម្មភាពចូលរំដោះ អ្នកទោសចេញពីក្នុងពន្ធនាគារ ឬសកម្មភាពប្រដាប់អាវុធរំដោះអ្នកទោសនោះទេ។

អគ្គនាយកដ្ឋានពន្ធនាគារបានឱ្យដឹងថា ជនជាប់ឃុំជនជាតិវៀតណាម ឈ្មោះ ង្វៀង តុងហ្វីង បានធ្វើ សកម្មភាពរត់គេចខ្លួនក្នុងអំឡុងពេលទទួលបានការអនុញ្ញាតឱ្យជួបគ្រួសារមកសួរសុខទុក្ខ ហើយឆ្លៀតពេល ដែលមន្ត្រីយាមកាមមានការធ្វេសប្រហែសមិនបានចាក់សោរសុវត្ថិភាព ជនជាប់ឃុំរូបនេះក៏រត់ចេញពីបន្ទប់ សំដៅទៅគូកនដែលបានរង់ចាំជាស្រេច និងបានយកអាវុធខ្លីពីគូកនតម្រង់គំរាមទៅមន្ត្រីដែលដេញតាមពី ក្រោយ រួចហើយឡើងជិះម៉ូតូដែលត្រៀមរង់ចាំនៅរបងកំផែងខាងក្រៅជិះគេចខ្លួនបាត់ទៅ។

សេចក្ដីបំភ្លឺ បានឱ្យដឹងទៀតថា អគ្គនាយកដ្ឋានពន្ធនាគារ និងសមត្ថកិច្ចពាក់ព័ន្ធបាននឹងកំពុងតាមស្វែងរកចាប់ជនជាប់ឃុំ ឈ្មោះ ង្វៀង តុងហ្វីង មកវិញ រួមទាំងគូកន ដើម្បីយកមកផ្តន្ទាទោសតាមច្បាប់។

តាមរយៈការបំភ្លឺអគ្គនាយកដ្ឋានពន្ធនាគារ អំពាវនាវដល់សារព័ត៌មាន គួរផ្សព្វផ្សាយអំពីករណីនេះដោយផ្អែកលើមូលដ្ឋាន ប្រភពច្បាស់លាស់ និងដោយសុភវិនិច្ឆ័យ ចៀសវាងការធ្វើអត្ថាធិប្បាយខុសពីការពិតនាំឱ្យមានការភ័ន្តច្រឡំ ប៉ះពាល់ដល់កិត្តិយស និងសេចក្តីថ្លៃថ្នូរ៕

ដោយ៖ ង៉ិល ណារ៉ាត់