ផ្លូវលំថ្មីមួយខ្សែ នឹងលេចរូបរាងឡើង​ នៅឃុំកាចូន ស្រុកវើនសៃ

ផ្លូវលំក្រាលក្រួសក្រហមមួយខ្សែ ប្រវែងប្រមាណ ៨គីឡូម៉ែត្រ នៅភូមិកាចូនក្រោម ឃុំកាចូន ស្រុកវើនសៃ ខេត្តរតនគិរី នឹងត្រូវសាងសង់រួចរាល់នាដំណាច់ឆ្នាំ២០២៤ នេះ ដោយចំណាយថវិកាប្រមាណ ១,៨៦លានរៀល។

លោក អុំ មាន សមាជិកក្រុមប្រឹក្សាឃុំកាចូន បានឲ្យដឹងថា ផ្លូវលំនេះ សម្រេចការកសាងបាន ២០% ហើយ។ ការកសាងមានសភាពយឺតយ៉ាវ ដោយសាររដូវវស្សា មានភ្លៀងខ្លាំង និងកន្លែងខ្លះទៀត ដីជ្រាយ ឬ ផ្លូវកាច់កុង ច្រើន។

លោកស្រី អាន ណាវី ដែលជាពលរដ្ឋរស់នៅភូមិកាចូនក្រោម បានបង្ហាញសប្បាយរីករាយ នៅពេលអាជ្ញាធរសម្រេចសាងសង់ផ្លូវនេះឡើង។ លោកស្រីបញ្ជាក់ថា កាលពីដើមឡើយ ប្រជាពលរដ្ឋមានការលំបាកយ៉ាងខ្លាំង ក្នុងការធ្វើដំណើរទៅកាន់ស្រែចម្ការ ប្រកបរបរចិញ្ចឹមជីវិតផ្សេងៗ ឬដឹកជញ្ជូនកសិផលទៅកាន់ទីផ្សារ។

លោក អុំ មាន បានបញ្ជាក់ថា តាមការគ្រោងទុក ផ្លូវលំថ្មីដែលមានទទឹង ៦ម៉ែត្រនេះ នឹងរួចរាល់ នៅដំណាច់ឆ្នាំ២០២៤៕

អត្ថបទ៖ ខៀវ ចាប