ព័ត៌មានជាតិ

លម្អិតបន្ថែមផ្លូវក្រវាត់ព្រំដែនប្រវែង ២៥០ គីឡូម៉ែត្រ ទើបបើកការដ្ឋានសាងសង់ នៅខេត្តរតនគិរី និងមណ្ឌលគីរី

បានផុស

២ ម៉ោង មុន

នៅ

ថ្ងៃសៅរ៍ ២ វិច្ឆិកា ២០២៤

ដោយ

ផ្លូវក្រវាត់ព្រំដែនប្រវែង ២៥០ គីឡូម៉ែត្របានផ្តើមបើកការដ្ឋានសាងសង់នៅខេត្តគោលដៅចំនួនពីរគឺខេត្តរតនគិរីនិងមណ្ឌលគិរី ខណៈគ្រឿងចក្រក៏បានចល័តទៅដល់គោលដៅការដ្ឋាន។

ថវិកាមូលនិធិប្រមាណ ២៧ លានដុល្លារ ទទួលបានពីការចូលរួមបរិច្ចាគពីពលរដ្ឋគ្រប់មជ្ឍដ្ឋានទាំងក្នុងស្រុកនិងក្រៅស្រុក ដើម្បីរួមចំណែកជាមួយរាជរដ្ឋាភិបាល ក្នុងកសាងផ្លូវក្រវាត់ព្រំដែនដោយឈរលើបុព្វហេតុរួមគ្នាកសាង និងការពារមាតុភូមិ។ ការប្រើប្រាស់ថវិកាមូលនិធិ សម្រាប់កសាងផ្លូវក្រវាត់ព្រំដែនដែលមានប្រវែងសរុប ២៥០ គ.ម ក្នុងនោះគិតទាំងការងារមួយចំនួន ដែលពាក់ព័ន្ធនឹងការដ្ឋានសាងសង់មានដូចជា៖ ការងារបោសសម្អាតមីន-យុទ្ធភណ្ឌមិនទាន់ផ្ទុះ និងសំណង់សិល្បការ្យផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរការកសាងផ្លូវក្រវាត់ព្រំដែនដែលផ្តោតលើខេត្តគោលដៅចំនួនពីរនៅភាគឦសានគឺខេត្តរតនគិរី និងខេត្តមណ្ឌលគីរី មានប្រវែងសរុប ២៥០ គីឡូម៉ែត្រ ក្នុងនោះក្នុងភូមិសាស្រ្តខេត្តមណ្ឌលគិរី មានប្រវែង ១៤៧,៥២ គ.ម និងខេត្តរតនគិរី ប្រវែង ១០២.៤៨ គ.ម។

លម្អិតបន្ថែមពីបច្ចេកទេសសាងសង់នៅកំណាត់ក្នុងខេត្តមណ្ឌលគិរី និងខេត្តរតនគិរី៖

ខេត្តមណ្ឌលគិរី

>ខ្សែផ្លូវសរុបប្រវែងប្រមាណ ១៤៧, ៥២ គ.ម
+ ផ្លូវតភ្ជាប់មានចំនួន ៣ ខ្សែ ប្រវែងសរុប ៤៩ គ.ម (ចាប់ពីផ្លូវជាតិលេខ ៧៦-៤ ដល់ បង្គោល ៦០/១(១) ប្រវែង ៧ គ.ម, ចាប់ពីផ្លូវជាតិលេខ ៧៦-៤ ដល់ចន្លោះបង្គោល ៥០/១(១) និង ៥០/២(១) ប្រវែង ២៧ គ.ម និងបំបែកពីផ្លូវតភ្ជាប់ដល់បង្គោល ៥៥/៨ ប្រវែង ១៥ គ.ម)
+ផ្លូវខ្សែក្រវាត់ទី១ មាន ២ កំណាត់ ប្រវែង សរុប ៩៨,៥២ គ.ម (ចាប់ពីបង្គោល ៦០/២៦(១) ដល់ ៦០/១(១) ប្រវែង ៤៨.៥២ គ.ម និងចាប់ពីបង្គោល ៥៥/៨ – ៤៩/៥ ប្រវែង ៥០ គ.ម)
>បោសសម្អាតមីនលើផ្ទៃដីសរុប ទំហំ ៣.៦៨៨.០០០ ម២
>មានសំណង់សិល្បការ្យសរុបចំនួន ២៧០ កន្លែង (ស្ពានបេតុង ចំនួន ១៣ កន្លែង ស្មើនឹង ៤០២ម. លូប្រអប់ចំនួន ៣១ កន្លែង ស្មើនឹង ២៤៦ម លូមូល ៣ ប្រភេទ ចំនួន ៣៦៩កន្លែង និងផ្លូវបង្ហូរ ១ កន្លែង ស្មើនឹង ៣៦ម.)

ខេត្តរតនគិរី

> មានខ្សែផ្លូវសរុបប្រវែងប្រមាណ ១០២,៤៨ គ.ម. (បំបែកផ្លូវខ្សែក្រវាត់ទី២ ស្រុកអណ្តូងមាស ដល់បង្គោលលេខ ១៩ ប្រវែង ៥ គ.ម. និងផ្លូវខ្សែក្រវាត់ទី១ ពីបង្គោលលេខ ១៣/១ ដល់ បង្គោលលេខ ០ ចំណុចប្រសព្វបីប្រទេសស្រុក អណ្តូងមាស និង ស្រុកតាវែង ប្រវែង ៩៧,៤៨ គ.ម.)
> បោសសម្អាតមីន-យុទ្ធភណ្ឌមិនទាន់ផ្ទុះ មានផ្ទៃដីទំហំសរុប ២.៥៦២.០០០ ម២
> មានសំណង់សិល្បការសរុបចំនួន ១៥២ កន្លែង (ស្ពានបេតុង ចំនួន ១០ កន្លែង ស្មើនឹង ១៦៥ ម. លូប្រអប់ ចំនួន ១៦ កន្លែង ស្មើនឹង ១២៣ ម. លូមូល៣ប្រភេទ ចំនួន ១២៥ កន្លែង និងថ្នល់បង្ហៀរ ០១ កន្លែង ស្មើនឹង ៣៦ ម.)

បទដ្ឋាន និងលក្ខណៈបច្ចេកទេសសាងសង់

– ឈូសយកចេញឲ្យអស់នូវដីដែលគ្មានគុណភាព ទទឹង ២០ម.
– កសាងតួផ្លូវមានទទឹង ៩ម.-១០ម.
– ចាក់ក្រាលល្បាយកម្ទេចថ្ម កម្រាស់ ០,២ម. កិនបង្ហាប់រួច
– ចិតជញ្ជាំងភ្នំ បង្ការបាក់ដី-ថ្ម ដើមឈើធ្លាក់
– ជីកប្រឡាយរំដោះទឹក

ស្ថានភាពភូមិសាស្តនៅការដ្ឋានសាងសង់

-ជាតំបន់ខ្ពង់រាប មានព្រៃក្រាស់ ជួរភ្នំខ្ពស់ៗ សុទ្ធសឹងតែជាថ្ម មានអូរ ជ្រោះ ជ្រលង ជ្រៅយ៉ាងច្រើន
-មានអាកាសធាតុចុះត្រជាក់ខ្លាំងនៅរដូវរងារ និងហួតហែងខ្វះខាតទឹកនៅរដូវប្រាំង ជាតំបន់ដែលប្រឈមខ្ពស់នឹងជំងឺគ្រុនចាញ់ សំបូរទៅដោយសត្វកាចសាហាវ និងអាសិរពិសជាច្រើន
-ជាតំបន់សង្គ្រាមច្រើនទសវត្សរ៍ បានបន្សល់គ្រាប់យុទ្ធភណ្ឌមិនទាន់ផ្ទុះ នៅរាយប៉ាយ
-ជាតំបន់ឆ្ងាយដាច់ស្រយាល ខ្វះផ្លូវគមនាគមន៍សម្រាប់បម្រើការងារដឹកជញ្ជូន។

បញ្ហាប្រឈម

-គ្រាប់យុទ្ធភណ្ឌមិនទាន់ផ្ទុះដែលនៅសេសសល់
-កសាងផ្លូវថ្មីទាំងស្រុង អាចប្រឈមនឹងការបើកផ្លូវមិនចំគោលដៅ
-គម្លាតនៃបម្រែបម្រួលអាកាសធាតុ កង្វះខាតទឹកយ៉ាងខ្លាំងនៅក្នុងរដូវប្រាំង