ព័ត៌មានជាតិ

គម្រោងផ្លូវជាតិលេខ ៦០បេ (ក្រុងក្រចេះ-កំពង់ថ្ម ខេត្តកំពង់ធំ) លើកយកពិភាក្សាលម្អិត ជំរុញការសាងសង់ឱ្យល្អប្រសើរ

បានផុស

២ នាទី មុន

នៅ

ថ្ងៃសៅរ៍ ២ វិច្ឆិកា ២០២៤

ដោយ

គម្រោងសាងសង់ផ្លូវជាតិលេខ ៦០បេ (ក្រុងក្រចេះ-កំពង់ថ្ម ខេត្តកំពង់ធំ) ត្រូវបានមន្រ្តីក្រសួងសាធារណការនិងដឹកជញ្ជូនលើកយកមកពិភាក្សាយ៉ាងលម្អិត ដើម្បីជំរុញការងារសាងសង់ឱ្យមានភាពល្អប្រសើរ។

លោក សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន កាលពីថ្ងៃ ០១ វិច្ឆិកា ម្សិលមិញនេះ បានដឹកនាំកិច្ចប្រជុំពិភាក្សាការងារគម្រោងសាងសង់ផ្លូវជាតិលេខ ៦០បេ (ក្រុងក្រចេះ-កំពង់ថ្ម ខេត្តកំពង់ធំ) ដោយមានចូលរួមពីថ្នាក់ដឹកនាំក្រសួង មន្ត្រីជំនាញពាក់ព័ន្ធក្រោមឱវាទក្រសួង និងតំណាងក្រុមហ៊ុនសាងសង់ (Shanghai Construction Group)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះធ្វើឡើង ដើម្បីពិភាក្សាលើការងាររៀបចំផែនការមេសម្រាប់អនុវត្តគម្រោងសាងសង់ផ្លូវជាតិលេខ ៦០ បេ(ក្រុងក្រចេះ-កំពង់ថ្ម ខេត្តកំពង់ធំ) និងពិភាក្សាលើ Alignment AនិងB ក្នុងការពិនិត្យលទ្ធភាពលើផលប៉ះពាល់របស់ប្រជាពលរដ្ឋ និងបញ្ហាប្រឈមផ្សេងៗទៀត ដើម្បីជំរុញឱ្យគម្រោងសាងសង់អាចអនុវត្តទទួលបានលទ្ធផលល្អ។

ថ្លែងនាឱកាសនោះ លោក សុខុម ភគវន្តមុនី បានណែនាំដល់ក្រុមហ៊ុនសាងសង់ Shanghai Construction Group បន្តរៀបចំបែបបទនីតិវិធីឱ្យបានចប់សព្វគ្រប់ ដើម្បីពន្លឿនគម្រោងការងារសាងសង់ឱ្យបានឆាប់រហ័សផងដែរ។

ផ្លូវជាតិលេខ ៦០បេ តភ្ជាប់ពីក្រុងក្រចេះឆ្លងកាត់តាមស្រុកព្រែកប្រសព្វ រហូតដល់កំពង់ថ្មខេត្តកំពង់ធំ មានប្រវែងជាង ១៣០ គីឡូម៉ែត្រ។ ខ្សែនេះមានតួនាទីសំខាន់ សម្រាប់ការតភ្ជាប់និងសម្រួលការធ្វើដំណើររបស់ភ្ញៀវទេសចរនិងការដឹកជញ្ជូនពីតំបន់ភាគកណ្ដាលមកតំបន់ភាគឦសាន ដោយឆ្លងកាត់ស្ពានក្រចេះដែលកំពុងដំណើរសាងសង់បន្តទៅតំបន់ខេត្តភាគឦសានមានមណ្ឌលគិរី រតនគិរី ស្តឹងត្រែង ហើយតាមរយៈគម្រោងស្ថាបនាផ្លូវនេះនឹងរុញកំណើនការអភិវឌ្ឍន៍ និងលើកស្ទួយជីវភាពពលរដ្ឋក្នុងមូលដ្ឋាន៕