ឧត្តមសេនីយ៍ឯក ហែម សុវត្ថិ អញ្ជើញដឹកនាំ​ប្រតិភូ ចូល​រួម​មហា​សន្និបាត​នគរបាលអន្តរជាតិលើកទី៩២

ភ្នំពេញ ៖ នៅល្ងាចថ្ងៃទី២ ខែវិចិ្ឆកា ឆ្នាំ២០២៤ ឧត្តមសេនីយ៍ឯក ហែម សុវត្ថិ អគ្គស្នងការ​រង​នគរបាល​ជាតិ បាន​ទទួល​គោលការណ៍​អនុញ្ញាត​ដ៏​ខ្ពង់ខ្ពស់​ពី​អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តី​ក្រសួងមហាផ្ទៃ និង​នាយ​ឧត្តមសេនីយ៍ ស ថេត អគ្គស្នងការ នៃ​អគ្គស្នងការដ្ឋាននគរបាល​ជាតិ អញ្ជើញ​ដឹកនាំ​ប្រតិភូទៅ​ចូលរួម​មហាសន្និបាតស្ថាប័ននគរបាលអន្តរជាតិលើកទី៩២។

ការដឹកនាំប្រតិភូនេះ ប្រព្រឹត្ត​ទៅ​នៅ​ទី​ក្រុង Glasgow ប្រទេសស្តុតឡែន នៃចក្រភពអង់គ្លេស​នា​ថ្ងៃទី ៤-៧ ខែវិច្ឆិកា ឆ្នាំ២០២៤។

មហា​សន្និបាត​ស្ថាប័ន​នគរបាល​អន្តរជាតិ​លើក​ទី​៩២​នេះ នឹង​មាន​របៀបវារៈ​សំខាន់ៗ​ជា​ច្រើន​សម្រាប់​ស្ថាប័ន​នគរបាលនៃប្រទេសជាសមាជិកទាំង១៩៦ប្រទេស ធ្វើការ​បូក​សរុប​អំពី​លទ្ធផល​នៃ​កិច្ច​សហប្រតិបត្តិការ​ក្នុង​វិស័យ​កិច្ចការនគរបាលទាំងកម្រិតទ្វេភាគី ពហុភាគី តំបន់ និងអន្តរជាតិ ជាពិសេសគឺការបោះឆ្នោតជ្រើសរើសបេក្ខភាពជាអគ្គលេខាធិការ នៃ​អគ្គលេខាធិការដ្ឋាន​នគរបាលអន្តរជាតិ ថ្នាក់ដឹកនាំ និងប្រតិភូប្រចាំតំបន់ នៃ​គណៈ​កម្មាធិការ​ប្រតិបត្តិ៕