ក្រុមនិស្សិតប្លាស្ទិក ផ្តើមយុទ្ធនាការសម្អាតសំរាមនៅកោះស្តេចប្រែក្លាយជាតំបន់ទេសចរណ៍ដ៏ទាក់ទាញ

ក្រុមនិស្សិតប្លាស្ទិក នៅថ្ងៃទី ០៣ ខែ វិច្ឆិកានេះ បានផ្តួចផ្តើមយុទ្ធនាការ សម្អាតសំរាមទាំងក្នុងទឹកសមុទ្រ និងលើគោក នៅកោះស្តេច ខេត្តកោះកុង ក្នុងគោលបំណងប្រែក្លាយតំបន់នេះឱ្យទៅជាតំបន់ទេសចរណ៍ដ៏ទាក់ទាញ និងគ្មានសំរាម។

យុទ្ធនាការនេះ រៀបចំឡើងនៅសាលាស្រុក គិរីសាគរ នាខេត្តកោះកុង និងមានការចូលរួមពីអាជ្ញាធរមូលដ្ឋាន ប្រជាពលរដ្ឋ និងសហគមន៍ ដែលរស់នៅតំបន់នោះ។ ពួកគេបានសហការគ្នាដើរប្រមូលសំរាមក្នុងទឹក និងលើគោក តាមរយៈយុទ្ធនាការ «កោះស្តេច កោះស្អាត កោះគំរូ ដើម្បីបង្កើនភាពទាក់ទាញជាគោលដៅទេសចរណ៍» ។

ព្រឹត្តិការណ៍នេះ ក៏មានការចងបដា ដោយសរសេរថា «ចូលរួមដាក់សំរាមឱ្យបានត្រឹមត្រូវ ដើម្បីកោះស្តេច កោះស្អាត កោះគំរូ»។ បន្ថែមពីនេះ ក៏បានណែនាំដល់ពលរដ្ឋឱ្យទុកដាក់សំរាមឱ្យបានត្រឹមត្រូវ និងអប់រំគាត់ពីផលប៉ះពាល់ដល់សុខភាពនៃការរស់នៅមិនស្អាតផងដែរ។

គួរសម្រាបថា ក្រុមនិស្សិតប្លាស្ទិក តែងតែបំផុសគំនិតឱ្យពលរដ្ឋចូលរួមទុកដាក់សំរាមឱ្យបានត្រឹមត្រូវ ហើយមានយុវជនជនជាតិខ្មែរ និងបរទេស ជាបន្តបន្ទាប់ បានស្ម័គ្រចិត្ត​ដើរប្រមូលសំរាមនៅភូមិសាស្រ្តរាជធានីភ្នំពេញនៅតាមលូ និងប្រឡាយនានា ៕