គម្រោងជួសជុលផ្លូវ ១ខ្សែ ក្នុងស្រុកចិត្របុរី បានបញ្ចប់ការដេញថ្លៃជាស្ថាពរ

គម្រោងជួសជុលផ្លូវក្រាលគ្រួសធម្មជាតិ ១ខ្សែ ប្រវែងជាង ៤គីឡូម៉ែត្រ ទទឹង ៥ម៉ែត្រ នៅឃុំបុសលាវ ស្រុកចិត្របុរី ខេត្តក្រចេះ ត្រូវបានប្រកាសបញ្ចប់ការដេញថ្លៃជាស្ថាពរ នាព្រឹកថ្ងៃទី៥ ខែវិច្ឆិកា ឆ្នាំ២០២៤ នេះ ដោយមានការចូលរួមពីលោក ឥម ធីរិន អភិបាលរងស្រុកចិត្របុរី ក្រុមលទ្ធកម្មខេត្ត និងក្រុមហ៊ុនវិនិយោគចំនួន ៤។

លោក ណៃ ឃី មេឃុំបុសលាវ បានឲ្យដឹងថា ផ្លូវ ១ខ្សែនេះ គឺចាប់ពីចំណុចភូមិព្រែកកូវ ដល់ភូមិល្វាទង ក្នុងឃុំបុសលាវ មានប្រវែងសរុប ៤,៣គីឡូម៉ែត្រ ដែលបម្រើជាប្រយោជន៍រួមដល់ប្រជាពលរដ្ឋ សម្រួលការងារដឹកជញ្ជូនដំណាំកសិកម្ម ទំនិញផ្សេងៗ ក៏ដូចជាការធ្វើដំណើរទៅមក។

ក្រុមហ៊ុនចូលរួមដេញថ្លៃចំនួន ៤ រួមមាន ក្រុមហ៊ុន ចាំង ម៉ានីម៉ិច ដាក់ដេញថ្លៃ ៨១ ៧២០ ០០០រៀល ក្រុមហ៊ុន ស៊ឹម ស៊ីថា ដាក់ដេញថ្លៃ ១៨៩ ៧៤០ ០០០រៀល ក្រុមហ៊ុន អ៊ឹង ចាន់ឡា ដាក់ដេញថ្លៃ ៩៤ ៦៥០ ០០០រៀល និងក្រុមហ៊ុន វ៉េង លាប ដាក់ដេញថ្លៃ ៧៤ ៦០៤ ០០០រៀល។ ជាលទ្ធផលបានទៅលើក្រុមហ៊ុន វ៉េង លាប ដែលដាក់ដេញថ្លៃទាបជាងគេ។

លោក ឥម ធីរិន អភិបាលរងស្រុកចិត្របុរី បានណែនាំដល់ក្រុមហ៊ុនវិនិយោគដែលទទួលបានគម្រោងពីការដាក់ដេញថ្លៃ ត្រូវចុះទៅសិក្សាដោយផ្ទាល់ ពិនិត្យមើលកិច្ចសន្យា និងលក្ខខណ្ឌគម្រោង និងត្រូវអនុវត្តឲ្យបានត្រឹមត្រូវតាមកិច្ចសន្យា ធានាបាននូវគុណភាពផ្លូវ។ លោកបញ្ជាក់ថា ប្រសិនបើខាងក្រុមហ៊ុនធ្វើផ្លូវមិនគោរពតាមកិច្ចសន្យាគម្រោងទេ រដ្ឋបាលឃុំនឹងទុកជាមោឃៈ និងមិនឲ្យចូលរួមដេញថ្លៃគម្រោងក្រោយៗទៀត រយៈពេលបីឆ្នាំ៕

អត្ថបទ៖ ប្រុញ វិធិន