ក្រុមជនក្លែងឯកសារ និងលក់រថយន្ដអត់ពន្ធ ៥នាក់ ត្រូវសមត្ថកិច្ចបង្ក្រាប

កាលពីថ្ងៃទី០១ ខែវិច្ឆិកា ឆ្នាំ២០២៤  កម្លាំងការិយាល័យព្រហ្មទណ្ឌកម្រិតស្រាល បានចាប់ខ្លួនជនសង្ស័យចំនួន៥នាក់ ពាក់ព័ន្ធករណីក្លែងឯកសាររថយន្ដ និងលក់រថយន្ដអត់ពន្ធ នៅ៣ចំណុចផ្សេងគ្នា គឺនៅសង្កាត់ចោមចៅ២ ខណ្ឌពោធិ៍សែនជ័យ, សង្កាត់ព្រៃស ខណ្ឌដង្កោ និង សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។ នេះបើតាមសេចក្ដីប្រកាសព័ត៌មានដែលទើបនឹងផ្សាយលើទំព័រហ្វេសប៊ុកនាយកដ្ឋាននគរបាលព្រហ្មទណ្ឌ នាល្ងាចថ្ងៃទី០៥ ខែតុលា ឆ្នាំ២០២៤ នេះ។

ជនសង្ស័យទាំង៥នាក់ ដែលសមត្ថកិច្ចឃាត់ខ្លួនបានរួមមាន ទី១៖ឈ្មោះ នុន វិបុល អាយុ៤១ឆ្នាំ មុខរបរអ្នកលក់ទូរស័ព្ទ, ទី២៖ឈ្មោះ ផាន់ ធារិទ្ធ អាយុ២៣ឆ្នាំ មុខរបរជាងទូរស័ព្ទ, ទី៣៖ឈ្មោះ ហ៊ុន បាឡុង អាយុ៣០ឆ្នាំ មុខរបរអ្នកលក់រថយន្ដ, ទី៤៖ឈ្មោះ ចេង រស្មី អាយុ២៩ឆ្នាំ មុខរបរកសិករ និងទី៥៖ឈ្មោះ ហ៊ត ដាវ៉ា អាយុ៣០ឆ្នាំ មុខរបរទិញ លក់ឡាន។

វត្ថុតាងដកហូតបានដូចជា រថយន្ដ ម៉ាក LEXUS RX350 ពណ៌ស ផលិត ឆ្នាំ២០១០, រថយន្ដម៉ាក AUDI Q7 ពណ៌ស ផលិតឆ្នាំ២០១២, ប័ណ្ណសម្គាល់យានជំនិះចំនួន០២ ដែលមិនប្រក្រតី, លតាប័ត្ររថយន្ដទេសចរណ៍ ចំនួន០២ សុទ្ធតែមិនប្រក្រតី, វិញ្ញាបនបត្រពិនិត្យ លក្ខណៈបច្ចេកទេសយានជំនិះ ចំនួន០២ សុទ្ធតែមិនប្រក្រតី, លតាបត្របង់ពន្ធមធ្យោបាយដឹកជញ្ជូន ចំនួន០៣ មិនប្រក្រតី និងប័ណ្ណសម្គាល់យានជំនិះ ចំនួន០២ ប្រក្រតីមួយ និងមិនប្រក្រតីមួយ។

បច្ចុប្បន្ន ជនសង្ស័យខាងលេី និងវត្ថុតាងបានកសាង សំណុំរឿង បញ្ជូនទៅអយ្យការអមសាលាដំបូងរាជធានីភ្នំពេញ ចាត់ការបន្តតាមនីតិវិធី៕