ព័ត៌មានជាតិ

អាជ្ញាធរខេត្តកោះកុង ប្រាប់មន្ទីរអង្គភាព និងរដ្ឋបាលថ្នាក់ក្រោម ត្រូវកាន់កាប់រដ្ឋសម្បត្តិរដ្ឋប្រកបដោយស្មារតីទទួលខុសត្រូវខ្ពស់

បានផុស

៥ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

កោះកុង ៖ អភិបាលស្តីទីខេត្តកោះកុង ព្រឹកថ្ងៃទី៥ ខែវិច្ឆិកា ឆ្នាំ២០២៤ បានក្រើនរម្លឹកដល់មន្ទីរអង្គភាព និងរដ្ឋបាលថ្នាក់ក្រោមត្រូវកាន់កាប់រដ្ឋសម្បត្តិរដ្ឋប្រកបដោយប្រសិទ្ធិភាព និងស្មារតីទទួលខុសត្រូវខ្ពស់ដែលរាជរដ្ឋាភិបាលប្រគល់ជូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំ ឃិតវៀត អភិបាលស្តីទីខេត្តកោះកុង ពន្យល់ណែនាំក្តែងៗដល់ប្រធានអង្គភាព មន្ទីរពាក់ព័ន្ធ ពិសេសរដ្ឋបាលក្រុងស្រុកឃុំសង្កាត់ គប្បីពិនិត្យគ្រប់គ្រងរាល់ទ្រព្បសម្បត្តិរបស់រដ្ឋទាំងអស់ដែលកំពុងមានហើយមិនត្រូវបានបាត់បង់ធ្លាក់ទៅដល់ដៃជូនខិលខូចនោះទេ។

នៅក្នុងកិច្ចប្រជុំពិភាក្សាស្តីពីការគ្រប់គ្រង និងប្រើប្រាស់អចលនទ្រព្យរបស់រដ្ឋ នៅសាលមហោស្រពខេត្ត លោកអភិបាលស្តីទីខេត្ត លើកឡើងទៀតថា បញ្ហាប្រឈមរបស់ មន្ទីរអង្គភាពក្នុងការដោះស្រាយត្រួតពិនិត្យផ្ទៀងផ្ទាត់ការរៀបចំបញ្ជីសារពើភ័ណ្ឌទ្រព្យសម្បត្តិរដ្ឋជារៀងរាល់ឆ្នាំ និងជំរុញការធ្វើប័ណ្ណកម្មសិទ្ធិរបស់មន្ទីរអង្គភាពទូទាំងខេត្ត។

លោក សំ ឃិតវៀត បានណែនាំដល់មន្ទីរអង្គភាពរដ្ឋបាលក្រុងស្រុកដល់ឃុំសង្កាត់ កន្លងទៅក្រសួងសេដ្ឋកិច្ច និងហិរញ្ញវត្ថុដែលជាអាជ្ញាធរគ្រប់គ្រងទ្រព្យសម្បត្តិរដ្ឋ និងជាសេនាធិការរបស់រាជរដ្ឋាភិបាលក្នុងការគ្រប់គ្រងនិងចាត់ចែង ទ្រព្យសម្បត្តិរដ្ឋ បានខិតខំពង្រឹងការគ្រប់គ្រង និងការរៀបចំបញ្ជីសារពើភ័ណ្ឌទ្រព្យសម្បត្តិរដ្ឋ ដោយចេញផ្សាយនូវលិខិតបទដ្ឋានគតិយុត្តិ។

មិនត្រឹមតែប៉ុណ្ណោះ ក្រសួង រដ្ឋបាលខេត្ត និងមន្ទីរសេដ្ឋកិច្ច បានចុះធ្វើការណែនាំផ្សព្វផ្សាយដល់ អាជ្ញាធរកាន់កាប់ទ្រព្យសម្បត្តិរដ្ឋជាប្រចាំក្នុងការរៀបចំបញ្ជីសារពើភ័ណ្ឌទ្រព្យសម្បត្តិរដ្ឋជាពិសេសក្នុងគោលបំណង ដើម្បីក្តាប់បាននូវយថាប្រភេទ បរិមាណ គុណភាព ទាំងចលនវត្ថុ និងអចលនវត្ថុ របស់មន្ទីរអង្គភាពដែលកំពុងគ្រប់គ្រង កាន់កាប់ ប្រើប្រាស់ ចាត់ចែង និងថែរក្សានូវទ្រព្យសម្បត្តិរដ្ឋទាំងអស់នោះ។

ជាស្មារតីដឹកនាំ និងគ្រប់គ្រងអចលនទ្រព្យរបស់រដ្ឋជុំវិញខេត្តកោះកុង រដ្ឋបាលខេត្តណែនាំដល់គ្រប់មន្ទីរអង្គភាព រដ្ឋបាលថ្នាក់ក្រោមទាំងអស់ ត្រូវយកចិត្តទុកដាក់ខ្ពស់ ដើម្បីស្វែងយល់ឱ្យបានកាន់តែច្បាស់នូវវិធាននីតិវិធី និងបច្ចេកទេសនានា ដោយខិតខំគោរពឱ្យបានខ្ជាប់ខ្ជួនតាមក្របខ័ណ្ឌ និងបណ្តាវិធានការ ព្រមទាំងគោលការណ៍ និងបច្ចេកទាំងឡាយ ដើម្បីទទួលបានភាពសុក្រិត្យ និងគណនេយ្យភាព៕

អត្ថបទ ៖ សិរីវឌ្ឍនៈ