ព័ត៌មានជាតិ

គ្រូពេទ្យបារាំង ពិនិត្យព្យាបាលជំងឺរោគស្ត្រីនៅមន្ទីរពេទ្យបង្អែកខេត្តកោះកុង ឥតគិតថ្លៃ

បានផុស

៥ ខែ មុន

នៅ

ថ្ងៃពុធ ៦ វិច្ឆិកា ២០២៤

ដោយ

គ្រូពេទ្យបារាំង និងគ្រូពេទ្យ នៃមន្ទីរពេទ្យបង្អែកខេត្តកោះកុង បានបើកការពិគ្រោះ ពិនិត្យ និងព្យាបាលជំងឺរោគស្ត្រីដោយឥតគិតថ្លៃ ដោយបេសកកម្មផ្នែកមនុស្សធម៌នេះធ្វើឡើងជារៀងរាល់ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៣ ថ្ងៃហើយដែលគ្រូពេទ្យមកពីប្រទេសបារាំង និងគ្រូពេទ្យជំនាញ នៃមន្ទីរពេទ្យបង្អែកខេត្តកោះកុង ធ្វើរួមគ្នាលើការពិនិត្យ និងវះកាត់ព្យាបាលជំងឺរោគស្ត្រីផ្សេងៗ ក្រោមកិច្ចសហការយ៉ាងជិតស្និទ្ធបំផុត ដើម្បីលើកកម្ពស់វិស័យសុខាភិបាល។

លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានឱ្យដឹងនៅថ្ងៃទី ៦ ខែវិច្ឆិកា នេះថា មន្ទីរពេទ្យរបស់លោកតែងតែមានកិច្ចសហការរវាងគ្រូពេទ្យបារាំងស្របពេលពួកគាត់មានវិស្សមកាល ហើយអញ្ជើញបេសកកម្មពិនិត្យព្យាបាលជំងឺរោគស្ត្រីនៅភូមិសាស្ត្រខេត្ត។

លោកវេជ្ជបណ្ឌិត បន្ថែមថា ត្រឹម ៣ ថ្ងៃ មកនេះ មានស្ត្រីដែលជាអ្នកជំងឺចំនួន ៥៨ នាក់ហើយដែលមកពិគ្រោះជំងឺ និងវះកាត់ព្យាបាលស្ត្រីមានជំងឺបញ្ហាស្បូនធំៗ រ៉ាំរ៉ៃចំនួន ៦ ករណីហើយ ដោយកំពុងបំពេញភារកិច្ចយ៉ាងសកម្មបំផុតជូនប្រជាពលរដ្ឋអ្នកជំងឺ។ បច្ចុប្បន្នមន្ទីរពេទ្យបង្អែកខេត្ត មានសម្ភារៈបរិក្ខារវេជ្ជបណ្ឌិតទំនើបដែលបម្រើសេវាព្យាបាលដល់ស្ត្រីមានជំងឺដុំសាច់គីសសុដន់ គីសស្បូន និងរោគនានា។

លោកវេជ្ជបណ្ឌិត ហៃ ឡៃសុន ក៏ស្នើដល់ប្រជាពលរដ្ឋជាស្ត្រី ត្រូវឧស្សាហ៍មកមន្ទីរពេទ្យ ដើម្បីពិនិត្យសុខភាពជាប្រចាំករណីសង្ស័យថា មានរោគស្ត្រីដូចខាងលើ ព្រោះថាការធ្វើបែបនេះអាចពិនិត្យព្យាបាលបានទាន់ពេលវេលា ចៀសវាងទុកជំងឺរហូតដល់ដំណាក់គ្រោះថ្នាក់ហើយទើបមកព្យាបាលគឺអាចហួសពេល។

គួរកត់សម្គាល់ថា មន្ទីរពេទ្យបង្អែកខេត្តកោះកុង និងក្រុមគ្រូពេទ្យស្ម័គ្រចិត្តមកពីបារាំង បានផ្តើមពិគ្រោះ ពិនិត្យ និងព្យាបាលវះកាត់ជំងឺរោគស្ត្រីចាប់ពីថ្ងៃទី ៤ ខែវិច្ឆិកា ដល់យុទ្ធនាការរបស់ខ្លួននៅថ្ងៃទី ៨ ខែវិច្ឆិកា ឆ្នាំ ២០២៤។

ដោយឡែក អ្នកស្រី រិទ្ធ ថាវី រស់នៅឃុំប៉ាក់ខ្លង ស្រុកមណ្ឌលសីមា មានជំងឺដុំសាច់គីសសុដន់ និងអ្នកស្រី មុំ វី មានជំងឺបញ្ហាស្បូន រស់នៅឃុំតាតៃក្រោម ស្រុកកោះកុង បានលើកឡើងស្រដៀងគ្នាថា ពួកគាត់ពិតជាលំបាកដែលមានជំងឺរោគស្ត្រី ដោយមិនអាចធ្វើការអ្វីបានច្រើននោះទេ។ កន្លងទៅ ធ្លាប់ទៅមន្ទីរពេទ្យរដ្ឋ ឬឯកជនផងដែរ ប៉ុន្តែបានត្រឹមតែធូរស្រាលមិនជាសះស្បើយឡើយ ទើបសម្រេចចិត្តមកឱ្យក្រុមគ្រូពេទ្យបារាំងជួយព្យាបាល។

តំណាងស្ត្រីមកពិនិត្យព្យាបាលជំងឺនៅមន្ទីរពេទ្យបង្អែកខេត្តកោះកុង ក៏សូមថ្លែងអំណរអរគុណដល់គ្រូពេទ្យខ្មែរ និងគ្រូពេទ្យបារាំងដែលសហការគ្នាមកពិនិត្យព្យាបាលជំងឺដល់ពួកគាត់ ហើយជឿជាក់ថាពួកគាត់នឹងបន្តបេសកកម្មមនុស្សធម៌នេះដល់ក្រុមស្ត្រីមានជំងឺរោគស្ត្រីជាបន្តបន្ទាប់ទៀត៕

អត្ថបទ ៖ សិរីវឌ្ឍនៈ