ព័ត៌មានជាតិ

ការិយាល័យច្រកចេញចូលតែមួយ ខណ្ឌសែនសុខ បម្រើសេវាសាធារណៈជូនពលរដ្ឋ លឿន រហ័ស និងតម្លាភាព

បានផុស

៣ ខែ មុន

នៅ

ថ្ងៃពុធ ៦ វិច្ឆិកា ២០២៤

ដោយ

រដ្ឋបាលខណ្ឌសែនសុខ ក្រោមការដឹកនាំរបស់ លោក ម៉ូវ ម៉ានិត អភិបាល នៃគណៈអភិបាលខណ្ឌសែនសុខ បានយកចិត្តទុកដាក់បម្រើប្រជាពលរដ្ឋក្នុងមូលដ្ឋានគ្រប់ពេលវេលា គ្រប់តម្រូវការ ជាពិសេសតាមរយៈការិយាល័យច្រកចេញចូលតែមួយ ផ្ដល់សេវាសាធារណៈដោយលឿន រហ័ស និងតម្លាភាពផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលខណ្ឌសែនសុខ បានបញ្ជាក់ជូនដល់ប្រជាពលរដ្ឋដែលមានតម្រូវការមកទទួលសេវាសាធារណៈតាមរយៈច្រកចេញចូលតែមួយរបស់ខណ្ឌសែនសុខ គឺចាប់ពីថ្ងៃច័ន្ទ ដល់ថ្ងៃសុក្រ រៀងរាល់ម៉ោងធ្វើការ ពេលព្រឹក ចាប់ពីម៉ោង ០៧ និង ៣០ នាទីព្រឹក ដល់ម៉ោង ១១ និង ៣០ នាទីព្រឹក និងពេលរសៀល ចាប់ពីម៉ោង ០២ រសៀល រហូតដល់ម៉ោង ០៥ និង ៣០ នាទីល្ងាច។

ក្នុងនោះប្រជាពលរដ្ឋដែលបានមកទទួលសេវាសាធារណៈនៅច្រកចេញចូលតែមួយ បានលើកឡើងថា មានភាពលឿន រហ័ស និងមានមន្ត្រីប្រចាំការទទួលឯកសារពីពលរដ្ឋលឿនផងដែរ។ បន្ថែមទៀតនោះ ពេលមកបញ្ជាក់ឯកសារដូចជា អត្តសញ្ញាណប័ណ្ណ សៀវភៅស្នាក់ សញ្ញាប័ត្រ ការធ្វើស្លាកលេខម៉ូតូ ជាដើម ពេលខ្លះមិនចាំបាច់ឱ្យពលរដ្ឋត្រឡប់ទៅវិញនោះទេ គឺឲ្យរង់ចាំទទួលយកឯកសារទៅវិញភ្លាមៗ ផងដែរ។

ទន្ទឹមនឹងនេះ លោកអភិបាល បានណែនាំមន្ត្រីសមត្ថកិច្ច និងអាជ្ញាធរទាំងអស់ ឱ្យយកចិត្តទុកដាក់បម្រើសេវាសាធារណៈ សេវាសន្តិសុខ សេវាផ្សេងៗ ជាតម្រូវការប្រចាំថ្ងៃរបស់ប្រជាពលរដ្ឋឱ្យបានត្រឹមត្រូវ និងចាត់ចែងកម្លាំង ទាំងសមត្ថកិច្ច ទាំងរដ្ឋបាលស៊ីវិល ខណ្ឌ-សង្កាត់ ប្រចាំការជាប់ជាប្រចាំ ២៤ ម៉ោង លើ ២៤ ម៉ោង នៅទីស្នាក់ការ ដើម្បីចាំទទួលផ្ដល់សេវា បម្រើសេវាសាធារណៈ និងទទួលសំណូមពររបស់ប្រជាពលរដ្ឋមិនថាយប់ ឬថ្ងៃ៕

អត្ថបទ ៖ សំណាង