រដ្ឋមន្ត្រីប្រតិភូអមនាយករដ្ឋមន្ត្រីចំនួន៦រូប ត្រូវបានសម្ដេចធិបតី ប្រគល់ភារកិច្ចតាមវិស័យនីមួយៗ

រដ្ឋមន្ត្រីប្រតិភូអមនាយករដ្ឋមន្ត្រីចំនួន៦រូប ត្រូវបានប្រមុខរាជរដ្ឋាភិបាល សម្រេចប្រគល់ភារកិច្ចតាមវិស័យសំខាន់ៗរបស់ជាតិ ដើម្បីទទួលបន្ទុកជួយកិច្ចការរបស់នាយករដ្ឋមន្ត្រី។

យោងតាមសេចក្តីសម្រេច ចុះថ្ងៃទី០៥ ខែវិច្ឆិកា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានកំណត់របៀបរបបការងារ និងការបែងចែកភារកិច្ចរបស់រដ្ឋមន្ត្រីប្រតិភូអមនាយករដ្ឋមន្ត្រីចំនួន៦រូប ដែលក្នុងនោះ លោក ផៃ ប៊ុនឈឿន ត្រូវទទួលបន្ទុកជួយសម្តេចធិបតី នាយករដ្ឋមន្ត្រី ក្នុងកិច្ចការបរិស្ថាន លោក ជា បូរ៉ា ទទួលបន្ទុកជួយសម្តេចធិបតី​​ នាយករដ្ឋមន្ត្រី ក្នុងកិច្ចការទេសចរណ៍។

ចំណែក លោក ប្រាក់ សំអឿន ដែលមានអតីតភាពជាមន្ត្រីជាន់ខ្ពស់នៅក្រសួងមហាផ្ទៃ ត្រូវទទួលបន្ទុកជួយសម្តេចធិបតីនាយករដ្ឋមន្ត្រី ក្នុងកិច្ចការទំនាក់ទំនងជាមួយសង្គមស៊ីវិល និងរដ្ឋបាលថ្នាក់ក្រោមជាតិ ខណៈលោក សរ សុវណ្ណ ទទួលបន្ទុកជួយក្នុងកិច្ចការដែនដី នគររូបនីយកម្ម និងសំណង់ និងលោក ជា តារា ទទួលបន្ទុកជួយក្នុងកិច្ចការអតីតយុទ្ធជន។

ដោយឡែក លោក សូ ម៉ារ៉ា ដែលទើបតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី ត្រូវទទួលបន្ទុកជួយក្នុងកិច្ចការដែលនាយករដ្ឋមន្ត្រីប្រគល់ជូន៕