ព័ត៌មានជាតិ

រដ្ឋបាលខណ្ឌដូនពេញ ចុះពិនិត្យស្ថានភាពសន្តិសុខ សណ្ដាប់ធ្នាប់ របៀបរៀបរយសាធារណៈ និងអនាម័យបរិស្ថាន

បានផុស

២ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

នាថ្ងៃទី ៧ ខែវិច្ឆិកា ឆ្នាំ ២០២៤ នេះ លោក ជា ខេមា អភិបាល នៃគណៈអភិបាលខណ្ឌដូនពេញ បានអញ្ជើញអមដំណើរ លោក ឈិន កេតនា ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការ នៃគណៈកម្មាធិការជាតិរៀបចំបុណ្យជាតិ-អន្តរជាតិ ចុះត្រួតពិនិត្យស្ថានភាពសន្តិសុខ សណ្ដាប់ធ្នាប់ របៀបរៀបរយសាធារណៈ និងអនាម័យ បរិស្ថាន នៅលើវេទិកា សម្រាប់រៀបចំពិធីបុណ្យអុំទូកខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាល បានឱ្យដឹងថា ដើម្បីធានាឱ្យបាននូវសោភ័ណភាពស្រស់ស្អាត និងអនាម័យ បរិស្ថាន មានភាពល្អប្រសើរ មន្ត្រីគ្រប់ជំនាញ បានគិតគូរទាន់ពេលវេលា ត្រៀមចូលរួមអបអរសាទរក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលខិតជិតមកដល់នាពេលខាងមុខនេះ។ ក្នុងនោះ លោក បានសំណូមពរដល់ប្រជាពលរដ្ឋទាំងអស់ សូមចូលរួមជាមួយអាជ្ញាធរ ដើម្បីរក្សាបរិស្ថានអនាម័យឱ្យបានល្អ ព្រោះមនុស្សជាអ្នកបង្កើនសំរាម បើធ្វើតែអាជ្ញាធរនោះមិនបានល្អគ្រប់ជ្រុងជ្រោយទេ ទាល់តែមានការចូលរួមពីសំណាក់ពីពលរដ្ឋ។

សូមជម្រាបថា ពិធីបុណ្យអុំទូកនៅប្រទេសកម្ពុជា គឺជាពិធីបុណ្យដ៏ធំមួយក្នុងចំណោមពិធីបុណ្យនានា នៃប្រពៃណីទំនៀមទម្លាប់ខ្មែរ ដែលមានតាំងពីយូរលង់ណាស់មកហើយ។ ពិធីបុណ្យនេះ ត្រូវបានប្រារព្ធធ្វើជាទូទៅនៅក្នុងខែវិច្ឆិកា ដែលក្នុងពេលនោះក៏មានពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានរយៈពេល ៣ ថ្ងៃ គឺពីថ្ងៃ ១៤ ១៥ ១៦ ខាងមុខនេះ តាមដងទន្លេសាប មុខព្រះបរមរាជវាំង៕

អត្ថបទ ៖ ម៉េង