ព័ត៌មានជាតិ

NEA ប្រកាសពីឱកាសការងារជាង ៤ ម៉ឺនកន្លែង នៅទូទាំងប្រទេស

បានផុស

១ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

នៅថ្ងៃទី ៧ ខែវិច្ឆិកា ឆ្នាំ ២០២៤ នេះ លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសពីឱកាសការងារក្នុងស្រុកចំនួន ៤៤ ៩៣៥ កន្លែង ក្នុងវិស័យសំខាន់ៗ ចំនួន ៣ ធំៗ នៅទូទាំងប្រទេស សម្រាប់សាធារណជន យុវជន ងាយស្រួលជ្រើសរើសចូលបម្រើការងារតាមជំនាញដែលខ្លួនមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោករដ្ឋលេខាធិការ ឱកាសការងារជាង ៤ ម៉ឺនកន្លែងនោះ មានក្នុងវិស័យដូចជា វិស័យឧស្សាហកម្ម ចំនួន ៣២ ១៥៥ កន្លែង វិស័យកសិកម្មចំនួន ៣ ០៧៦ កន្លែង និងសេវាកម្មចំនួន ៩ ៧០៤ កន្លែង ដែលត្រូវបានប្រកាសជ្រើសរើសក្នុងបណ្ដាខេត្តជាច្រើនដូចជា ៖ ខេត្តកំពង់ស្ពឺ, ខេត្តកំពង់ឆ្នាំង, រាជធានីភ្នំពេញ, ខេត្តស្វាយរៀង, រតនគីរី, ក្រចេះ, តាកែវ, កណ្ដាល, បន្ទាយមានជ័យ, ស្ទឹងត្រែង, កំពង់ចាម និងបណ្ដាខេត្តផ្សេងៗ ទៀត។

ក្នុងនោះដែរ តម្រូវការកម្លាំងពលកម្មមានដូចជា មន្ត្រីឥណទាន និងប្រាក់កម្ចី, អ្នកបញ្ជាម៉ាស៊ីនដេរ, អ្នកត្រួតពិនិត្យដំណើរការផលិតលោហធាតុ, យន្តការី និងអ្នកដំឡើងអគ្គិសនី និងបុគ្គលិកផ្នែកកត់ត្រាស្ថិតិ ហិរញ្ញវត្ថុ និងធានារ៉ាប់រង និងមុខរបរផ្សេងៗ ជាច្រើនទៀត។ យុវជន សិស្ស និស្សិត សូមមេត្តាទាក់ទងទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរសព្ទ ១២៩៧ ឬ ១២៨៦ ឬ តេលេក្រាម និង CoolApp លេខ ០៧៧ ២៣ ២៣ ៧៨ ដើម្បីចុះឈ្មោះ និងសម្ភាសភ្លាមៗ។

ទន្ទឹមនឹងឱកាសការងារនៅក្នុងស្រុកច្រើនសម្បូរបែប លោករដ្ឋលេខាធិការ បានអំពាវនាវដល់ប្រជាពលរដ្ឋខ្មែរទាំងអស់ សូមចាប់យកឱកាសការងារដែលនៅក្បែរខ្លួន ហើយសូមកុំទៅធ្វើការងារដោយខុសច្បាប់នៅក្រៅប្រទេស ខណៈឱកាសការងារក្នុងស្រុកត្រូវបានប្រកាសជាហូរហែ និងជាច្រើនម៉ឺនកន្លែងជារៀងរាល់សប្ដាហ៍ ដោយក្រសួងការងារ និងបណ្ដុះបណ្ដាលវិជ្ជាជីវៈ។

លោករដ្ឋលេខាធិការបានបន្ថែមថា ប្រជាពលរដ្ឋ សូមធ្វើការពិចារណាអំពីឱកាសការងារក្នុងស្រុកដែលកំពុងមានតម្រូវការជាខ្លាំងនៅឆ្នាំ ២០២៤ និងឆ្នាំ ២០២៥ ខាងមុខ ខណៈការធ្វើការក្នុងស្រុកនាពេលបច្ចុប្បន្នទទួលបានអត្ថប្រយោជន៍ច្រើនដូចទៅនឹងបណ្តាប្រទេសជិតខាងផងដែរ។ ក្នុងនោះ ទី ១.ប្រាក់ឈ្នួលសមរម្យ , ទី ២.កន្លែងការងារនៅក្បែរផ្ទះ ,និង ទី ៣.ការចំណាយទាបដែលអាចឱ្យប្រជាពលរដ្ឋសន្សំសំចៃការចាយវាយជាប្រចាំបាន។

គួរបញ្ជាក់ថា ចាប់ពីខែសីហា ឆ្នាំ ២០២៣ ដល់ខែសីហា ឆ្នាំ ២០២៤ ពោលគឺ ១ ឆ្នាំ ដំបូង នៃរាជរដ្ឋាភិបាលអាណត្តិទី ៧ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ សម្រេចបានសមិទ្ធផលគួរឱ្យកត់សម្គាល់លើកិច្ចការស្វែងរកឱកាសការងារជូនប្រជាពលរដ្ឋកម្ពុជា។

ទន្ទឹមនេះ ទីភ្នាក់ងារជាតិមុខរបរ និងការងារ (NEA) បានរៀបចំកម្មវិធី “វេទិកាការងារ” ជាប្រចាំ ដើម្បីបង្កើតកន្លែងជួបគ្នាដោយងាយស្រួលរវាងនិយោជក និងអ្នកស្វែងរកការងារ ក្នុងការដាក់ពាក្យ និងសម្ភាសការងារភ្លាមៗ រួមមាន ៖ កិច្ចសម្ភាសការងារ វេទិកាការងារ និងពិព័រណ៍ការងារថ្នាក់ខេត្ត និងថ្នាក់ជាតិ ដែលក្រុមហ៊ុន សហគ្រាសធំៗ ជាច្រើន អាចចូលរួមដាក់តាំងបង្ហាញឱកាសការងារជូនសាធារណជន។

លើសពីនេះ NEA ក៏មានមជ្ឈមណ្ឌលការងារចំនួន ១៤ និងមជ្ឈមណ្ឌលការងារចល័តចំនួន ៧ ដើម្បីផ្តល់ព័ត៌មាន និងសេវាការងារដោយផ្ទាល់ ជូនយុវជន សិស្ស/និស្សិត នៅតាមគ្រឹះស្ថានអប់រំបណ្ដុះបណ្ដាល និងសាកលវិទ្យាល័យនានា នៅទូទាំងប្រទេសផងដែរ៕