មន្ត្រីរដ្ឋសភាកម្ពុជា ថា​ ការពង្រឹងពហុភាគីនិយម ជាស្នូលនៃទំនាក់ទំនងភាពជាដៃគូ

មន្ត្រីរដ្ឋសភាកម្ពុជា លើកឡើងថា ការពង្រឹងពហុភាគីនិយម គឺជាស្នូលក្នុងទំនាក់ទំនងភាពជាដៃគូអន្តរជាតិ ដែលគ្រប់ភាគី គប្បីរួមគ្នាពង្រឹងជាចាំបាច់ ដោយបើកចំហ និងបរិយាបន្ន។

លោកបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភានៃកម្ពុជា គូសបញ្ជាក់ថា ការពង្រឹងពហុភាគីនិយមបើកចំហ ហើយបរិយាបន្ន និងសណ្តាប់ធ្នាប់អន្តរជាតិផ្អែកលើច្បាប់ គឺជាគោលបំណងរួមរបស់យើង ដោយតម្កល់ផលប្រយោជន៍ និងសេចក្តីប្រាថ្នារបស់ប្រជាជន​ ជាស្នូលក្នុងទំនាក់ទំនងភាពជាដៃគូ។ បណ្ឌិត ឈាង វណ្ណារិទ្ធ បានលើកឡើងនេះ ក្នុងសន្និសីទអន្តរជាតិឆ្នាំ២០២៤ ស្តីពីភាពជាដៃគូអាស៊ាន-កូរ៉េ នៅថ្ងៃទី៧ ខែវិច្ឆិកា ឆ្នាំ២០២៤នេះ នៅទីក្រុងសេអ៊ូល ប្រទេសកូរ៉េខាងត្បូង។

បណ្ឌិត ឈាង វណ្ណារិទ្ធ បានថ្លែងចែករំលែកទស្សនៈនៅក្នុងអង្គសន្និសីទនេះ ថា ក្នុងបរិបទនៃការផ្លាស់ប្តូរយ៉ាងឆាប់រហ័សនៃទិដ្ឋភាពភូមិសាស្ត្រនយោបាយ និងភូមិសាស្ត្រសេដ្ឋកិច្ច ជាមួយនឹងការកើនឡើងនៃការប្រកួតប្រជែងក្នុងចំណោមមហាអំណាចធំៗ ភាពឆាប់ប្រែប្រួល និងការកើនឡើងនៃភាពស្មុគស្មាញអន្តរជាតិ បានបង្ខំឱ្យមហាអំណាចកណ្តាល និងរដ្ឋតូចៗស្វែងរកជំហរ ដើម្បីអភិវឌ្ឍន៍ជាតិខ្លួន។

តួយ៉ាង លោកបណ្ឌិត ឈាង វណ្ណារិទ្ធ បានលើកឡើងពីសារៈសំខាន់ភាពជាដៃគូរវាងអាស៊ាន-កូរ៉េ ដែលលោក ចាត់ទុកថា ជាសសរស្តម្ភមួយក្នុងការលើកកម្ពស់សន្តិភាព និងវិបុលភាពក្នុងតំបន់អាស៊ីប៉ាស៊ីហ្វិក។ នៅក្នុងអំឡុងពេលដែលមានការរីកចម្រើនគួរឱ្យកត់សម្គាល់ អាស៊ាន និងកូរ៉េ ចាំបាច់ត្រូវពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយឱ្យកាន់តែស៊ីជម្រៅបន្ថែមទៀត ដោយផ្តោតលើមនុស្ស សន្តិភាព ភពផែនដី និងវិបុលភាព។ នេះជាការបន្ថែមរបស់បណ្ឌិត ឈាង វណ្ណារិទ្ធ។

ក្នុងន័យនេះ បណ្ឌិត ឈាង វណ្ណារិទ្ធ ក៏បានស្នើឱ្យប្រទេសកូរ៉េបន្តវិនិយោគធនធានបន្ថែមទៀត ក្នុងការគាំទ្ររដ្ឋសមាជិកអាស៊ាន ក្នុងការកសាងសមត្ថភាពនវានុវត្តន៍នៅទូទាំងវិស័យសាធារណៈ ឯកជន និងសង្គមផងដែរ៕