ព័ត៌មានជាតិ

សមាគមជនពិការ អំពាវនាវភោជនីយដ្ឋាន និងកម្មវិធីប្រគំតន្ត្រីផ្សេងៗ ផ្ដល់ឱកាសជនពិការទៅច្រៀងទទួលបានប្រាក់ចំណូលចិញ្ចឹមជីវិត

បានផុស

៤ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

លោក ចាប តូ ប្រធានសមាគមតន្ត្រីសំនៀងជនពិការ បានធ្វើការអំពាវនាវដល់ភោជនីយដ្ឋាន បៀរហ្គាឌិន និងការប្រគំតន្ត្រីផ្សេងៗ ផ្ដល់ឱកាសដល់ជនមានពិការភាព បានទៅច្រៀង ដើម្បីឱ្យពួកគេទទួលបានប្រាក់ចំណូលចិញ្ចឹមខ្លួនឯង និងគ្រួសារ កាន់តែប្រសើរ និងឈប់ច្រៀងតាមភ្លើងស្តុបនានាជាបន្តទៀត ដែលធ្វើឱ្យប៉ះពាល់ដល់សង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកម្មវិធីប្រឡងចម្រៀងជនមានពិការភាពពានរង្វាន់ លោក ជា សុមេធី និង លោកស្រី ជា ផលគុណ វគ្គជម្រុះ ដែលមានបេក្ខជន បេក្ខនារី សរុប ១២០ រូប កាលពីថ្ងៃទី ០៧ វិច្ឆិកា លោក ចាប តូ បានបន្តថា ការបង្កើតកម្មវិធីប្រឡងចម្រៀងនេះឡើង ក្នុងគោលបំណងផ្តល់ឱកាស និងលើកទឹកចិត្តដល់ជនមានពិការភាពដែលមានទេពកោសល្យផ្នែកសិល្បៈចម្រៀង មកបញ្ចេញសមត្ថភាព ដើម្បីបានឱកាសក្លាយជាអ្នកចម្រៀងពិតប្រាកដដូចសិល្បៈទូទៅទៀតដែរ។ លើសពីនេះ វាជាការផ្ញើសារមួយទៅជនមានពិការភាពដែលច្រៀងតាមភ្លើងស្តុបនានា បោះបង់ និងងាកមកចាប់យកអាជីពចម្រៀងនេះវិញ ព្រោះថាច្រៀងតាមភ្លើងស្តុកប៉ះពាល់ដល់កិត្តិយសសេចក្ដីថ្លៃថ្នូរខ្លួនឯង គ្រួសារ សង្គម សុវត្ថិភាព និងការធ្វើចរាចរណ៍ ពិសេសអាចធ្លាក់ទៅក្នុងការជួញដូរផងដែរ។

លោក ចាប តូ បានអំពាវនាវដល់ភោជនីយដ្ឋាន និងកម្មវិធីប្រគំតន្ត្រីផ្សេងៗ ផ្ដល់ឱកាសដល់ជនមានពិការភាព បានទៅច្រៀង ដើម្បីទទួលបានប្រាក់ចំណូលចិញ្ចឹមខ្លួនឯង និងគ្រួសារ កាន់តែប្រសើរ និងឈប់ច្រៀងតាមភ្លើងស្តុបនានាជាបន្តទៀត។

លោក ប្រាក់ សុខយូ រដ្ឋមន្ត្រីស្ដីទីក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា កម្មវិធីប្រឡងចម្រៀងនេះ ជាកម្មវិធីមួយរៀបចំឡើងក្នុងគោលបំណងបង្ហាញពីការគាំទ្រគោលនយោបាយរបស់រាជរដ្ឋាភិបាលកម្ពុជា ដែលជានិច្ចកាល លោករដ្ឋមន្ត្រី និងលោកស្រី តែងតែយកចិត្តទុកដាក់ និងគាំទ្រលើកស្ទួយដល់ជនមានពិការភាព ដើម្បីធ្វើឱ្យជីវភាពរស់នៅប្រកបដោយភាពសមរម្យ មានទឹកចិត្តស្នេហាជាតិមាតុភូមិដូចជាពលរដ្ឋទូទៅដែរ និងដើម្បីផ្តល់ឱកាសជនមានពិការភាពនៅកម្ពុជា បញ្ចេញសមត្ថភាព និងទេពកោសល្យ លើវិថីសិល្បៈ សំដៅឱ្យមហាជនទូទៅបានចាប់អារម្មណ៍ និងយល់ដឹងពីស្នាដៃរបស់ពួកគាត់លើតន្ត្រីចម្រៀង ប្រពៃណី សម័យ ពិសេសជំរុញលើកទឹកចិត្តដល់ពួកគាត់ឱ្យបន្តខិតខំប្រឹងប្រែង ដើម្បីធ្វើឱ្យជីវិតកាន់តែប្រសើរ និងមានក្តីសង្ឃឹមតាមរយៈការប្រឡងចម្រៀងនេះ៕

អត្ថបទ ៖ សំអឿន