ព័ត៌មានជាតិ

ដើមខែវិច្ឆិកា តម្លៃស្វាយកែវរមៀតខេត្តកំពង់ស្ពឺធ្លាក់ថ្លៃ មន្រ្តីជំនាញលើកមកពីកត្តាចម្បងចំនួន ២

បានផុស

៤ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

លោក ជូ សារឹម ប្រធានការិយាល័យអភិវឌ្ឍន៍សហគមន៍កសិកម្មខេត្តកំពង់ស្ពឺបានឱ្យកម្ពុជាថ្មីដឹងនៅថ្ងៃទី០៨ ខែវិច្ឆិកា នេះថា នៅសប្តាហ៍ទី១ និងទី២ ដើមខែវិច្ឆិកានេះ តម្លៃស្វាយកែវរមៀតខុសរដូវនៅក្នុងខេត្តកំពង់ស្ពឺបានធ្លាក់ថ្លៃ ដោយសារតែប្រឈមនឹងកត្តាចម្បងចំនួន ២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជូ សារឹម បានលើកកត្តាចម្បងដែលធ្វើឲ្យតម្លៃផ្លែស្វាយធ្លាក់ថ្លៃ ទី១ ដោយសារបញ្ហាអាកាសធាតុប្រែប្រួល ក្តៅ សើម ភ្លៀង ធ្វើឱ្យផ្លែស្វាយផ្កាជ្រុះ ពណ៌ផ្លែស្វាយខូចសម្បុរមិនល្អ និងទី២ ដោយសារឈ្មួញក្នុងស្រុក និងក្រៅស្រុក បញ្ជាទិញស្វាយដែលត្រូវស្តង់ដាទីផ្សារប៉ុណ្ណោះ។

លោក ជូ សារឹម បានលើកពីតម្លៃផ្លែស្វាយដែលមានគុណភាពស្តង់ដា ក្នុងមួយគីឡូអាចលក់បានតម្លៃចន្លោះពី ៨០០ រៀល ទៅ ១ ១០០ រៀល ខណៈផ្លែស្វាយអន់ពណ៌ ដឹកដល់រោងចក្រតម្លៃចន្លោះពី ៦០០ រៀល ទី ៧០០ រៀលក្នុងមួយគីឡូ។

ជាមួយគ្នានេះ លោក តុប សុភារៈ ប្រធានការិយាល័យ កសិឧស្សាហកម្មខេត្តកំពង់ស្ពឺក៏ឱ្យដឹងប្រហាក់ប្រហែលគ្នាដែរថា ស្វាយកែវរមៀតខុសរដូវឆ្នាំនេះធ្លាក់ថ្លៃ ដោយសារប្រឈមបញ្ហាអាកាសធាតុផង និងតម្រូវការទីផ្សារផង។

កសិករដាំស្វាយរំពឹងទៅលើទីផ្សារទាំងការនាំចេញក្នុងស្រុក និងក្រៅស្រុក ប៉ុន្តែដោយសារឆ្នាំនេះតម្រូវការទីផ្សារខាងក្រៅទាបជាងបរិមាណកសិករប្រមូលផលបាន ទើបធ្វើឱ្យតម្លៃស្វាយមានការធ្លាក់ចុះបែបនេះ។ នេះបើតាមលោក តុប សុភារៈ។

សម្រាប់តម្លៃ លោក តុប សុភារៈ បានបញ្ជាក់ថា បើកសិករដឹកដល់រោងចក្រផ្ទាល់ អាចទទួលបានតម្លៃចន្លោះពី ៦០០ រៀល ទៅ ៧០០ រៀលក្នុងមួយគីឡូ ខណៈតម្លៃទិញដល់ចម្ការអាចបានត្រឹម ៤០០ រៀលក្នុងមួយគីឡូប៉ុណ្ណោះ។

ប្រសិនតម្លៃស្វាយនៅតែធ្លាក់ចុះបែបនេះ លោក តុប សុភារៈ បានណែនាំដល់កសិករគួរសហការជាមួយរោងចក្រកែច្នៃស្វាយក្នុងស្រុក ដើម្បីចងក្រងទៅជាសមាគមសម្រាប់លក់ឱ្យរោងចក្រដើម្បីរក្សាតម្លៃឲ្យមានស្ថេរភាព។

ខេត្តកំពង់ស្ពឺមានផ្ទៃដីដាំដុះស្វាយកែវរមៀតសរុបប្រមាណជាង ៦ ម៉ឺនហិតា ដែលផ្ទៃដីហុចផលមាន ៥ ម៉ឺនហិតា ក្នុងនោះស្រុកដែលដាំដុះស្រាយច្រើនជាងគេមាន ២ ស្រុក គឺស្រុកឱរ៉ាល់ និងស្រុកភ្នំស្រួច៕