ព័ត៌មានជាតិ

សម្តេច ម៉ែន សំអន ៖ ម្លប់សន្តិភាព ជំរុញពលរដ្ឋគ្រប់ៗ រូប មានឱកាសប្រកបមុខរបរ និងធ្វើបុណ្យទានតាមសទ្ធាជ្រះថ្លារៀងខ្លួន

បានផុស

៥ ខែ មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានថ្លែងថា ម្លប់សន្តិភាពបានជំរុញឲ្យពលរដ្ឋគ្រប់ៗ រូប មានឱកាសធ្វើបុណ្យទានតាមសទ្ធាជ្រះថ្លា និងប្រកបមុខរបរទៅតាមលទ្ធភាពរៀងៗ ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈពេលផ្តើមគំនិត រួមជាមួយ លោកកិត្តិបរិរក្សបណ្ឌិត ហោ ណាំហុង ឧត្តមប្រឹក្សាផ្ទាល់ព្រះមហាក្សត្រ និងលោកជំទាវ, លោកជំទាវ អាន្នី សុខអាន ឧបាសក ឧបាសិកា និងអាចារ្យគណៈកម្មការវត្តទួលសង្កែ បានរៀបចំពិធីសូត្រមន្ត នៃអង្គកឋិនទាននៅវត្តទួលសង្កែ នៅរសៀលថ្ងៃសុក្រ ៨ កើត ខែកត្តិក ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី ៨ ខែវិច្ឆិកា ឆ្នាំ ២០២៤។

សម្តេចកិត្តិសង្គហបណ្ឌិត ម៉ែន សំអន ថ្លែងថា យើងមានអ្វីៗ គ្រប់បែបយ៉ាងដូចសព្វថ្ងៃនេះ ព្រោះមានម្លប់សន្តិភាពដែលបានមកដោយកម្រនិងលំបាកបំផុតដោយលះបង់អាយុជីវិត សាច់ស្រស់ឈាមស្រស់របស់ប្រមុខដឹកគណបក្សប្រជាជនកម្ពុជាគ្រប់ជាន់ថ្នាក់តស៊ូរំដោះជាតិពន្លត់ភ្លើងសង្គ្រាមបានទាំងស្រុងទម្រាំមានថ្ងៃនេះ។ សន្តិភាពបានជំរុញឲ្យពលរដ្ឋគ្រប់ៗ រូប មានឱកាសប្រកបមុខរបរ និងធ្វើបុណ្យទានតាមសទ្ធាជ្រះថ្លារៀងខ្លួន។ ដូចនេះហើយយើងទាំងអស់គ្នា ត្រូវតែបន្តថែរក្សាការពារសន្តិភាពឲ្យបានគង់វង្សជារៀងរហូតទៅ។

សូមបញ្ជាក់ថា អង្គកឋិនទានសាមគ្គីនេះ មានកម្មវិធីដូចជា ល្ងាចនេះរៀបចំពិធីសូត្រមន្ត ហើយព្រឹកឡើងថ្ងៃទី ៩ ខែវិច្ឆិកា ឆ្នាំ ២០២៤ នឹងដង្ហែ នៃអង្គកឋិនទានសាមគ្គី ទៅវេរប្រគេនព្រះសង្ឃ ដែលគង់ចាំព្រះវស្សាអស់ត្រីមាស ក្នុងពុទ្ធសីមា ដើម្បីប្រមូលបច្ច័យកសាងសមិទ្ធផលនានា ទុកជាគរុភណ្ឌក្នុងវត្តទួលសង្កែ ដែលស្ថិតនៅខណ្ឌឫស្សីកែវ រាជធានីភ្នំពេញ។

កឋិនទាន គឺជាបុណ្យមួយមានតែក្នុងព្រះពុទ្ធសាសនាតែប៉ុណ្ណោះ ជាទានមានមកតាមផ្លូវព្រះវិន័យ ហើយក៏ជាកាលទានដ៏ពិសេសមួយមានកំណត់ពេលវេលាច្បាស់លាស់ ពុំមែនចេះតែធ្វើនៅពេលណាក៏បានតាមចិត្តនោះឡើយ គឺរយៈកាលទទួលកឋិនទានក្តី និងរយៈកាលធ្វើកឋិនទានក្តី អាចធ្វើបានក្នុងសម័យតែ ១ ខែគត់ (២៩ ថ្ងៃ) ចាប់ពីថ្ងៃ ១ រោច ខែអស្សុជ ដល់ថ្ងៃ ១៥ កើត ខែកត្តិក។

ពាក្យថា កឋិនសព្ទនេះ បើតាមអត្ថកថាលោកសំដៅយកពុទ្ធដីកា ដែលព្រះសម្មាសម្ពុទ្ធទ្រង់សម្តែងបញ្ញត្តិទុកមកថាការប្រជុំរួបរួមរូបធម៌ និងនាមធម៌ហៅថាកឋិន។ កឋិននេះ លោកពន្យល់ថា មកអំពីកថធាតុដែលប្រព្រឹត្តទៅក្នុងអត្ថន័យពីរយ៉ាងគឺ ៖ ១.ប្រែថារស់បានដោយកម្រ សមដូចវិគ្គហថាកថតិ កិច្ឆេន ជីវតីតិ> កថិនោ សភាវៈឯណារស់នៅបានដោយកម្រ សភាវៈនោះហៅថាកឋិន ព្រោះលោកប្រៀបថាដូចឈើស្នឹង ដែលបុគ្គលកាត់ចេញចាកដើម ហើយយកទៅបោះភ្ជាប់នឹងផែនដី រមែងដុះលូតលាស់ ឬរស់នៅបានដោយកម្រយ៉ាងណា! ឯកិច្ចដែលនឹងកើតឡើង ឬតាំងឡើងជាកឋិនពេញទី ក៏បានដោយកម្រជាពន់ពេកណាស់ក៏យ៉ាងនោះដែរ។ ២.ប្រែថាពោលសរសើរ ព្រោះចីវរទានដែលយើងបានកសាងជាកឋិននេះ ជាទានវិសេសជាងទានដទៃៗ ដែលព្រះអរិយទាំងឡាយមានព្រះសម្ពុទ្ធជាប្រធាន តែងពោលសរសើរថាជាទានវិសេសអាចរួបរួម ឬសង្គ្រោះទុក្ខនូវអានិសង្ស ៥ យ៉ាង របស់ភិក្ខុអ្នកក្រាលគ្រង មិនឲ្យទៅក្នុងទីដទៃបានសមដូចវិគ្គហ ថាបញ្ច អានិសំសេ អញ្ញត្ថ គន្តុំ អទត្វ កថតិ សង្គណ្ហាតីតិ> កថិនំ ធម្មជាតិឯណាក្រៀកទុក ឬសង្គ្រោះទុកនូវអានិសង្សទាំង ៥ មិនឲ្យទៅក្នុងទីដទៃបាន ធម្មជាតិនោះឈ្មោះថា កឋិន។ ក្នុងវត្តមួយបើការចាំវស្សាគ្មានភិក្ខុសោះក៏មិនអាចហែកឋិនចូលដែរ ព្រោះសាមណេរគ្មានសិទ្ធិទទួលក្រាលគ្រងកឋិនទេ លុះត្រាតែយ៉ាងហោចបំផុតត្រូវមានភិក្ខុ ១ អង្គ ដែរ ហើយដែលបានចាំវស្សាអស់ ៣ ខែ បានត្រឹមត្រូវ ទើបអាចហែកឋិនចូលបាន។ បព្វជិតក៏ដោយ គ្រហស្ថក៏ដោយ អាចធ្វើកឋិនបានដូចគ្នា។ ព្រះពុទ្ធជាម្ចាស់ទ្រង់អនុញ្ញាតឲ្យភិក្ខុសង្ឃទទួលកឋិន ហើយធ្វើកឋិនត្ថារកិច្ច គឺការក្រាលគ្រង និងអនុមោទនាកឋិននោះ ដើម្បីសម្រាលនូវទុក្ខលំបាកក្នុងការប្រើប្រាស់បច្ច័យមួយចំនួនដូចជា ត្រៃចីវរ អាហារភោជន និងលាភសក្ការៈផ្សេងៗ ដែលកើតមានដល់សង្ឃប៉ុណ្ណោះ។

ការរៀបចំផ្ដួចផ្ដើមអង្គកឋិនទាននេះ ក៏បានឧទ្ទិសជូននូវបុណ្យកុសលទាំងឡាយ ដែលកើតពីសទ្ធាជ្រះថ្លាធ្វើបុណ្យកឋិនទានសាមគ្គីនេះ ជូនចំពោះជីដូនជីតា ញាតិកាទាំងប្រាំពីរសន្តានដែលបានចែកឋាន ទៅកាន់លោកខាងមុខ ព្រមទាំងបានជូននូវបុណ្យកុសលចំពោះ ឯកឧត្តម លោកជំទាវ លោកឧកញ៉ា លោក លោកស្រី និងពុទ្ធបរិស័ទចំណុះជើងវត្ត ជាអ្នកផ្តើមបុណ្យ សូមបានសុខ ចម្រុងចម្រើនជារៀងរហូតទៅ៕

អត្ថបទ ៖ វិមាន