ផ្លូវលំប្រវែង ៥០គីឡូម៉ែត្រ ពីទីរួមខេត្តមណ្ឌលគិរី ទៅឃុំចុងផ្លាស់ ត្រូវបានជួសជុលឡើងវិញ

ផ្លូវលំមួយខ្សែប្រវែងប្រមាណ ៥០គីឡូម៉ែត្រ ពីក្រុងសែនមនោរម្យ ឆ្ពោះទៅឃុំចុងផ្លាស់ ស្រុកកែវសីមា ខេត្តមណ្ឌលគិរី ត្រូវបានមន្ទីរអភិវឌ្ឍន៍ជនបទ ខេត្តមណ្ឌលគិរី សហការជាមួយក្រុមហ៊ុនរ៉ែមាស Renaissance ហៅកាត់ថាក្រុមហ៊ុនអូរខ្វាវ ចាប់ផ្ដើមជួសជុលឡើងវិញ កាលពីថ្ងៃទី២ ខែវិច្ឆិកាកន្លងទៅ។

ផ្លូវមួយខ្សែនេះ ជាគម្រោងរបស់ ក្រសួងអភិវឌ្ឍន៍ជនបទ ឆ្លងកាត់ឃុំសង្កាត់ចំនួន៤ ពីក្រុងសែនមនោរម្យ គឺមានសង្កាត់មនោរម្យ សង្កាត់រម្យនា ឃុំមេម៉ង និឃុំចុងផ្លាស់។ ផ្លូវនេះ ជាមធ្យោបាយធ្វើដំណើរតែមួយគត់សម្រាប់ប្រជាពលរដ្ឋដែលធ្វើដំណើទៅមក ពីក្រុងសែនមនោរម្យឆ្ពោះទៅឃុំសង្កាត់ ទាំង៤នោះ។

ក្រុមការងារជួសជុល បានបញ្ជាក់ថា គម្រោងជួសជុល រំពឹងថាបញ្ចប់ក្នុងពេលឆាប់ៗ ពោលគឺមុនរដូវរស្សាមកដល់ ដោយចាប់ផ្ដើមពីការចាក់ចាក់ថ្ម និងក្រួសក្រហម នៅកន្លែងដែលរងការខូចខាតខ្លាំង។

ប្រជាពលរដ្ឋដែលរស់នៅឃុំសង្កាត់ទាំងបួន បានបង្ហាញអារម្មណ៍សប្បាយរីករាយ ពេលឃើញមន្រ្តីជំនាញចាប់ផ្ដើមជួសជុលស្ថាបនាផ្លូវនេះឡើងវិញ ដោយសារកន្លងមក ផ្លូវមួយខ្សែនេះមានភាពលំបាកខ្លាំងណាស់ក្នុងការធ្វើដំណើរ។ ពួកគាត់ក៏រំពឹងដែរថា នាថ្ងៃអនាគត ផ្លូវនេះ នឹងអាចស្ថាបនាជាផ្លូវចាក់កៅស៊ូ ដើម្បីឲ្យកាន់តែងាយស្រួល និងមិនងាយរងការខូចខាតនារដូវវស្សា៕

អត្ថបទ៖ រៀម សុខហេង