ខេត្ត​កែប​បញ្ចប់​គម្រោង​សំខាន់ៗ​ចំនួន ៣ ​​ដើម្បី​ជំរុញ​​កំណើន​ក្នុង​មហា​អនុតំបន់មេគង្គ

ខេត្ត​កែប​ដែល​ជា​ខេត្ត​មួយ​ក្នុង​ចំណោម​ខេត្ត​ទាំង ៤ មាន​ភូមិសាស្រ្ត​ជាប់​សមុទ្រ បាន​សម្រេច​ការ​អនុវត្ត​គម្រោង​​ហេដ្ឋារចនាសម្ព័ន្ធ​ទេសចរណ៍​សំខាន់ៗ​ចំនួន ៣ សម្រាប់​ជំរុញ​កំណើន​ប្រកប​ដោយ​បរិយាប័ន្ន​ក្នុង​មហាអនុតំបន់មេគង្គ។

ថ្លែង​ក្នុងពិធីសម្ពោធដាក់ឱ្យប្រើប្រាស់ជាផ្លូវការ “វិថីតេជោសន្តិភាពឆ្នេរអង្កោលប្រវែងសរុប ១២.៦៤៥ ម៉ែត្រ” នៅ​ខេត្ត​កែប​នៅ​ព្រឹកមិញនេះ លោក ប៉េង ពោធិ៍នា រដ្ឋមន្រ្តី​ក្រសួង​សាធារណការ​និង​ដឹកជញ្ជូន​បាន​គូស​បញ្ជាក់​ថា ​នៅក្នុងក្របខណ្ឌនៃ​​ការអនុវត្តគម្រោងហេដ្ឋារចនាសម្ព័ន្ធ​ទេសចរណ៍​ សម្រាប់កំណើនប្រកប​ដោយ​បរិយាប័ន្ន​ក្នុង​មហាអនុតំបន់មេគង្គ ជំហាន​ទី​២ ក្រសួងសាធារណការ និង ដឹកជញ្ជូន បានបញ្ចប់​ការងារ​សាងសង់​អនុគម្រោង​សំខាន់ៗ​នៅខេត្តកែបចំនួន ៣ រួមមាន៖ ១)​អនុគម្រោងសាងសង់​ទីលានទុក​ដាក់សំរាម​ក្រុងកែប ដែលមានសមត្ថភាពផ្ទុកប្រមាណជាង ៧២​ ម៉ឺនតោន, ២)អនុគម្រោង​សាងសង់​កំពង់ផែ​ទេសចរណ៍​កោះទន្សាយ, និង ៣) អនុគម្រោងសាង​សង់ផ្លូវប្របឆ្នេរកែប (វិថី​តេជោ​សន្តិភាព​ឆ្នេរអង្កោល) ដែលកំពុង​រៀបចំពិធីសម្ពោធ​នា​ឱកាស​នេះ។

គម្រោងទាំង៣ កំពុងចូលរួមចំណែកយ៉ាងសំខាន់ក្នុងការអភិវឌ្ឍ​និងប្រែក្លាយ​ខេត្តកែប ឱ្យទៅជាខេត្តនៃគោលដៅទេសចរណ៍​របស់​ព្រះរាជាណាចក្រ​កម្ពុជាស្របតាម “ផែនការមេអភិវឌ្ឍន៍ទេសចរណ៍ខេត្តកែបឆ្នាំ២០២៣-២០៣៥” របស់​រាជរដ្ឋាភិបាលកម្ពុជា។ នេះបើតាមលោក ប៉េង ពោធិ៍នា បញ្ជាក់បន្ថែម។

ពាក់ព័ន្ធ​គម្រោងសាងសង់វិថីតេជោសន្តិភាព​ឆ្នេរអង្កោល លោក​ប៉េង ពោធិ៍នា​ បានបញ្ជាក់​ថា​ គឺជាអនុគម្រោងនៃគម្រោង​ហេដ្ឋារចនាសម្ព័ន្ធ​ទេសចរណ៍​សម្រាប់​កំណើន​ប្រកប​ដោយ​បរិយាប័ន្ន​ក្នុង​មហាអនុតំបន់មេគង្គ​ជំហាន​ទី២ ដែល​គ្រប់គ្រង​ដោ​យក្រសួង​ទេសចរណ៍។

វិថី​តេជោសន្តិភាព​ឆ្នេរ​អង្កាលមានប្រវែង​សរុប ១២ ៦៤៥ម៉ែត្រ ​ដែល​បាន​ចំណា​យថវិកាសាងសង់​សរុបប្រមាណ ១០ លានដុល្លារអាម៉េរិក ដែលជាកម្ចីឥណទានសម្បទាន​ពី​ធនាគារ​អភិវឌ្ឍន៍អាស៊ី និងថវិកាបដិភាគមួយចំនួនរបស់រាជរដ្ឋាភិបាល សម្រាប់ការដោះស្រាយ​ផល​ប៉ះពាល់ និងពន្ធអាករផ្សេងៗ។

វិថីនេះ​លាតសន្ធឹងប្របមាត់ឆ្នេរទេសចរណ៍នៃសមុទ្រ​ខេត្ត​កែប ដែល​ភ្ជាប់ពីក្រុងកែបទៅកាន់តំបន់សហគមន៍ទេសចរណ៍ និងនេសាទនៅក្នុងឃុំអង្កោល និង​ឆ្លង​កាត់តំបន់កសិកម្ម តំបន់ស្រែអំបិល តំបន់ព្រៃកោងកាង និងតភ្ជាប់ជាមួយផ្លូវខេត្ត លេខ១៣៣២ ក្នុង​ទិសដៅ​ទៅមករវាងស្រុកដំណាក់ចង្អើរ និងច្រកលក ខេត្តកំពត (ព្រំដែនកម្ពុជា- វៀតណាម) រួមទាំង​តភ្ជាប់ជាមួយហេដ្ឋារចនាសម្ព័ន្ធខ្សែផ្លូវមួយចំនួននៅក្នុងភូមិសាស្ត្រខេត្តកែប ដើម្បីភ្ជាប់​ទៅកាន់​តំបន់​ទីប្រជុំជន តំបន់ភូមិ​ឋាន និងតំបន់ផ្សេងៗទៀតនៅក្នុងខេត្តកែបផងដែរ។

វិថីដ៏ថ្មីសន្លាង​ជា​សមិទ្ធផល​របស់​ខេត្តកែប កំពុងដើរតួនាទីជាខ្សែផ្លូវលើកសម្រស់ទេសចរណ៍ខេត្តកែបឱ្យកាន់​តែ​ស្រស់ស្អាត និងមានរបៀបរៀបរយ តាម​រយៈការបង្កើតឱ្យមានចំណតរថយន្ត ផ្លូវជិះកង់ និង​ផ្លូវ​ថ្មើរ​ជើងសម្រាប់ការដើរកម្សាន្តរបស់ប្រជាពលរដ្ឋ និងភ្ញៀវទេសចរជាតិ- អន្តរជាតិនានា។

បច្ចុប្បន្ន​ការតភ្ជាប់ហេដ្ឋារចនាសម្ព័ន្ធដឹកជញ្ជូនប្រទាក់ក្រឡាមកកាន់ខេត្តកំពត និង ខេត្តកែប ក្រៅពីផ្លូវជាតិលេខ៣ ពលរដ្ឋក៏អាចប្រើប្រាស់ផ្លូវជាតិលេខ ៣១ ផ្លូវជាតិលេខ៣៣ និង​ផ្លូវជាតិ​លេខ​៤១ ដែលត្រៀមនឹងបញ្ចប់ជាស្ថាពរនូវការស្ថាបនាកែលម្អ ក្នុងពេល ឆាប់ៗខាងមុខនេះ៕