ព័ត៌មានជាតិ

អាជ្ញាធរខណ្ឌច្បារអំពៅ ដាក់កម្លាំងរៀបចំសណ្ដាប់ធ្នាប់ មុនពិធីបុណ្យអុំទូក

បានផុស

៣ ខែ មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

លោក ចេង មុនីរ៉ា អភិបាលខណ្ឌច្បារអំពៅ បានដាក់បទបញ្ជាទៅតាមបណ្ដាសង្កាត់ទាំង ៨ ក្នុងខណ្ឌច្បារអំពៅ រាជធានីភ្នំពេញ ឲ្យដាក់កម្លាំងចុះរៀបចំសណ្ដាប់ធ្នាប់មុនថ្ងៃបុណ្យអុំទូក ដើម្បីកុំឲ្យកកស្ទះចរាចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខណ្ឌច្បារអំពៅ បានឲ្យដឹងថា ទីតាំងសំខាន់ៗ នៅថ្ងៃបុណ្យអុំទូកដែលត្រូវដាក់កម្លាំងទប់ស្កាត់រថយន្តធុនធំចូលរាជធានីភ្នំពេញគឺមានផ្លូវជាតិលេខ ១ កែងផ្លូវចូលទៅក្រុមហ៊ុន ស្រាបៀថៃហ្គឺរ គឺរថយន្តធំត្រូវបញ្ចៀសទៅឆ្លងស្ពានព្រែកសំរោងឆ្ពោះទៅក្រុងតាខ្មៅខេត្តកណ្តាល។ ដោយឡែកទីតាំង ២ ទៀត គឺផ្លូវចូលទៅទីក្រុងកោះនរា និងគល់ស្ពានព្រះមុនីវង្សចាស់។

ជាក់ស្ដែងនៅថ្ងៃទី ១២ ខែវិច្ឆិកា នេះ គេសង្កេតឃើញកម្លាំងប្រជាការពារសង្កាត់ច្បារអំពៅទី ២ បានចុះរៀបចំសណ្ដាប់ធ្នាប់លើកំណាត់ផ្លូវជាតិលេខ ១ ត្រង់ចំណុចគល់ស្ពានព្រះមុនីវង្សចាស់។

លោក ជូ វ៉ាន់នី ជំនួយការសាលាសង្កាត់ច្បារអំពៅទី ២ បានឲ្យដឹងថា ការរៀបចំសណ្ដាប់ធ្នាប់នៅគល់ស្ពានព្រះមុនីវង្សចាស់ ធ្វើឡើងរាល់ថ្ងៃ ខណៈប្រជាពលរដ្ឋមកពីតំបន់ជាយក្រុងយកបន្លែមកបោះឲ្យម៉ូយ ប៉ុន្តែនៅថ្ងៃបុណ្យអុំទូកខាងមុខនេះ អាជ្ញាធរសុំឲ្យពលរដ្ឋរួសរាន់រើអីវ៉ាន់លក់ដូរលើចិញ្ចើមផ្លូវ ព្រោះវានាំឲ្យប៉ះពាល់ដល់ការធ្វើដំណើរដែលជាច្រកសំខាន់៕

អត្ថបទ ៖ នរា