ព័ត៌មានជាតិ

កន្លែងស្នាក់នៅសម្រាប់កីឡាករចំណុះទូកង ២ ទីតាំង រៀបចំរួចរាល់ ខណៈទូកមកពីបណ្ដាខេត្តត្រូវស្នាក់នៅ

បានផុស

៣ ខែ មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

ខណៈព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក កាន់តែខិតចូលមកដល់ នាពេលខាងមុខនេះ កន្លែងស្នាក់នៅរបស់ក្រុមកីឡាករចំណុះទូក រដ្ឋបាលរាជធានីភ្នំពេញ បានរៀបចំរួចរាល់ហើយ ដោយបែងចែកជា ២ ទីតាំង គឺ នៅម្ដុំអតីតឃ្លាំងសូគីមិច ខណ្ឌឫស្សីកែវ និង ទីតាំងនៅ OCIC ខណ្ឌជ្រោយចង្វារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃទី ១២ ខែវិច្ឆិកា ឆ្នាំ ២០២៤ នេះ រដ្ឋបាលរាជធានីភ្នំពេញ បានរៀបចំកន្លែងស្នាក់នៅសម្រាប់កីឡាករចំណុះទូករួចរាល់ហើយ ក្នុងនោះមានការរៀបចំប្រព័ន្ធទឹកភ្លើង បង្គន់អនាម័យ និងការដាក់ពង្រាយធុងសំរាមជាដើម។

សូមជម្រាបថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រារព្ធឡើងរយៈពេល ៣ ថ្ងៃ ចាប់ពីថ្ងៃទី ១៤ ១៥ ១៦ ខែវិច្ឆិកា ឆ្នាំ ២០២៤។

ព្រឹត្តិការណ៍ដ៏ធំនេះ នឹងមានទូកងចូលរួមប្រកួតប្រជែងចំនួន ៣៤៦ ទូក លើសពីឆ្នាំកន្លងទៅ ៩ ទូក មានកីឡាករចំណុះទូកជាង ២ ម៉ឺននាក់ និងប្រទីបចំនួន ៣៥ ប្រទីប ខណៈឆ្នាំ ២០២៣ មានចំនួនត្រឹមតែ ២៩ ប្រទីបប៉ុណ្ណោះ។

ដើម្បីធានានូវសុខសុវត្ថិភាពជូនប្រជាពលរដ្ឋ ក្នុងព្រះរាជពិធីបុណ្យអុំទូក កម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ នឹងរឹតបន្តឹងការចេញចូលយានយន្ត និងបង្កើនគោលដៅបញ្ចៀសចរាចរណ៍ច្រើនជាងមុន ដោយប្រើប្រាស់កងកម្លាំងជិត ៥ ពាន់នាក់។ ចំណែកបង្គន់អនាម័យសាធារណៈ បន្ទប់ទឹក ត្រូវបានដាក់ពង្រាយជាង ៣៤០ កន្លែង និងធុងសំរាមមានប្រមាណ ៤ ០០០ ធុង៕

អត្ថបទ ៖ សុភា