ព័ត៌មានជាតិ
ក្រសួងសុខាភិបាល នឹងចុះអប់រំផ្សព្វផ្សាយមេរោគអេដស៍ និងចែកស្រោមអនាម័យជាង ១១ ម៉ឺនស្រោម ក្នុងពិធីបុណ្យអុំទូក
ក្រសួងសុខាភិបាល នឹងចុះអប់រំផ្សព្វផ្សាយមេរោគអេដស៍ និងជំងឺអេដស៍ ព្រមទាំងចែកស្រោមអនាម័យជាង ១១ ម៉ឺនស្រោម នៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលនឹងឈានមកដល់ចាប់ពីថ្ងៃទី ១៤,១៥ និង ១៦ វិច្ឆិកា ខាងមុខនេះ។
លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ បានមានប្រសាសន៍នៅរសៀលថ្ងៃទី ១២ វិច្ឆិកា នេះថា ការរៀបចំយុទ្ធនាការអប់រំផ្សព្វផ្សាយការយល់ដឹងអំពីមេរោគអេដស៍ និងជំងឺអេដស៍ នៅក្នុងព្រះរាជពិធីបុណ្យអុំទូក បណ្តែត ប្រទីប និងសំពះព្រះខែ អកអំបុក ដែលមានមនុស្សច្រើនកុះករមកពីគ្រប់មជ្ឈដ្ឋាន គឺជាឱកាសដ៏ល្អប្រពៃណាស់ ដើម្បីបង្ហាញអំពីការយកចិត្តទុកដាក់របស់ក្រសួងសុខាភិបាលក្នុងការបង្ការ និងទប់ស្កាត់ការចម្លងមេរោគអេដស៍ និងជំងឺកាមរោគ ក្នុងចំណោម យុវជន យុវតី ដែលជាកីឡាករអុំទូក ក្រុមគោលដៅ និងប្រជាពលរដ្ឋទូទៅផងដែរ ព្រោះថាមេរោគអេដស៍ និងជំងឺអេដស៍ នៅតែជាបញ្ហាគំរាមកំហែងដល់សុខភាពសាធារណៈនៅឡើយ។
លោកវេជ្ជបណ្ឌិត បានបន្តថា យុទ្ធនាការនេះ នឹងប្រព្រឹត្តទៅរយៈពេលចំនួន ៤ ថ្ងៃ គឺចាប់ពីថ្ងៃទី ១៣ ដល់ថ្ងៃទី ១៦ ខែវិច្ឆិកា ឆ្នាំ ២០២៤ នៅទីតាំងទីក្រុងរណបជ្រោយចង្វារ (OCIC) ដោយមានការដឹកនាំសម្របសម្រួលរបស់ក្រសួងសុខាភិបាល មជ្ឈមណ្ឌលប្រយុទ្ធនឹងជំងឺអេដស៍ សើស្បែក និងកាមរោគ និងការចូលរួមពីអង្គការដៃគូធ្វើការងារប្រយុទ្ធនឹងជំងឺអេដស៍ រួមមាន AHF, FHI360, PSI, KHANA, MHC &CWPD ដោយនឹងអនុវត្តនូវសកម្មភាពមួយចំនួនដូចជារៀបចំសារអប់រំផ្សព្វផ្សាយពីមេរោគអេដស៍ និងជំងឺអេដស៍។ រៀបចំបទសម្ភាសន៍ និងផ្សព្វផ្សាយដល់មហាជន។ រៀបចំក្បួនដើរដោយមានកាន់បដា និងរូបភាពផ្សព្វផ្សាយទាក់ទាញផ្សេងៗ រៀបចំស្តង់អប់រំផ្សព្វផ្សាយចំនួន ៥ និងចុះអប់រំតាមទីតាំងមួយចំនួន ដោយគ្រោងធ្វើការចែកស្រោមអនាម័យ ចំនួន ១១៥ ២០០ ស្រោម និងទឹករំអិលចំនួន ៤ ពាន់កញ្ចប់ ចែកប័ណ្ណព័ត៌មានអប់រំមេរោគអេដស៍ និងជំងឺអេដស៍ ចំនួន ៤៥ ៥០០ ប័ណ្ណ ផ្តល់ថ្នាំបង្ការមុន និងក្រោយពេលប្រឈម (PrEP & PEP) ចំនួន ១០០ ឈុត ចែកអាវយឺតចំនួន ៨០០ អាវ ធ្វើតេស្តរកមេរោគអេដស៍ ផ្តល់ប្រឹក្សា និងព្យាបាលជំងឺអេដស៍ និងជំងឺកាមរោគ សំណួរ និងចម្លើយ ផ្តល់វត្ថុអនុស្សាវរីយ៍អាវយឺត និងស្រោមអនាម័យ និងត្រៀមរថយន្តគិលានសង្គ្រោះ ១ គ្រឿង។
លោកវេជ្ជបណ្ឌិត រំពឹងទុកតាមរយៈយុទ្ធនាការនេះ នឹងជួយឱ្យមហាជនបានដឹងពីការយកចិត្តទុកដាក់គ្រប់កាលៈទេសៈរបស់រាជរដ្ឋាភិបាល តាមរយៈក្រសួងសុខាភិបាល ចំពោះបញ្ហាសុខភាពសាធារណៈ បញ្ជ្រាបការយល់ដឹងពីការបង្ការមេរោគអេដស៍ និងជំងឺអេដស៍ អ្នកសង្ស័យថា ផ្ទុកមេរោគអេដស៍ មកធ្វើតេស្តរកមេរោគអេដស៍ទាន់ពេលវេលា បញ្ឈប់ការរើសអើង និងមាក់ងាយអ្នកផ្ទុកមេរោគអេដស៍ ពង្រឹងកិច្ចសហប្រតិបត្តិការជាមួយអាជ្ញាធរជាតិប្រយុទ្ធនឹងជំងឺអេដស៍ និងអង្គការដៃគូក្នុងការចូលរួមបង្ការ ទប់ស្កាត់ការរីករាលដាលមេរោគអេដស៍ និងជំងឺអេដស៍ ដើម្បីជំរុញឱ្យសម្រេចគោលដៅលុបបំបាត់ការចម្លងមេរោគអេដស៍ថ្មី ស្របតាមគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ ២០២៣-២០២៨។
យោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៃក្រសួងសុខាភិបាល បានឱ្យដឹងថា ឆ្នាំ ២០២៣ កម្ពុជា ត្រូវបានគេប៉ាន់ប្រមាណថាមានអ្នកផ្ទុកមេរោគអេដស៍ប្រមាណ ៧៦ ០០០ នាក់។ ក្នុងនោះមានអ្នកជំងឺមកទទួលសេវាព្យាបាលចំនួន ៦៨ ៨០២ នាក់ និងអ្នកជំងឺសង្ស័យ ៧ ១៩៨ នាក់ នៅមិនទាន់មកទទួលសេវាព្យាបាលនៅឡើយទេ ពោលគឺជាក្រុមលាក់មុខ និងមានអ្នកឆ្លងថ្មី នៃមេរោគអេដស៍ប្រមាណ ១ ២០០ នាក់ និងស្លាប់ប្រមាណ ១ ០០០ នាក់ ក្នុង ១ ឆ្នាំ៕
អត្ថបទ ៖ សំអឿន
រដ្ឋបាលរាជធានី នឹងបិទផ្លូវឆ្លងកាត់ចំណុចប្រសព្វរវាងផ្លូវ៥៩៨ និងប្រឡាយអូរវែង ចាប់ពីថ្ងៃទី១៤ ខែកុម្ភៈ ដល់ថ្ងៃទី១៣ ខែឧសភា
ក្រុមអ្នកផលិតមាតិកាតាមបណ្ដាញសង្គម ប្រាប់ក្រុម MMO កុំបំផុសបំផុលព័ត៌មានមួលបង្កាច់ ញុះញង់ និងចោទប្រកាន់គ្មានការពិត
UNICEF ចេញសេចក្តីថ្លែងការណ៍ទាក់ទងនឹងករណីកូនប្រុស G-Devith ដោយគូសបញ្ជាក់ ២ចំណុចធំ
ក្រសួង៖ ថៃផ្ដាច់សេវា បង្ក្រាបក្រុមឆបោកតាមអនឡាញតាមព្រំដែន មិនប៉ះពាល់ការប្រើសេវាទូរស័ព្ទនៅប៉ោយប៉ែតឡើយ
សហជីព ថា បទពិសោធន៍ជាក់ស្ដែងពុំមានការកំណត់ចំនួននៃការប្រើប្រាស់សេវា ប.ស.ស នោះទេ
ហ្សេលេនស្គី៖ អ៊ុយក្រែនត្រៀមខ្លួនប្រគល់ទឹកដីដូរយកសន្តិភាពហើយ
Breaking News៖ អគ្គិភ័យកំពុងឆេះស្ថានីយប្រេងឥន្ធនៈ នៅខេត្តព្រះសីហនុ(មានវីដេអូ)
កវីនិពន្ធល្បីខាងកំណាព្យ បណ្ឌិត ជ័យ ចាប ធ្លាក់ខ្លួនឈឺធ្ងន់ចូលសង្គ្រោះបន្ទាន់
ស្ពានឆ្លងកាត់ទន្លេមេគង្គ ភ្ជាប់ទៅផ្លូវល្បឿនលឿនភ្នំពេញ-បាវិត វឌ្ឍនភាពសម្រេចបានជាង ៥%
ហេតុការណ៍បំផ្ទុះគ្រាប់បែកអត្តឃាតកក្រើកឡើងជាថ្មីនៅអាហ្វហ្គានីស្ថាន
-
សន្តិសុខសង្គម២ ថ្ងៃ ago«ចែមុំបុកល្ហុង» សង្ស័យបង្កប់សេវាកម្មផ្លូវភេទ នគរបាលចុះបង្ក្រាបឃាត់ខ្លួនមនុស្ស១១នាក់
-
សន្តិសុខសង្គម៥ ថ្ងៃ agoអ្នកកាសែតម្នាក់ត្រូវឃាត់ខ្លួនក្រោយដោះមីនតោនដឹកយកទៅឱ្យប៉ូលិស
-
ជីវិតកម្សាន្ដ៥ ថ្ងៃ agoផ្ទុះការចាប់អារម្មណ៍នឹងយុវតីម្នាក់ សំឡេងពីរោះ ច្រៀងស្រដៀងនឹងរាជិនីសំឡេងសារិកាមាស ប៉ែន រ៉ន
-
ព័ត៌មានអន្ដរជាតិ៤ ថ្ងៃ agoធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់
-
សន្តិសុខសង្គម១ សប្តាហ៍ agoBreaking News៖ អគ្គិភ័យកំពុងឆេះក្លឹបមួយកន្លែងនៅជិតវត្តឬស្សីសាញ់(មានវីដេអូ)
-
ព័ត៌មានជាតិ២ ថ្ងៃ agoករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង
-
ជីវិតកម្សាន្ដ២ ថ្ងៃ agoG-Devith ដាក់បណ្តឹងទៅ UNICEF នៅកម្ពុជា ដើម្បីលុបជាអចិន្ត្រៃយ៍គ្រប់គណនីហ្វេសប៊ុក ដែលប៉ះពាល់សិទ្ធិកុមារ តាមគ្រប់រូបភាព
-
ចរាចរណ៍៣ ថ្ងៃ agoផ្លូវ៦០ម៉ែត្រទៀត! រថយន្ដពាក់ស្លាកលេខរដ្ឋ បុករះរថយន្ដ២គ្រឿងកំពុងឈប់ចាំភ្លើងស្តុបរងការខូចខាត