ដាំបាយជិតដបសាំងមិនប្រយ័ត្ន បណ្តាលឱ្យឆេះផ្ទះអស់ ២ខ្នង នៅសង្កាត់គោកចក

នៅវេលាម៉ោង ០៩៖២០នាទី នាថ្ងៃទី១២ ខែវិច្ឆិកា ឆ្នាំ២០២៤ នេះ មានករណីអគ្គិភ័យឆេះផ្ទះប្រជាពលរដ្ឋចំនួន ២ខ្នងផ្ទះ ដែលមានទំហំ៨x១០ ម៉ែត្រ ធ្វើពីឈើប្រកសង្ក័សី ជញ្ជាំងឥដ្ឋ ស្ថិតនៅភូមិនគរក្រៅ សង្កាត់គោកចក ក្រុងសៀមរាប ខេត្តសៀមរាប។ ម្ចាស់ផ្ទះឈ្មោះ រៀល វី ភេទស្រី អាយុ ៦៧ឆ្នាំ។

សមត្ថកិច្ចបានឱ្យដឹងថា អគ្គិភ័យត្រូវបានរលត់ទាំងស្រុង នៅវេលាម៉ោង ១០៖៤០នាទី ថ្ងៃខែឆ្នាំដដែល ដោយប្រើឡានពន្លត់អគ្គីភ័យអស់ចំនួន ៤គ្រឿង (ឡានអប្សារា ១គ្រឿង ឡាននគរបាលបេតិកភណ្ឌ ១គ្រឿង និងឡានស្នងការខេត្ត ២គ្រឿង)។ ចំណែក សម្ភារៈបាត់បង់ រួមមាន ផ្ទះ ២ខ្នង ជាប់គ្នាទំហំ៨x១០ ឯកសាររដ្ឋបាល (សៀវភៅស្នាក់នៅ សៀវភៅគ្រួសារ សំបុត្រកំណើត អត្តសញ្ញាណប័ណ្ណ ឆេះអស់) និងមានមនុស្សម្នាក់រងរបួសស្រាល។

សមត្ថកិច្ច បានបញ្ជាក់ថា មូលហេតុ គឺបណ្តាលមកពីម្ចាស់ផ្ទះដាំបាយជាមួយចង្ក្រានហ្កាស់ នៅក្បែរដបសាំងប្រហែល ២ម៉ែត្រ ទើបបង្កឱ្យមានការផ្ទុះចង្ក្រានហ្គាស ឆេះដបសាំង និងឆេះផ្ទះតែម្ដង៕

ដោយ៖ជុន កុសល