ឱកាសបុណ្យអុំទូកឆ្នាំនេះ ភ្ញៀវទេសចរជាតិ និងអន្តរជាតិប្រមាណជាង៧ពាន់នាក់ទៅលេងកម្សាន្តនៅក្នុងស្វាយរៀង

នៅក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ដែលប្រព្រឹត្តិទៅកាលពីចុងសប្តាហ៍នេះ មានភ្ញៀវទេសចរជាតិ និងអន្តរជាតិ បានទៅដើរលេងកម្សាន្ត នៅក្នុងខេត្តស្វាយរៀង ប្រមាណជាង៧ពាន់នាក់។ នេះបើតាមមន្ទីរទេសចរណ៍ខេត្តស្វាយរៀង។

លោក វ៉ាន សារ៉ាត ប្រធានមន្ទីរទេសចរណ៍ខេត្តស្វាយរៀង បានឱ្យដឹងថា ភ្ញៀវទេសចរ និងប្រជាពលរដ្ឋ ទៅលេងកម្សាន្តតាមរមណីយដ្ឋាន និងគោលដៅទេសចរណ៍នានាក្នុងខេត្តស្វាយរៀង នាឱកាសព្រះរាជពិធីបុណ្យអុំទូក បណ្តែតប្រទីប និងអកអំបុក សំពះព្រះខែ  ឆ្នាំ២០២៤ ដែលមានរយៈពេល៣ថ្ងៃ (១៤-១៥-១៦) ខែវិច្ឆិកា ឆ្នាំ២០២៤ មានចំនួនសរុបប្រមាណ៧ ០២០នាក់ស្រី ៣៥០០នាក់ ក្នុងនោះ មានភ្ញៀវទេសចរបរទេសចំនួន ៦៧នាក់ មានការកើនឡើងចំនួន១ ៨៨០ នាក់ ស្មើនឹង ៣៦.៥៧% បើប្រៀបធៀបនឹងឆ្នាំ២០២៣ មានចំនួន៥ ១៤០ នាក់។

លោកប្រធានមន្ទីរទេសចរណ៍ខេត្ត បានបន្តថា ក្រោមការដឹកនាំពីសំណាក់លោក ប៉េងពោធ៏សា អភិបាលខេត្ត ការងាររក្សាសន្តិសុខ សណ្តាប់ធ្នាប់ និងរៀបរយសាធារណៈ គឺកងកម្លាំង និងគ្រប់ផ្នែកដែលពាក់ព័ន្ធ រក្សាបាននូវសន្តិសុខសណ្តាប់ល្អ ពុំមានបញ្ហាអ្វីកើតឡើងគួរឱ្យកត់សម្គាល់នោះទេ៕

ដោយ៖ ភក្ដី