សម្ដេចធិបតី៖ កម្ពុជាត្រៀមខ្លួនរួចជាស្រេច ក្នុងការផ្ដល់ឱ្យសន្តិភាពទៅប្រទេសទូទាំងតំបន់

«កម្ពុជាត្រៀមខ្លួនជាស្រេច ដើម្បីចូលរួមចំណែកដល់សន្តិភាពនៅទូទាំងតំបន់របស់យើង។»។ នេះការថ្លែងរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅក្នុងកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) នៅរសៀលថ្ងៃទី១៨ វិច្ឆិកា ២០២៤ នៅខេត្តសៀមរាប។

ក្នុងនាមកម្ពុជា ជាប្រទេសមួយដែលធ្លាប់ជួបវិបត្តិសង្រ្គាមអូសបន្លាយរាប់សិបទសវត្សរ៍ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអះអាងប្រាប់សមាជិក (IDC-CDI) ថា កម្ពុជា បានប្រឹងប្រែងស្ដារសន្តិភាពពេញលេញឡើងវិញ ក្នុងពេលជាង២ទសវត្សរ៍ចុងក្រោយ  ដោយទទួលបានវិបុលភាពរហូតមកដល់ពេល​បច្ចុប្បន្ន តាមរយៈការធ្វើសេរីភាវូបនីយកម្មសេដ្ឋកិច្ច និងការធ្វើសមាហរណកម្មក្នុងសេដ្ឋកិច្ចពិភពលោក។

ស្របពេលកម្ពុជា នឹងធ្វើជាម្ចាស់ផ្ទះរៀបចំ កិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៅចុងខែវិច្ឆិកា នេះ សម្ដេចធិបតី ហ៊ុន ម៉ាណែត បានចាត់ទុកថា កិច្ចប្រជុំនេះ គឺជាសក្ខីភាពមួយ ដែលស្ដែងឱ្យឃើញពីការងើបឡើងវិញឱ្យកាន់តែរឹងមាំ និងភាពធន់ជាងមុនរបស់កម្ពុជា ពីប្រទេសធ្លាប់តែរងគ្រោះដោយសារសង្គ្រាម ទៅជាប្រទេសឈានមុខក្នុងបុព្វហេតុសន្តិភាព និងជាប្រទេសដែលពិភពលោកទទួលស្គាល់ថាប្រទេសសកម្មបំផុតមួយក្នុងវិស័យបោសសម្អាតមីន និងជាប្រទេសដែលខិតខំតស៊ូមតិ ដើម្បីសកម្មភាពមីន។

សូមបញ្ជាក់ដែរថា បច្ចុប្បន្ន អង្គការអ្នកប្រជាធិបតេយ្យនិយមកណ្តាលអន្តរជាតិ CDI មានសមាជិកជាង​ ១០៩គណបក្ស មកពី ៨៣ប្រទេស ដែលមានមនោគមវិជ្ជានយោបាយនិយមកណ្តាល មកពីទ្វីបអឺរ៉ុប អាមេរិកឡាទីន អាមេរិកខាងជើង អាហ្វ្រិក និងអាស៊ីប៉ាស៊ីហ្វិក។

គណបក្សប្រជាជនកម្ពុជា បានចូលជាសមាជិកពេញសិទ្ធិរបស់ CDI កាលពីខែមេសា ឆ្នាំ២០១៦ ហើយត្រូវបានបោះឆ្នោតជាអនុប្រធានអង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែកក្កដា ឆ្នាំ២០១៨ ចំនួន ៣អាណត្តិមកហើយ៕

ដោយ៖ង៉ិល ណារ៉ាត់