លោក ប៉ែន បូណា៖ សម្តេចធិបតី ហ៊ុន ម៉ាណែត ជាមេដឹកនាំដែលមានទស្សនវិស័យវែងឆ្ងាយ និងប្រាកដប្រជា

លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា អះអាងថា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមេដឹកនាំជំនាន់ថ្មីមួយរូប ដែលមានទស្សនវិស័យវែងឆ្ងាយ និងពេញទៅដោយភាពប្រាកដប្រជា។ លោក ប៉ែន បូណា លើកឡើងដូច្នេះ នៅក្នុងវេទិកាសារព័ត៌មានលើកទី៥ ស្តីពី «សន្តិភាពជាគ្រឹះទ្រទ្រង់ដំណើរឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០» ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលកម្ពុជា នៅថ្ងៃទី១៨ ខែវិច្ឆិកា ឆ្នាំ២០២៤។

លោក ប៉ែន បូណា សង្កត់ធ្ងន់យ៉ាងដូច្នេះ ៖«យើងអាចយល់បានថា សម្តេចធិបតីជាមេដឹកនាំដែលមានទស្សនវិស័យវែងឆ្ងាយ និងប្រាកដប្រជាណាស់​គួរឱ្យកោតស្ញប់ស្ញែង។»។

លោក ប៉ែន បូណា លើកឡើងដូច្នេះ ដោយផ្អែកលើសមិទ្ធផលការងារដែលសម្ដេចធិបតី ហ៊ុន ម៉ាណែត សម្រេចបានយ៉ាងច្រើន នាពេលកន្លងមក និងជាពិសេសនាពេលថ្មីនេះ ដើម្បីលុបបំបាត់ភាពមន្ទិលសង្ស័យទាំងឡាយអំពីបូរណភាពទឹកដី​ចេញពីក្នុងសតិអារម្មណ៍ប្រជាពលរដ្ឋខ្មែរ ក៏ដូចជាដកអាវុធចេញពីដៃរបស់ក្រុមប្រឆាំងជ្រុលនិយម​ដែលតែងតែលើកយកបញ្ហាទឹកដីដែលជារឿងដ៏រសើបដើម្បីបំបែកបំបាក់ខ្មែរ បង្កជម្លោះផ្ទៃក្នុងរវាងខ្មែរនិងខ្មែរ ដើម្បីគ្រាន់តែកេងចំណេញនយោបាយ សម្តេចធិបតីលោកក៏បានរកឃើញវិធីសាស្ត្រដ៏មានប្រសិទ្ធភាពមួយនោះគឺ​ការ​រៀបចំ​ដំណើរទស្សនកិច្ច​កម្សាន្ត​របស់ប្រជាពលរដ្ឋទៅកាន់​តំបន់ព្រំដែន។

លោក ប៉ែន បូណា​ ពន្យល់ថា មូលហេតុដែលសម្ដេចធិបតីរៀបចំ ដំណើរទស្សនកិច្ច​កម្សាន្ត​របស់ប្រជាពលរដ្ឋទៅកាន់​តំបន់ព្រំដែន ពីព្រោះសម្តេចឈ្វេងយល់ថា គ្មានអ្វីច្បាស់លាស់ជាងការឃើញផ្ទាល់ភ្នែកទេ។ លោក ក៏បានរម្លឹកឡើងវិញថា មុនប្រកាសដាក់ចេញដំណើរទស្សនកិច្ចកម្សាន្ត​របស់ប្រជាពលរដ្ឋទៅកាន់​តំបន់ព្រំដែន សម្តេចធិបតី ផ្ទាល់ បានធ្វើដំណើរដោយស្ងាត់ៗដោយមិនបានប្រាប់មុនទៅកាន់តំបន់នោះជាមុនសិន។ ដែលកាលណោះ រូបលោកផ្ទាល់ រួមទាំងលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងលោក ឡាំ ជា  រដ្ឋមន្ត្រីនៃរដ្ឋលេខាធិការដ្ឋានកិច្ចការព្រំដែនបានអមដំណើរសម្តេចនៅពេលនោះ រួចក្រោយសម្តេច ក៏ប្រគល់ភារកិច្ចឱ្យអ្នកទាំងបីនាក់​រៀបចំដំណើរទស្សនកិច្ច​ទៅកាន់ប៉ែកឥសានដើម្បីនាំប្រជាពលរដ្ឋ យុវជនឱ្យបានឃើញស្ថានភាពជាក់ស្តែងតែម្តង។

តាមលោក ប៉ែន បូណា ដំណើរទស្សនកិច្ចរបស់ប្រជាពលរដ្ឋទៅកាន់ភាគឥសាន មិនត្រឹមតែបានឃើញផ្ទាល់ភ្នែកទេ តែវាក៏ជាដំណើរទស្សនកិច្ចសិក្សា ស្វែងយល់ពីការងារព្រំដែន​តាមរយៈបទបង្ហាញយ៉ាងច្បាស់លាស់ស្តីពីការងារ​ព្រំដែនដែលរាជរដ្ឋាភិបាលបានខិតខំធ្វើតាំងពីជំនាន់សម្តេចតេជោ​អតីតនាយករដ្ឋមន្ត្រីមក ដែលជាលទ្ធផល ប្រជាពលរដ្ឋនិងយុវជនដែលបានចូលរួមសុទ្ធតែសម្តែងការសប្បាយ​រីករាយនិងបានយល់ច្បាស់ពីការងារព្រំដែនហើយជឿជាក់ទាំងស្រុងដោយគ្មានមន្ទិលសង្ស័យអ្វីទាំងអស់រឿងព្រំដែននេះ៕