នាយករដ្ឋមន្ត្រី ស្នើរដ្ឋសភា​ ជ្រើសតាំងលោក ប្រាក់ សុខុន ជារដ្ឋមន្ត្រីក្រសួងការបរទេសវិញ

នៅព្រឹកថ្ងៃទី១៩ ខែវិច្ឆិកា ឆ្នាំ២០២៤នេះ គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រជុំរបស់ខ្លួន ដើម្បីពិនិត្យលើសំណើរបស់រាជរដ្ឋាភិបាល សុំផ្លាស់ប្ដូររដ្ឋមន្ត្រីក្រសួងការបរទេស ដោយលោក ប្រាក់ សុខុន ត្រូវបានជ្រើសឱ្យមកកាន់តំណែងចាស់នេះវិញ។

យោងតាមសេចក្ដីប្រកាសព័ត៌មានរបស់រដ្ឋសភា គឺគណៈកម្មាធិការអចិន្រ្តៃយ៍រដ្ឋសភា បានសម្រេចកំណត់កាលបរិច្ឆេទបន្តសម័យប្រជុំរដ្ឋសភាលើកទី៣ នីតិកាលទី៧ នៅព្រឹកថ្ងៃទី២០ ខែវិច្ឆិកា ឆ្នាំ២០២៤ ដើម្បីបោះឆ្នោតផ្តល់សេចក្តីទុកចិត្តលើការកែសម្រួល និងតែងតាំងបំពេញបន្ថែមសមាសភាពរាជរដ្ឋាភិបាលនៃព្រះរាជាណាចក្រកម្ពុជាចំនួនពីររូប។ ក្នុងនោះ លោក ប្រាក់​ សុខុន ជាឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងលោក សុខ ចិន្តាសោភា ជាឧបនាយករដ្ឋមន្ត្រី។

នេះជាការវិលមកកាន់តំណែងចាស់របស់លោក ប្រាក់ សុខុន ជាប្រមុខការទូតកម្ពុជា ដែលលោក បានកាន់តំណែងនេះតាំងពីឆ្នាំ២០១៦ រហូតដល់ឆ្នាំ២០២៣​។ នៅក្នុងអាណត្តិរាជរដ្ឋាភិបាល នីតិកាលទី៧ លោក សុខ ចិន្តាសោភា ត្រូវបានជ្រើសឱ្យកាន់តំណែងរដ្ឋមន្ត្រីក្រសួងការបរទេសនេះ ជំនួសលោក ប្រាក់ សុខុន។ ហើយបច្ចុប្បន្ន លោក ប្រាក់ សុខុន ក៏បានមកកាន់តួនាទីថ្មី ជាអនុប្រធានទី១ ព្រឹទ្ធសភា ក្រោមការដឹកនាំរបស់សម្ដេចតេជោ ហ៊ុន សែន ជាប្រធានព្រឹទ្ធសភា។

ជាការកត់សម្គាល់ នេះជាលើកទី២ហើយ ដែលរាជរដ្ឋាភិបាល នីតិកាលទី៧ បានស្នើរដ្ឋសភា​ ដើម្បីកែសម្រួលសមាសភាពរាជរដ្ឋាភិបាល ខណៈកាលពីថ្ងៃទី២០ ខែកញ្ញា ឆ្នាំ២០២៤ កន្លងទៅ រាជរដ្ឋាភិបាល នីតិកាលទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត ក៏បានស្នើ ផ្លាស់ប្តូររដ្ឋមន្ត្រីចំនួន ២រូប គឺលោក ហួត ហាក់ រដ្ឋមន្ត្រីក្រសួងអធិការកិច្ច ត្រូវមកកាន់ជារដ្ឋមន្ត្រីក្រសួងទេសចរណ៍ ជំនួសលោក សុខ សូកេន ដែលត្រូវកាន់តំណែងជារដ្ឋមន្ត្រីក្រសួងអធិការកិច្ចវិញ៕