ព័ត៌មានជាតិ

អាជ្ញាធរ បន្តចុះរៀបចំសណ្ដាប់ធ្នាប់នៅផ្សារព្រៃទា បញ្ចៀសការកកស្ទះ

បានផុស

៤ ខែ មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

នាព្រឹកថ្ងៃទី ១៩ ខែវិច្ឆិកា ឆ្នាំ ២០២៤ នេះ កម្លាំងគណៈបញ្ជាការឯកភាពខណ្ឌពោធិ៍សែនជ័យ សហការជាមួយកម្លាំងរដ្ឋបាលសង្កាត់ចោមចៅទី ៣ និងរដ្ឋបាលសង្កាត់កាកាបទី ២ បានបន្តចុះរៀបចំសណ្ដាប់ធ្នាប់តាមដងផ្លូវលេខ ៨៦ កា មុខផ្សារព្រៃទា ក្នុងភូមិព្រៃទា ១ និងភូមិត្រពាំងជ្រៃ ដើម្បីណែនាំអាជីវករដាក់លក់ឱ្យបានត្រឹមត្រូវ ជៀសវាងស្ទះចរាចរណ៍ដល់អ្នកដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយទទួលបានបទបញ្ជាពី លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ បានសហការជាមួយកម្លាំងសណ្ដាប់ធ្នាប់សង្កាត់ចោមចៅទី ៣ និងរដ្ឋបាលសង្កាត់កាកាបទី ២ ចុះរៀបចំសណ្ដាប់ធ្នាប់នៅលើដងផ្លូវ ៨៦ កា មុខផ្សារព្រៃទា ស្ថិតក្នុងភូមិព្រៃទា ១ សង្កាត់ចោមចៅទី ៣ និងភូមិត្រពាំងជ្រៃ សង្កាត់កាកាបទី ២ ខណ្ឌពោធិ៍សែនជ័យ ដើម្បីណែនាំឱ្យអាជីវករយល់ដឹងពីការដាក់លក់ដូររំលោភលើផ្លូវ។

អាជ្ញាធរបានឱ្យដឹងថា អាជីវករបានយល់ដឹងច្រើនក្នុងការដាក់លក់លើដងផ្លូវ ជៀសវាងការកកស្ទះពេលកម្មករចេញពីធ្វើការរោងចក្រនៅតំបន់នោះ តែក៏នៅមានអាជីវករមួយចំនួនតូច មិនស្តាប់ការណែនាំរបស់អាជ្ញាធរដែរ។ ជាមួយនេះ អាជ្ញាធរ បានអំពាវនាវដល់អាជីវករទាំងអស់ សូមចូលរួមសហការ និងស្តាប់ការណែនាំផង។

ជាមួយគ្នានេះដែរ អាជ្ញាធរ បានណែនាំបន្ថែមទៀត ដើម្បីឱ្យអាជីវករកាន់តែយល់ច្បាស់អំពីសណ្ដាប់ធ្នាប់។ ទន្ទឹមនោះ អាជ្ញាធរ ក៏បានអរគុណដល់អាជីវករដែលបានចូលរួមសហការ៕

អត្ថបទ ៖ សុខា