ខេត្តមណ្ឌលគិរីអាកាសធាតុ​​ចុះត្រជាក់ អាជីវករ​លក់ខោអាវរងាចាប់ផ្ដើមកាក់កប

អាកាសធាតុនៅខេត្តមណ្ឌលគិរី ចាប់ផ្ដើមចុះត្រជាក់ខ្លាំងនាប៉ុន្មានថ្ងៃចុងក្រោយនេះ ដែលធ្វើឲ្យអាជីវករលក់សម្លៀកបំពាក់ក្រាស់ៗនៅខេត្តភាគឦសានមួយនេះ ចាប់ផ្ដើមលក់ដាច់ច្រើនជាងធម្មតា។

អាជីវករម្នាក់​នៅផ្សារសែនមនោរម្យ បានឲ្យដឹងនៅថ្ងៃទី១៩ ខែវិច្ឆិកា​នេះថា កាលពីដើមខែវិច្ឆិកា មានអតិថិជនមិនសូវច្រើនប៉ុន្មានទេ ប៉ុន្តែចាប់ពីពាក់កណ្ដាលវិច្ឆិកាមក មានអតិថិជន​ច្រើនគួរសម មកទិញខោអាវរងាពីតូបរបស់លោក។

ជាទូទៅ អាកាសធាតុនៅខេត្តមណ្ឌលគិរី ចាប់ផ្ដើមចុះត្រជាក់ ពីខែវិច្ឆិកា រហូតដល់ខែមករា។ បន្ថែមលើនេះ ព្យុះមែនយី (Man-yi) ដែលកំពុងស្ថិតនៅសមុទ្រចិនខាងត្បូង ក៏ជះឥទ្ធិលលើអាកាសធាតុនៅកម្ពុជាផងដែរ ពោលគឺតំបន់ខ្ពស់រាប ដែលមានខេត្តមណ្ឌលគិរីដែរនោះ នឹងចុះត្រជាក់ដល់ ២០អង្សារសេ ចាប់ពីថ្ងៃទី១៩ ដល់ទី២១ ខែវិច្ឆិកា៕

អត្ថបទ៖ រៀម សុខហេង