ក្រោយត្រៀមក្លាយជាសមាជិករដ្ឋាភិបាល លោក ប្រាក់ សុខុន ត្រូវ គ.ជ.ប លុបឈ្មោះពីសមាជិកព្រឹទ្ធសភា

លោក ប្រាក់ សុខុន ត្រូវបាន​គណៈកម្មាធិការជាតិរៀបចំការបោះឆ្នោត (គ.ជ.ប) លុបឈ្មោះពីសមាជិកព្រឹទ្ធសភា របស់គណបក្សប្រជាជនកម្ពុជា ដើម្បីត្រៀមទៅបំពេញការងារជាសមាជិករាជរដ្ឋាភិបាលវិញ ក្នុងតំណែងជារដ្ឋមន្ត្រីក្រសួងការបរទេស។

នៅព្រឹកថ្ងៃទី២០ ខែវិច្ឆិកា ឆ្នាំ២០២៤ ស្អែកនេះ រដ្ឋសភាកម្ពុជា នឹងបើកសម័យប្រជុំពេញអង្គរបស់ខ្លួន ដើម្បីបោះឆ្នោតផ្តល់សេចក្តីទុកចិត្តលើការកែសម្រួល និងតែងតាំងបំពេញបន្ថែមសមាសភាពរាជរដ្ឋាភិបាលនៃព្រះរាជាណាចក្រកម្ពុជាចំនួនពីររូប ដែលក្នុងនោះ លោក ប្រាក់​ សុខុន បច្ចុប្បន្ន​ជា​សមាជិកព្រឹទ្ធសភាប្រចាំមណ្ឌលភូមិភាគរាជធានីភ្នំពេញ និងមានតួនាទីជាអនុប្រធានទី១​​ ​ព្រឹទ្ធសភា នឹង​ត្រឡប់​មក​កាន់​តំណែង​ចាស់​របស់​លោកវិញ ជា​រដ្ឋមន្ត្រី​ក្រសួងការបរទេស ជំនួយ​លោក សុខ ចិន្ដាសោភា ដែលទើប​​កាន់​តំណែង​នេះរយៈពេល១ឆ្នាំ​៣ខែ នៃអាណត្តិរាជរដ្ឋាភិបាលនីតិកាលទី៧។ ដោយឡែក លោក សុខ ចិន្តាសោភា នឹងនៅរក្សាតំណែងត្រឹមជាឧបនាយករដ្ឋមន្ត្រី។

យោងតាមសេចក្តីសម្រេចរបស់ គ.ជ.ប ចុះថ្ងៃទី១៩ ខែវិច្ឆិកា ឆ្នាំ២០២៤ បានសម្រេចលុបឈ្មោះលោក ប្រាក់ សុខុន ភេទប្រុស កើតថ្ងៃទី៣ ខែឧសភា ឆ្នាំ១៩៥៤ បេក្ខជនជាប់ឆ្នោតសមាជិកព្រឹទ្ធសភា នីតិកាលទី៥ ឆ្នាំ២០២៤ របស់គណបក្សប្រជាជនកម្ពុជា ចេញពីមណ្ឌលភូមិភាគទី១ រាជធានីភ្នំពេញ។

ជាមួយគ្នានេះ គ.ជ.ប ក៏បានចេញសេចក្តីសម្រេចទទួលស្គាល់លោក ង៉ែត ចដ្តាវី ភេទប្រុស កើតថ្ងៃទី១ ខែសីហា ឆ្នាំ១៩៥៣ ជាបេក្ខជនជាប់ឆ្នោតសមាជិកព្រឹទ្ធសភា នីតិកាលទី៥ ឆ្នាំ២០២៤ របស់គណបក្សប្រជាជនកម្ពុជា នៅមណ្ឌលភូមិភាគទី១ រាជធានីភ្នំពេញ ជំនួសលោក ប្រាក់ សុខុន៕