តាមរយៈវេទិកាសាធារណៈ ពលរដ្ឋ​លើកយក​បញ្ហាក្នុង​មូលដ្ឋាន ស្នើ​ឲ្យ​ក្រុមប្រឹក្សាខេត្ត​ក្រចេះជួយ​ដោះស្រាយ

ក្នុង​វេទិកាផ្សព្វផ្សាយ និងពិគ្រោះយោបល់របស់​ក្រុមប្រឹក្សាខេត្តក្រចេះ ពលរដ្ឋបានលើកយក​បញ្ហា​ប្រឈម​សំខាន់ៗ​ឲ្យអាជ្ញាធរ​ជួយ​ដោះស្រាយ​ ក្នុង​នោះ​មាន​ការសុំនិងជួសជុលផ្លូវ ការតបណ្ដាញអគ្គីសនី ការតភ្ជាប់ប្រពន្ធ័ទឹកស្អាត បញ្ហាវិវាទដីធ្លី ការកែឯកសារខុសអត្តសញ្ញាណប័ណ្ណសញ្ជាតិខ្មែរ និងសំបុត្រកំណើតជាដើម។

នៅ​ថ្ងៃទី១៩ ខែវិច្ឆិកា ឆ្នាំ២០២៤ ក្រុមប្រឹក្សាខេត្តក្រចេះ អាណត្តិទី៤ ឆ្នាំ២០២៤ បានបើកវេទិការផ្សព្វផ្សាយ និងពិគ្រោះយោបល់​ដើម្បីផ្សាព្វផ្សាយសមិទ្ធិផល ដែលរដ្ឋបាលខេត្តសម្រេចបាន ក្នុងរយៈពេលជាង ១៥ ខែ អាណត្តិទី៧ និងបង្ហាញនូវអ្វីដែលនៅសេសសល់ដល់ប្រជាពលរដ្ឋ ដែល​វេទិកាមានវត្តមានលោក ហឿ ស៊ីយ៉ែម ប្រធានប្រក្រុមប្រឹក្សាខេត្តក្រចេះ និងលោក វ៉ា ថន អភិបាលខេត្តក្រចេះ។

តាមរយៈវេទិកានេះ ផ្តល់​ឱកាស​ចំពោះបងប្អូនប្រជាពលរដ្ឋ ក្នុងការបញ្ចេញមតិយោបល់ និងការសំណូមពរបន្ថែមលើបញ្ហា​ប្រឈមនានា ដែលខ្វះចន្លោះរបស់អាជ្ញាធរមូលដ្ឋាន លើការងារបម្រើសេវាសាធារណៈ និងកិច្ចការអភិវឌ្ឍន៍ មូលដ្ឋានជាដើម។

ក្នុងឱកាលនោះ លោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ បានលើកទឹកចិត្តដល់បងប្អូនប្រជាពលរដ្ឋ និងសមាជិក សមាជិការអង្គវេទិការទាំងមូល សូមចូលរួមលើកឡើង នូវទុក្ខកង្វល់ បញ្ហាប្រឈម និងសំណូមពរនានា តាមរយៈការនិយាយផ្ទាល់មាត់ និងការសរសេរលើក្រដាស។ ដើម្បីឲ្យក្រុមប្រឹក្សាខេត្ត ធ្វើការប្រមូលផ្តុំនូវរាល់មតិយោបល់ បញ្ហាប្រឈមទាំងនោះ មកធ្វើការពិភាក្សាដោះស្រាយបំភ្លឺឱ្យបានច្បាស់លាស់ ប្រកបដោយ តម្លាភាព នឹងឈានទៅរកការដោះស្រាយ អោយបានចំគោលដៅ និងមានប្រសិទ្ធិភាព បានទាន់ពេលវេលា។

មានប្រសាសន៍ជុំវិញការលើកឡើងនិងការសំណូមពររបស់ប្រជាពលរដ្ឋ លោក វ៉ា ថន អភិបាលខេត្តក្រចេះ បានជំរុញដល់អង្គភាពស្ថាប័ន និងមន្ត្រីជំនាញពាក់ព័ន្ធត្រូវស្វែងយល់លើគ្រប់បញ្ហា និងករណីខ្លះត្រូវចុះទៅពិនិត្យជាក់ស្តែង។ ក្នុងការឆ្លើយតបទៅនឹងប្រជាពលរដ្ឋនៅតាមមូលដ្ឋាន ត្រូវធ្វើយ៉ាងណាឱ្យពលរដ្ឋ​កាន់តែមានជំនឿជឿជាក់មកលើការដឹកនាំ​របស់​អាជ្ញាធរ ជាពិសេសមេឃុំ-ចៅសង្កាត់។ ក្នុងនោះ អាជ្ញាធរខេត្ត​ត្រូវ​ធ្វើការពិនិត្យ និងតាមដានរាល់បញ្ហា ព្រមទាំង​រកដំណោះស្រាយ ដើម្បីឈានទៅធ្វើឱ្យមានការអភិវឌ្ឍរីកចម្រើនលើគ្រប់វិស័យ៕

អត្ថបទ៖ ប្រុញ វិធិន