មេទ័ពជើងគោកកម្ពុជា នឹងចូលរួមកិច្ចប្រជុំពហុមេបញ្ជាការទ័ពជើងគោកអាស៊ាន នៅហ្វីលីពីន  

នាយឧត្តមសេនីយ៍ ម៉ៅ សុផាន់ នឹងដឹកនាំប្រតិភូអញ្ជើញចូលរួមកិច្ចប្រជុំពហុមេបញ្ជាការកងទ័ពជើងគោកនៃប្រទេសសមាជិកអាស៊ាន លើកទី២៥ និងកម្មវិធីពាក់ព័ន្ធ នៅទីក្រុងថាឡាក នៅហ្វីលីពីន។

ដំណើរអញ្ជើញចូលរួមកិច្ចប្រជុំនេះ តបតាមការអញ្ជើញរបស់ឧត្តមសេនីយ៍ឯក ROY M. GALIDO មេបញ្ជាការកងទ័ពជើងគោកហ្វីលីពីន និងជាប្រធានប្តូរវេនកិច្ចប្រជុំ ចាប់ពីថ្ងៃទី២០ ដល់ថ្ងៃទី២២ ខែវិច្ឆិកា ឆ្នាំ២០២៤។ យោងតាមសេចក្ដីប្រកាសព័ត៌មានរបស់បញ្ជាការដ្ឋាននៃកងទ័ពជើងគោក គឺកិច្ចប្រជុំពហុមេបញ្ជាការកងទ័ពជើងគោកនៃប្រទេសសមាជិកអាស៊ាន លើកទី២៥ រៀបចំឡើងក្រោមប្រធានបទ «ពង្រឹងភាពជាដៃគូ និងមិត្តភាព ដើម្បីលើកកម្ពស់សន្តិភាព និងស្ថិរភាពក្នុងតំបន់»។

ក្នុងឱកាសចូលរួមកិច្ចប្រជុំនេះ លោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក នឹងជួបសម្តែងការគួរសម និងពិភាក្សាការងារជាមួយឧត្តមសេនីយ៍ឯក ROY M. GALIDO មេបញ្ជាការកងទ័ពជើងគោកហ្វីលីពីន រួមមានជំនួបទ្វេភាគីជាមួយមេបញ្ជាការកងទ័ពជើងគោក និងតំណាងមេបញ្ជាការកងទ័ពជើងគោកនៃប្រទេសសមាជិកអាស៊ានទាំងអស់ផងដែរ៕