ព័ត៌មានជាតិ

រដ្ឋមន្ត្រីមហាផ្ទៃ ដាក់ឯកសារប្រកាសទ្រព្យសម្បត្តិ និងបំណុល តាមរបប២ឆ្នាំរួចរាល់មុនកាលកំណត់

បានផុស

៤ ខែ មុន

នៅ

ថ្ងៃពុធ ២០ វិច្ឆិកា ២០២៤

ដោយ

លោក ស សុខា រដ្ឋមន្ត្រីក្រសួងមហាផ្ទៃ បានដាក់ឯកសារប្រកាសទ្រព្យសម្បត្តិ និងបំណុល តាមរបប ២ឆ្នាំ សម្រាប់ឆ្នាំ២០២៥ រួចរាល់មុនកាលកំណត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គភាពប្រឆាំងអំពើពុករលួយ (ACU) បានផ្សព្វផ្សាយនៅលើទំព័រហ្វេសប៊ុករបស់ខ្លួន ថា «នៅវេលាម៉ោង ៩:៣០នាទីព្រឹក ថ្ងៃទី២០ ខែវិច្ឆិកា ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចាត់តំណាងយកឯកសារមកបំពេញកាតព្វកិច្ចប្រកាសទ្រព្យសម្បត្តិ និងបំណុល តាមរបប ២ឆ្នាំ សម្រាប់ឆ្នាំ២០២៥ រួចរាល់មុនកាលបរិច្ឆេទកំណត់ នៅអង្គភាពប្រឆាំងអំពើពុករលួយ»។

ការទទួលឯកសារប្រកាសទ្រព្យសម្បត្តិ និងបំណុលរបស់លោក ស សុខា គឺមានវត្តមានលោក ខូយ លឹមហុង ឧបការីអង្គភាពប្រឆាំងអំពើពុករលួយ ទទួលបន្ទុកការងារប្រកាសទ្រព្យសម្បត្តិ និងបំណុល និងលោក ញីវ បញ្ញារិទ្ធ ប្រធាននាយកដ្ឋានប្រកាសទ្រព្យសម្បត្តិ និងបំណុល ព្រមទាំងក្រុមការងារវេនប្រចាំការ។

គួរជម្រាបថា ការប្រកាសទ្រព្យសម្បត្តិ និងបំណុល តាមរបប ២ឆ្នាំ សម្រាប់ឆ្នាំ២០២៥ នឹងដំណើរការក្នុងរយៈពេលមួយខែពេញ គិតចាប់ពីថ្ងៃទី០១ ដល់ថ្ងៃទី៣១ ខែមករា ឆ្នាំ២០២៥ ដោយមានក្រុមការងារនៃនាយកដ្ឋានប្រកាសទ្រព្យសម្បត្តិ និងបំណុល ចាំទទួលឯកសារប្រកាស ៧ថ្ងៃក្នុងមួយសប្ដាហ៍ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ។

យោងតាមច្បាប់ប្រឆាំងអំពើពុករលួយ សមាជិកព្រឹទ្ធសភា សមាជិករដ្ឋសភា សមាជិករាជរដ្ឋាភិបាល មន្រ្តីសាធារណៈដែលមានអាណត្តិជ្រើសតាំង សមាជិកក្រុមប្រឹក្សាជាតិប្រឆាំងអំពើពុករលួយ ប្រធាន អនុប្រធាន និងមន្រ្តីទាំងអស់នៃអង្គភាពប្រឆាំងអំពើពុករលួយ មន្រ្តីរាជការស៊ីវិល យោធា នគរបាលជាតិ និងអ្នករាជការសាធារណៈផ្សេងទៀតដែលត្រូវបានតែងតាំងដោយព្រះរាជក្រឹត្យ ឬអនុក្រឹត្យ មន្រ្តីផ្សេងទៀតដែលតែងតាំងដោយប្រកាស ហើយត្រូវបានកំណត់ឱ្យប្រកាសទ្រព្យសម្បត្តិ និងបំណុល តាមបញ្ជីដែលរៀបចំឡើងដោយអង្គភាពប្រឆាំងអំពើពុករលួយ ព្រមទាំងមន្ត្រីតុលាការ និងថ្នាក់ដឹកនាំនៃសង្គមស៊ីវិល ត្រូវប្រកាសទ្រព្យសម្បត្តិ និងបំណុលរបស់ខ្លួនរៀងរាល់ ២ឆ្នាំម្ដង នៅដើមខែមករា ហើយមិនឱ្យហូសពីថ្ងៃទី៣១ ខែមករាឡើយ។

ការប្រកាសទ្យព្យសម្បត្តិ និងបំណុល លើកដំបូង ត្រូវអនុវត្ត៣០ថ្ងៃយ៉ាងយូរក្រោយពេលចូលកាន់មុខតំណែង។ ចំណែកការប្រកាសទ្រព្យសម្បត្តិ និងបំណុល លើកទីពីរ ត្រូវធ្វើនៅខែមករា ឆ្នាំទី៣ នៃការកាន់មុខតំណែង ហើយការប្រកាសទ្យព្យសម្បត្តិ និងបំណុលចុងក្រោយត្រូវធ្វើ ៣០ថ្ងៃយ៉ាងយូរមុនពេលចាកចេញពីមុខតំណែង៕