គយរឹតបន្តឹងលើការផ្ដល់អាជ្ញាបណ្ណ ទៅឱ្យក្រុមហ៊ុននាំចូលសាច់បង្កក

ក្រុមហ៊ុនដែលចង់ប្រកបអាជីវកម្មនាំចូលមុខទំនិញសាច់បង្កកគឺតម្រូវឱ្យអនុវត្តតាមលក្ខខណ្ឌចំនួន ៤ ដែលត្រូវមានការទទួលស្គាល់ជាមុន ជាក្រុមហ៊ុនមានមានគុណវុឌ្ឍិ ដោយត្រូវដាក់​ពាក្យស្នើ​សុំ​មក​អគ្គនាយកដ្ឋានគយ និងរដ្ឋាករកម្ពុជា ឬអគ្គនាយកដ្ឋានសុខភាពសត្វ និងផលិត​កម្មសត្វ។

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា ប្រាប់កម្ពុជាថ្មីនៅថ្ងៃទី ២១ ខែវិច្ឆិកា ឆ្នាំ ២០២៤ នេះថា វិធានការហាមឃាត់ការនាំចូលសាច់បង្កកដំណាក់កាលទី២ ហាក់មិនសូវមាន​ប្រសិទ្ធ​ភាពខ្ពស់។

លោក ស៊្រុន ពៅបញ្ជាក់ថា៖ «វិធានការហាមឃាត់សាចប់បង្កកដំណាក់កាលទី២បានជិត ២ ខែហើយ ប៉ុន្តែមិនសូវមានប្រសិទ្ធភាពខ្ពស់ ដាក់ចុះហើយ វាលាយលំ ដល់អញ្ចឹងបងប្អូន​អ្នកនាំចូល​មួយចំនួន គាត់បន្លំមកដដែល បិទផ្អាកគឺផ្អាក តែបំណែក ដូចជាក្បាល គ្រឿងក្នុង ប៉ុន្តែសាច់ទាំងមូលមិនបិទទេ អាហ្នឹងវាសាហាវជាងជ្រូករស់ចូលទៀត គឺដឹកមកទាំងកុងតឺន័រ»។

សេចក្ដីជូនដំណឹងរួមស្ដីពី យន្តការ និងលក្ខណៈវិនិច្ឆ័យនៃការផ្ដល់​គុណវុឌ្ឍិលើ​ការនាំចូល​មុខទំ​និញ «សាច់បង្កក» ចេញផ្សាយនៅថ្ងៃទី១៩ ខែវិច្ឆិកា របស់អគ្គនាយកដ្ឋានសុខភាពសត្វ និង​ផលិត​កម្មសត្វ និងអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថាលក្ខ​ខណ្ឌតម្រូវ​ចំនួន​៤នោះរួមមាន៖

១. មានកម្មវត្ថុអាជីវកម្មសមស្របដូចជា«នាំចូលសាច់បង្កក ឬមានកម្មវត្ថុអាជីវកម្មពាក់ព័ន្ធ​នឹង​ការ​​នាំចូលសាច់»។

២. មានប្រភពផ្គត់ផ្គង់សាច់បង្កកពីក្រៅប្រទេសច្បាស់លាស់។

៣. ត្រូវមានឃ្លាំងរក្សាគុណភាពសាច់បង្កកស្របតាមលក្ខណៈបច្ចេកទេសត្រឹមត្រូវ។

៤. ត្រូវធានាអះអាងជាលាយលក្ខណ៍អក្សរថា «នឹងប្រើប្រាស់មធ្យោបាយដឹក​ជញ្ជូននិងចែកចាយ​សាច់​បង្កក ដែលមានលក្ខណៈបច្ចេកទេសសមស្រប»។

បច្ចុប្បន្ន ក្រុមហ៊ុនវិនិយោគមានគុណវុឌ្ឍិចំនួន ៤០ កំពុងប្រកបអាជីវកម្មនាំ​ចូលមុខ​ទំនិញ​សាច់​បង្កក​នៅកម្ពុជា ខណៈរដ្ឋាភិបាល​បានដាក់ចេញវិធានការ​ពង្រឹងប្រសិទ្ធភាពនៃការគ្រប់​គ្រងការ​នាំចូល​​​មុខទំនិញសាច់បង្កក៕

អត្ថបទ៖ ឡេង ដេត