ព័ត៌មានជាតិ

ការស្នើសុំបើកស្ថានីយប្រេងឥន្ធនៈកាត់បន្ថយពេលពី ៤៥ ថ្ងៃមកនៅត្រឹម ២៤ ថ្ងៃ

បានផុស

៣ ខែ មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

បើតាមការគូសបញ្ជាក់ពីលោក កែវ រតនៈ រដ្ឋមន្ត្រីក្រសួងរ៉ែ និងថាមពលបានឲ្យដឹងថា ក្រោយការកែទម្រង់ថ្មី ការស្នើសុំបើកស្ថានីយប្រេងឥន្ធនៈបានកាត់បន្ថយនីតិវិធីស្នើសុំពី ៤៥ ថ្ងៃមកនៅត្រឹមតែ ២៤ ថ្ងៃប៉ុណ្ណោះ។

ថ្លែងនៅក្នុងពិធី “បិទសន្និបាតបូកសរុបលទ្ធផលការងារឆ្នាំ ២០២៣ និងឆ្នាំ២០២៤ និងទិសដៅការងារឆ្នាំ ២០២៥ របស់ក្រសួងរ៉ែ និងថាមពល” កាលពីម្សិលមិញនេះ លោក កែវ រតនៈ បានគូសបញ្ជាក់ថា តាមរយៈការកែសម្រួលថ្មី បានកាត់បន្ថយក្រដាសស្នាម និង បន្ថយពេលវេលាអនុម័ត សម្រាប់អាជីវករដែលស្នើសុំបើកស្ថានីយប្រេង និងឧស្ម័នឥន្ធនៈ។

«មុនការកែទម្រង់ តាមនីតិវិធីនៃដំណើរការពិនិត្យនិងសម្រេចលើពាក្យស្នើសុំគឺកំណត់ពេល ៤៥ ថ្ងៃ ប៉ុន្តែចរន្តឯកសារជាក់ស្ដែងលឿនបំផុតត្រូវការពេល ៥១ ថ្ងៃ និងយឺតបំផុតត្រូវការរយៈពេល ៥៦២ ថ្ងៃ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក កែវ រតនៈ បន្ទាប់ពីការកែទម្រង់អនុម័ត និងអនុវត្តនីតិវិធីថ្មី ចរន្តឯកសារពិនិត្យនិងអនុម័តត្រូវការប្រើពេលវេលាត្រឹម ២៤ ថ្ងៃប៉ុណ្ណោះ។ ពាក្យស្នើដែលជាប់ស្ទះមុនកែទម្រង់នីតិវិធីថ្មីមាន ១ ៣១៧ សំណុំឯកសារ បច្ចុប្បន្នត្រូវបានដោះស្រាយរួចរាល់។ លោក កែវ រតនៈ បញ្ជាក់បន្ថែម។

បច្ចុប្បន្នមានស្ថានីយឥន្ធនៈសរុបចំនួន ៦ ១៨៦ ស្ថានីយទូទាំងប្រទេស ដែលផ្ដល់ការងារជាង ២ ម៉ឺនកន្លែងដល់ប្រជាពលរដ្ឋតាមមូលដ្ឋាន។

លោក កែវ រតនៈ បានបញ្ជាក់ថា នាពេលដ៏ខ្លីខាងមុខនេះ ក្រសួងមានផែនការស្នើសុំរាជរដ្ឋាភិបាលពិនិត្យនិងគាំទ្រគម្រោងវិនិយោគរោងចក្រចម្រាញ់ប្រេងកាតក្នុងប្រទេសជំហានទី១ ជាមួយការកំណត់រូបរាង និងវិសាលភាពនៃការធ្វើសន្និធិប្រេងបម្រុងជាយុទ្ធសាស្ត្រ «Strategic Petroleum Reserve» ទោះបីជាប្រទេសកម្ពុជាមានទីផ្សារប្រេងនៅតូចក៏ដោយ។

ជាមួយគ្នានេះ ក្រសួងក៏កំពុងរៀបចំការគាំទ្រនានា សម្រាប់សម្រួលដល់ការដឹកជញ្ជូន និងផ្គត់ផ្គង់ឧស្ម័ន LNG ដល់រោងចក្រផលិតអគ្គិសនីដើរដោយឧស្ម័ន LNG អានុភាព ៩០០ មេហ្កាវ៉ាត់ លើកទី១ របស់ព្រះរាជាណាចក្រកម្ពុជានៅខេត្តកោះកុង។ ទន្ទឹមនោះ ក្នុងបរិបទអន្តរកាលថាមពល ក្រសួងនឹងធ្វើបច្ចុប្បន្នភាពក្របខណ្ឌគោលនយោបាយស្ដីពីវិស័យប្រេងកាត និង រៀបចំលិខិតបទដ្ឋានគតិយុត្តជាច្រើនទៀត ជាពិសេសការដាក់ឲ្យអនុវត្តបទប្បញ្ញត្តិបច្ចេកទេសសុវត្ថិភាព សម្រាប់រៀបចំប្រព័ន្ធផ្គត់ផ្គង់និងចែកចាយឧស្ម័នឥន្ធនៈក្នុងអគារ។

បើតាមរដ្ឋមន្រ្តីក្រសួងរ៉ែ និងថាមពល នៅឆ្នាំ២០២៤ វិស័យប្រេងកាតបាន ផ្តល់សេវាសាធារណៈផ្សេងៗ និងរួមចំណែកប្រមូលចំណូលពីកាតព្វកិច្ចជូនរដ្ឋបានចំនួនប្រមាណ ១២,៣៥ លានដុល្លារអាមេរិក៕