សម្ដេចតេជោ ហ៊ុន សែន ថា «យុត្តិធម៌ មិនអាចសម្រេចបានទេ បើពុំមានសន្តិភាព»

«យុត្តិធម៌ មិនអាចសម្រេចបានទេ បើពុំមានសុខសន្តិភាព»។ នេះជាការគូសបញ្ជាក់របស់សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ថ្លែងក្នុងពិធីបើកមហាសន្និបាតសន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) លើកទី១២ នាព្រឹកថ្ងៃទី២២ ខែវិច្ឆិកា ឆ្នាំ២០២៤ នៅស្នាក់ការកណ្ដាលគណបក្សប្រជាជនកម្ពុជា រាជធានីភ្នំពេញ។

ក្នុងវេទិកាអន្តរជាតិនេះ សម្ដេចតេជោ ហ៊ុន សែន បានលើកឡើងពីការផ្សារភ្ជាប់គ្នារវាងការផ្សះផ្សាជាតិ​ និងយុត្តិធម៌អន្តរកាល​ ក្នុងការស្វែងរកសន្តិភាពរបស់កម្ពុជា ដោយសម្ដេចតេជោ បានលើកឡើងពីទស្សនៈនៅក្នុងគោលនយោបាយឈ្នះឈ្នះរបស់សម្ដេច ដែលបានចាត់ទុកសុខសន្តិភាពប្រកបដោយនិរន្តរភាព មិនសម្រេចបានទេ ប្រសិបបើមិនបានគិត​គូយ៉ាងយកចិត្តទុកដាក់លើកត្តាសំខាន់ៗផ្សេងទៀត ដូចជា ការផ្សះផ្សាជាតិ យុត្តិធម៌អន្តរកាល សមាហរណកម្ម សង្គម-សេដ្ឋកិច្ច ក៏ដូចជាការរួមកិច្ចសហប្រតិបត្តិការអន្តរជាតិ។

ក្នុងន័យនេះ សម្ដេចតេជោ សង្កត់ធ្ងន់ថា យុត្តិធម៌ មិនអាចសម្រេចបានទេ បើពុំមានសន្តិភាព។ សម្ដេចតេជោ បានគូសបញ្ជាក់ថា​ ការស្វែងរកសន្តិភាពយ៉ាងតក់ក្រហល់ ដោយមិនបានថ្លឹងថ្លែងពីការផ្សះផ្សាជាតិ មិនមែនជាជម្រើសដ៏ឆ្លាតវៃនោះទេ បើពុំដូចនោះទេ ប្រទេសជាតិនឹងធ្លាក់ចូលទៅក្នុងភាពវឹកវរ​ ឬសង្គ្រាមស៊ីវិលជាថ្មីមិនខាន។ សម្ដេចតេជោ សែន ថា ការផ្សះផ្សាជាតិ គឺជាមូលដ្ឋានគ្រឹះមួយនៃការស្វែងរកសន្តិភាព ប្រកបដោយនិរន្តរភាព។

សម្តេចតេជោ ហ៊ុន សែន បានលើកឡើងជាក់ស្ដែងនៅកម្ពុជា ការផ្សះផ្សាជាតិ ជាការរកបានសុខសន្តិភាពប្រកបដោយនិរន្តរភាព។ ផ្ទុយទៅវិញ កម្ពុជាអាចនឹងអន្តរាយវិញ បើសិនកម្ពុជា មិនគ្រប់គ្រងលើ​អធិប​តេយ្យរបស់ខ្លួនទេ ដោយសារការកាត់ទោសខ្មែរក្រហម ដោយមិនបានគិតដល់ការផ្សះផ្សាជាតិ។ ការប្រើយន្តការអន្តរជាតិ ដោយមិនគិតពីភាពជាម្ចាស់នៃប្រទេសដែលមានបញ្ហា គឺមិនអាចសម្រេចការផ្សះផ្សា ឬរកសុខសន្តិភាពបាននោះឡើយ។ នេះជាការបន្ថែមរបស់សម្ដេចតេជោ ហ៊ុន សែន៕