ព័ត៌មានជាតិ

អ្នកនាំពាក្យការងារ អំពាវនាវកម្មករ-និយោជក បង្កើនការប្រុងប្រយ័ត្នចំពោះអគ្គិភ័យ នារដូវរំហើយនេះ

បានផុស

៤ ខែ មុន

នៅ

ថ្ងៃសុក្រ ២២ វិច្ឆិកា ២០២៤

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានធ្វើការអំពាវនាវដល់កម្មករ-និយោជិត និងនិយោជក ត្រូវបង្កើនការប្រុងប្រយ័ត្នខ្ពស់ចំពោះអគ្គិភ័យក្នុងរដូវរំហើយនេះ ដើម្បីចៀសវាងនាំឱ្យខាតបង់ទ្រព្យសម្បត្តិដែលបង្កឡើងដោយអគ្គិភ័យជាយថាហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន បានមានប្រសាសន៍នៅរសៀលថ្ងៃទី ២២ វិច្ឆិកា នេះថា «ជាអនុសាសន៍ក្នុងរដូវរំហើយនេះ ខ្ញុំសូមឱ្យនិយោជក ត្រូវត្រួតពិនិត្យប្រព័ន្ធភ្លើង ប្រភពភ្លើង សម្ភារៈ ក៏ដូចជាប្រភព នៃឧស្ម័នផ្សេងៗ ដើម្បីធានាបច្ចេកទេសឱ្យបានត្រឹមត្រូវក្នុងការថែទាំ ដើម្បីចៀសវាងអគ្គិភ័យណាមួយកើតឡើង។ ចំណែកកម្មករ-និយោជិត ក៏ត្រូវត្រួតពិនិត្យប្រព័ន្ធភ្លើង ប្រព័ន្ធឧស្ម័នផ្សេងៗ ដែលខ្លួនទទួលបន្ទុកដោយយកចិត្តទុកដាក់ ហើយប្រសិនបើសង្ស័យចំណុចណាមួយដែលមានបញ្ហា សូមរាយការណ៍ទៅនិយោជក ដើម្បីឱ្យអ្នកជំនាញ ឬ អ្នកបច្ចេកទេស មកត្រួតពិនិត្យឱ្យបានច្បាស់លាស់ ចៀសវាងការកើតឡើងអគ្គិភ័យ»។

លោក កត្តា អ៊ន បានបន្តថា ក្នុងករណីមានអគ្គិភ័យកើតឡើង ត្រូវជម្លៀសកម្មករ-និយោជិត និងអនុវត្តតាមការណែនាំក្នុងការបង្ការអគ្គិភ័យដូចជា ពន្លត់ភ្លើងតាមបច្ចេកទេស ការបាញ់បំពង់ពន្លត់អគ្គិភ័យ បាញ់ទឹក និងនាំកម្មករ-និយោជិត ចាកចេញពីអគារទៅរកកន្លែងសុវត្ថិភាព។

បើតាម លោកឧត្ដមសេនីយ៍ឯក នេត វាន់ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ធ្លាប់បានបញ្ជាក់ឱ្យដឹងថា ដើមចមដែលនាំឱ្យមានគ្រោះអគ្គិភ័យកើតឡើង បណ្ដាលមកពីការឆ្លងចរន្តអគ្គិសនីចំនួន ៤១,៥៥ ភាគរយ ប្រើប្រាស់ភ្លើងចំនួន ៣៨,២៤ ភាគរយ និងក្ដាប់មិនបានចំនួន ២០,២១ ភាគរយ។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ចាប់ពីខែមករា រហូតដល់ ខែតុលា ឆ្នាំ ២០២៤ គ្រោះអគ្គិភ័យបានកើតឡើងចំនួន ៦៥៩ លើក នៅទូទាំងប្រទេស បណ្តាលឱ្យឆេះផ្ទះចំនួន ៧២៥ ខ្នង តូបផ្សារ ១២២ តូប ឃ្លាំងទំនិញចំនួន ២០ កន្លែង រោងចក្រសិប្បកម្មចំនួន ២១ កន្លែង អគាររដ្ឋបាល ១៨ កន្លែង បង្កឱ្យស្លាប់មនុស្សចំនួន ១៥ នាក់ និងរបួសចំនួន ៤៨ នាក់៕

អត្ថបទ ៖ សំអឿន