ឯកឧត្តម ហ៊ុន ម៉ានី អំពាវនាវឱ្យកូនខ្មែររួមគ្នាថែរក្សា និងលើកស្ទួយសម្បត្តិវប្បធម៌ខ្មែរ

ក្នុងឱកាសអបអរសាទរ ខួបទី១៩ ដែលល្ខោន​ស្រមោល​ស្បែក​ធំរបស់កម្ពុជា ត្រូវបានចុះ​ក្នុង​បញ្ជី​បេតិកភណ្ឌ​វប្បធម៌អរូបី នៃមនុស្សជាតិ ២៥ វិច្ឆិកា ២០០៥-២៥ វិច្ឆិកា ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអំពាវនាវឱ្យកូនខ្មែររួមគ្នាថែរក្សា និងលើកស្ទួយសម្បត្តិវប្បធម៌ខ្មែរឱ្យកាន់តែមានភាពល្បីរន្ទឺ។

តាមរយៈទំព័រហ្វេសប៊ុក នៅថ្ងៃទី២៥ ខែវិច្ឆិកា ឆ្នាំ២០២៤ ឯកឧត្តម ហ៊ុន ម៉ានី បានលើកឡើងថា ល្ខោនស្រមោលស្បែកធំ ​ជាទម្រង់សិល្បៈមដ៏ចំណាស់មួយ ដែលបានកើតនៅលើទឹកដី នៃព្រះរាជាណាចក្រកម្ពុជា ជាយូរលង់ណាស់មកហើយ។ សិល្បករ រាប់ជំនាន់បានខិតខំក្នុងការអភិរក្ស ថែរក្សាកេរមរតកដូនតានេះ ឱ្យបានឋិតឋេរគង់វង្សមកដល់សព្វថ្ងៃ សម្រាប់កូនចៅជំនាន់ក្រោយ រហូតត្រូវបានទទួលស្គាល់ជាសកល។ ជាមួយគ្នានេះ ឯកឧត្តម បានអំពាវនាវ ដល់កុលបុត្រ កុលធីតាខ្មែរ ឱ្យចូលរួមថែរក្សា និងលើកស្ទួយសម្បត្តិវប្បធម៌ខ្មែរឱ្យកាន់តែមានភាពល្បីរន្ទឺទូទាំងសកលលោក។

សូមជម្រាបថា សិល្បៈល្ខោនស្បែកធំ មានប្រវត្តិ និងអាយុកាលជាយូរលង់ណាស់មកហើយលើទឹកដី នៃព្រះរាជាណាចក្រកម្ពុជា ត្រូវបានសកលលោកទទួលស្គាល់ និងឱ្យតម្លៃថា ជាសម្បត្តិមនុស្សជាតិដ៏អស្ចារ្យ និងបានដាក់បញ្ចូល ជាបេតិកភណ្ឌពិភពលោក ខាងបេតិកភណ្ឌបញ្ចេញសំឡេង និងអរូបីយ៍របស់មនុស្សជាតិ ក្នុងឆ្នាំ២០០៥ របស់អង្គការយូណេស្កូ ដែលនេះជាមោទនភាពជាតិមួយ ដ៏ត្រចះត្រចង់មិនអាចកាត់ថ្លៃបាន។

ល្ខោនស្បែកធំ អាចត្រូវបានគេហៅឈ្មោះម្យ៉ាងទៀតថា «ណាំងស្បែកធំ» ហើយវាជាសិល្បៈស្រមោលមួយបែប ដែលប្រើប្រាស់ផ្ទាំងរូបឆ្លាក់ពីស្បែក មកសម្តែងជាឈុតឆាកសាច់រឿង ហើយរូបឆ្លាក់ពីស្បែកទាំងនោះត្រូវគេដាប់ និងឆ្លាក់ជារូបអាទិទេព ដែលភាគច្រើនជារឿងបែបព្រហ្មណ៍សាសនា។

ល្ខោននេះ គឺជាសិល្បៈមួយមានប្រវត្តិនៅពេលព្រហ្មសាសនាចូលមកទឹកដីខ្មែរ។ កាលពីដើមឡើយ សិល្បៈប្រភេទនេះ ត្រូវបានគេឃើញសម្តែងក្នុងពិធីតែពីរ ឬបីប៉ុណ្ណោះក្នុងមួយឆ្នាំ ហើយកម្រសម្តែង ជាសាធារណៈណាស់។ ពិធីទាំងនោះ មានដូចជាពិធីបុណ្យចូលឆ្នាំខ្មែរ ពិធីបុណ្យចម្រើនព្រះជន្មព្រះមហាក្សត្រ និងពិធីគ្រងរាជ្យ ឬក្នុងពិធីសក្ការៈរបស់ឥស្សរជនល្បីៗ៕