ព័ត៌មានជាតិ

អភិបាលរាជធានីបញ្ជាឲ្យ អាជ្ញាធរខណ្ឌទាំង១៤ យកចិត្តទុកដាក់ខ្ពស់ចំពោះទីតាំងធ្វើចត្តាឡីស័ក និងមិនត្រូវឲ្យមានការនាំចូលគ្រឿងញៀនចូលទីតាំងទាំងនោះដាច់ខាត

បានផុស

៤ years មុន

នៅ

ថ្ងៃសៅរ៍ ១៣ មីនា ២០២១

ដោយ

ភ្នំពេញ ៖ អភិបាលរាជធានីភ្នំពេញ លោកឃួង ស្រេងបានបញ្ជាឱ្យ អាជ្ញាធរខណ្ឌទាំង១៤ យកចិត្តទុកដាក់អោយបានខ្ពស់បំផុត ចំពោះទីតាំងធ្វើចត្តាឡីស័ក និងមិនត្រូវឲ្យមានការនាំចូលគ្រឿងញៀនចូលទីតាំងទាំងនោះឡើយ។

លោក ឃួង ស្រេង អភិបាលរាជធានីភ្នំពេញនិងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញនៅល្ងាចថ្ងៃទី១៣ ខែមីនា ឆ្នាំ២០២១នេះ បានដាក់បទបញ្ជាដាច់ខាតឲ្យ អភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទាំង១៤ ប្រុងប្រយ័ត្នខ្ពស់និងត្រួតពិនិត្យឲ្យបានម៉ត់ចត់ ដើម្បីទប់ស្កាត់ដាច់ខាតកុំឲ្យមានការនាំចូលគ្រឿងញៀន ដោយបង្កប់នៅក្នុងអាហារ ឬសម្ភារៈផ្សេងៗទៅក្នុងអគារកំពុងធ្វើចត្តាឡីស័ក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃួង ស្រេង បានបញ្ជាក់ដូច្នេះថា សូមជម្រាបមកលោក-លោកស្រីអភិបាលខណ្ឌ និងជាប្រធានគណៈបញ្ជាការឯកភាព រដ្ឋបាលខណ្ឌទាំង១៤ ត្រូវយកចិត្តទុកដាក់ខ្ពស់លើបណ្តាទីតាំងធ្វើចត្តាឡីស័ក (Lockdown) ក្នុងមូលដ្ឋានខណ្ឌរបស់ខ្លួននីមួយៗ ដោយសហការជាមួយម្ចាស់ទីតាំង ឬរដ្ឋបាលនៃអគារត្រូវ Lockdown នីមួយៗ ដើម្បីបង្កើតទំនាក់ទំនងល្អរវាងអាជ្ញាធរ និងអ្នកកំពុងធ្វើចត្តាឡីស័កនៅខាងក្នុងអគារ ជាពិសេសត្រូវយកចិត្តទុកដាក់លើការផ្តល់អាហារូបត្ថម្ភ និងបញ្ហាជំងឺឈឺស្កាត់ផ្សេងៗរបស់ពួកគាត់។

លោកឃួង ស្រេង បានបន្ថែមថា ជាមួយគ្នានេះ លោក-លោកស្រី ត្រូវប្រុងប្រយ័ត្នខ្ពស់ និងត្រួតពិនិត្យឲ្យបានម៉ត់ចត់ ទប់ស្កាត់ដាច់ខាតកុំឲ្យមានការនាំចូលគ្រឿងញៀន ដោយបង្កប់នៅក្នុងអាហារ រឺសម្ភារៈផ្សេងៗទៅក្នុងអគារកំពុងធ្វើចត្តាឡីស័ក។ សូមលោក-លោកស្រី អនុវត្តការងារនេះប្រកបដោយប្រសិទ្ធភាពខ្ពស់៕

ដោយ ៖ ស្រីរ័ត្ន