រដ្ឋមន្ត្រីសុខាភិបាលឆ្មក់ចុះពិនិត្យមណ្ឌលសុខភាពមួយចំនួនទាំងយប់នៅខេត្តសៀមរាប

លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលកាលពីយប់ថ្ងៃទី២៤ ខែវិច្ឆិកា ឆ្នាំ២០២៤ បានចុះឆ្មក់ទាំងយប់ត្រួតពិនិត្យមើលមន្រ្តី និងបុគ្គលសុខាភិបាលប្រចាំការនៅមណ្ឌលសុខភាព ចំនួន៣កន្លែងនៅខេត្តសៀមរាប ដើម្បីពិនិត្យដំណើរការមណ្ឌលសុខភាព សំដៅធានាឱ្យបានការបម្រើសេវាសុខាភិបាលជូនដល់ប្រជាពលរដ្ឋ ២៤ម៉ោង លើ២៤ម៉ោង ៧ថ្ងៃ ក្នុង១សប្តាហ៍។

មណ្ឌលសុខភាពចំនួន ៣កន្លែងរួមមាន៖១) មណ្ឌលសុខភាពមណ្ឌល១ វេលាម៉ោងប្រមាណ ៩យប់ ២)មណ្ឌលសុខភាព នគរធំ វេលាម៉ោងប្រមាណ១០យប់និង៣) មណ្ឌលសុខភាពអង្គរធំ វេលាម៉ោងប្រមាណ ១១យប់។

កំឡុងការចុះពិនិត្យនេះផងដែរ លោករដ្ឋមន្រ្តី ក៏បានឱ្យជំនួយការម្នាក់ដើរតួជាអ្នកជំងឺនាពេលអធ្រាត្រនោះ។ មណ្ឌលសុខភាពទាំង៣ ខាងលើមានមន្រ្តី និងបុគ្គលិកសុខាភិបាលប្រចាំការ ដែលមានឥរិយាបថ ហេដ្ឋារចនាសម្ព័ន្ធសមរម្យ
និងការដឹកនាំការងារមណ្ឌលសុខភាពមានលក្ខណៈប្រសិទ្ធិភាព។

ឆ្លៀតក្នុងឱកាសនោះលោករដ្ឋមន្រ្តី បានណែនាំ និងលើកទឹកចិត្តដល់មន្រ្តីនៅមណ្ឌលសុខភាព ត្រូវខិតខំពង្រឹង
និងបង្កើនសមត្ថភាពបច្ចេកទេសថែទាំព្យាបាល រួមទាំងអនាម័យ និងបរិស្ថានជុំវិញឥរិយាបថនិងការនិយាយស្តីប្រកបដោយការគួរសមថ្លៃថ្នូរបន្ថែមទៀតដោយប្រកាន់ក្រមសីលធម៌វិជ្ជាជីវៈ រួមទាំងការរៀបចំទុកដាក់ឱសថ
វ៉ាក់សាំងឱ្យបានត្រឹមត្រូវតាមលក្ខណៈបច្ចេកទេស និងឱ្យបានសមស្របតាមការប្រើប្រាស់។

លោករដ្ឋមន្ត្រី បានថ្លែងអំណរគុណ និងកោតសរសើរដល់មន្រ្តីសុខាភិបាលទាំងអស់ដែលបានខិតខំបំពេញការងារក្នុងនាមវិជ្ជាជីវៈគ្រូពេទ្យដោយលះបង់ទាំងកម្លាំងកាយចិត្ត និងស្មារតី បម្រើប្រជាពលរដ្ឋគ្រប់ពេលវេលា និងឈរនៅលើគោលជំហរ ដោយទំនុកចិត្ត សុវត្ថិភាព គុណភាព ប្រសិទ្ធភាព ស័ក្តិសិទ្ធភាព និងសមធម៌៕

អត្ថបទ៖ សំអឿន