លំហាត់ហ្វឹកហ្វឺនកងទ័ពកម្ពុជា-ឡាវ-វៀតណាម ដែលកម្ពុជាធ្វើជាម្ចាស់ផ្ទះបិទបញ្ចប់ដោយជោគជ័យ

លំហាត់ហ្វឹកហ្វឺនរួមគ្នា រវាងកងទ័ពបីប្រទេស កម្ពុជា-ឡាវ-វៀតណាម ឆ្នាំ២០២៤ ក្រោមប្រធានបទ (ប្រតិបត្តិការជួយសង្គ្រោះ គ្រោះមហន្តរាយ បាក់រលំអគារ) រយៈពេល ១០ ថ្ងៃ ដែលកម្ពុជាធ្វើជាម្ចាស់ផ្ទះ ត្រូវបានបិទបញ្ចប់ដោយជោគជ័យ នៅថ្ងៃ២៥ ខែវិច្ឆិកា ឆ្នាំ ២០២៤។

ពិធីបិទបញ្ចប់ត្រូវបានធ្វើឡើងនៅ មជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ ស្ថិតក្នុងភូមិសាស្ត្រ ភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ក្រោមអធិបតីភាព នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, នាយឧត្តមសេនីយ៍ ចាន់សាម៉ន ចាន់យ៉ាឡាត ឧបនាយករដ្ឋមន្ត្រី រដ្ឋមន្ត្រីក្រសួងការពារប្រទេស នៃសាធារណៈរដ្ឋប្រជាធិបេតយ្យ ប្រជាមានិតឡាវ និងនាយឧត្តមសេនីយ៍ ហ្វាង វ៉ាន់ ហ្សាង រដ្ឋមន្ត្រីក្រសួងការពារប្រទេស នៃសាធារណៈរដ្ឋសង្គមនិយម វៀតណាម ។

លំហាត់ហ្វឹកហ្វឺនសមយុទ្ធរួមគ្នាលើកនេះ គឺជាលើកទី៣ នៃការធ្វើលំហាត់ហ្វឹកហ្វឺនសង្គ្រោះគ្រោះមហន្តរាយរួមគ្នា ទាំងបីប្រទេស បន្ទាប់ពីភាគីឡាវ និងវៀតណាម បានធ្វើជាម្ចាស់ផ្ទះកាលពីឆ្នាំ២០២២ និង២០២៣ រួចមកហើយ។ គោលបំណងនៃការធ្វើលំហាត់ហ្វឹកហ្វឺនរួមគ្នានេះ គឺដើម្បីរឹតចំណងសាមគ្គីភាព មិត្តភាព កិច្ចសហប្រតិបត្តិការ និងចែករំលែកចំណេះដឹង ផ្លាស់ប្តូរបទពិសោធន៍គ្នាទៅវិញទៅមក ជាពិសេសដើម្បីត្រៀមលក្ខណៈក្នុងការឆ្លើយតបជាបន្ទាន់ និងត្រៀមដោះស្រាយថាហេតុ ដែលកើតចេញពីបម្រែបម្រួលអាកាសធាតុ ដែលអាចបង្កជាគ្រោះមហន្តរាយដោយធម្មជាតិផ្សេងៗ។

ថ្លែងបិទលំហាត់ហ្វឹកហ្វឺនរួមគ្នា កម្ពុជា-ឡាវ-វៀតណាម, លោក ទៀ សីហា បានគូសបញ្ជាក់ថា លំហាត់ហ្វឹកហ្វឺនរួមគ្នានាពេលនេះ ក្នុងគោលបំណងធ្វើឱ្យកងទ័ពទាំងបីប្រទេស ទទួលបានការផ្លាស់ប្តូរចំណេះដឹង បទពិសោធន៍ រៀនសូត្រពីគ្នាទៅវិញទៅមក និងបង្កើននូវកិច្ចសហប្រតិបត្តិការជាមួយគ្នាកាន់តែជិតស្និតថែមទៀត។

លោកបានវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយស្មារតីទទួលខុសត្រូវខ្ពស់ របស់ក្រុមការងារកងទ័ពទាំងបីប្រទេស ដែលបានសហការគ្នាយ៉ាងជិតស្និទ អនុព័ន្ធយោធាឡាវ វៀតណាម ថ្នាក់ដឹកនាំក្រសួងការពារជាតិ អគ្គបញ្ជាការដ្ឋានខ.ភ.ម និងអាជ្ញាធរដែនដីគ្រប់លំដាប់ថ្នាក់ រៀបចំលំហាត់នេះដោយរលូន និងទទួលបានដោយជោគជ័យតាមកម្មវិធីដែលបានគ្រោងទុក។

លោក ទៀ សីហា សង្កត់ធ្ងន់ថា៖« ជោគជ័យដែលសម្រេចបាននាពេលនេះ បានបង្ហាញពីការយកចិត្តទុកដាក់ខ្ពស់ក្នុងការអភិវឌ្ឍចំណងមិត្តភាពប្រទេសទាំងបី ក្នុងស្មារតីស្ម័គ្រចិត្តរួមគ្នា បន្តអនុវត្តតាមទស្សនរួម ដែលរដ្ឋាភិបាលប្រទេសទាំងបីបានឯកភាពគ្នាពង្រឹងការប្រាស្រ័យទំនាក់ទំនងទៅវិញទៅមកកាន់ស៊ីជម្រៅ លើកិច្ចសហប្រតិបត្តិការវិស័យយោធាឱ្យទទួលបាននូវសមិទ្ធផលថ្មីៗបន្ថែមនៅពេលអនាគត»។

នាយកទីចាត់ការហ្វឹកហ្វឺន អគ្គបញ្ជាការរដ្ឋាន និងជាប្រធានអនុគណៈកម្មការហ្វឹកហ្វឺន នៃគណៈកម្មការអន្តរក្រសួង កងយោធពលខេមរភូមិន្ទ  លោក  ប៉ែន សុក្រឹតវិទ្យា បានឱ្យដឹងថា លំហាត់ហ្វឹកហ្វឺនរួមគ្នានេះត្រូវបានរៀបចំជាពីរខ្លឹមសារហ្វឹកហាត់ គឺប្រតិបត្តិការសង្គ្រោះបាក់រលំអគារ និងប្រតិបត្តិការសង្គ្រោះសុខាភិបាល ក្នុងនោះមានផ្នែកមន្ទីរពេទ្យកម្រិត១ និងមន្ទីរពេទ្យកម្រិត២។

ពេលវេលាហ្វឹកហាត់ រួមមានរយៈពេលចំនួន ១០ថ្ងៃ ចាប់ពីថ្ងៃទី ១៦ ដល់ថ្ងៃទី២៥ ខែវិច្ឆិកា ឆ្នាំ២០២៤ ដោយមានកម្លាំងចូលរួមហ្វឹកហាត់សរុបចំនួន ៦៩៨នាក់ ក្នុងនោះ ភាគីកងទ័ពកម្ពុជា ចំនួន ៥៦៣នាក់, ភាគីកងទ័ពឡាវ ចំនួន ៦៤នាក់ និងភាគីកងទ័ពប្រជាជនវៀតណាម ចំនួន ៧១នាក់។

ភាគីកម្ពុជា បានប្រើប្រាស់គ្រឿងសម្ភារបំពាក់ និងបរិក្ខារបាក់រលំអគារ ចំនួន ២៧មុខ, ឧទ្ធម្ភាគចក្រ MI-17 ចំនួន ០១គ្រឿង, ឧទ្ទម្ភាគចក្របំពាក់ និងបរិក្ខារសម្រាប់សង្គ្រោះការបាក់រលំអាគារ ចំនួន ២៧មុខ, រថយន្តសង្គ្រោះបន្ទាន់ ចំនួន០៧គ្រឿង, តង់សុខាភិបាល ចំនួន ១២តង់, សម្ភារបរិក្ខារពេទ្យចំនួន ៣៤មុខ និងបរិក្ខារផ្សេងៗ មួយចំនួនទៀត។
ភាគីវៀតណាម ប្រើប្រាស់រថយន្តសង្គ្រោះបន្ទាន់ ចំនួន ០១គ្រឿង, រថយន្តវិស្វកម្មចំនួន១គ្រឿង, រថយន្ត១២កៅអី ១គ្រឿង និងបរិក្ខារផ្សេងៗ មួយចំនួន ខណៈភាគីឡាវ ប្រើប្រាស់បរិក្ខារបាក់រលំអគារ មួយចំនួនផងដែរ។

លោក ប៉ែន សុក្រឹតវិទ្យា បានបញ្ជាក់ថា ឆ្លងកាត់ការហ្វឹកហ្វឺនលើប្រធានបទ និងខ្លឹមសារខាងលើ យើងអនុវត្តបានយ៉ាងជោគជ័យទៅតាមផែនការ និងធានាបាននូវសន្តិសុខ សុវត្ថិភាពទាំងមនុស្ស និងសម្ភារ៕