ព័ត៌មានជាតិ

អង្គការមួយ រៀបចំការប្រគំតន្ដ្រីសប្បុរសធម៌ ដើម្បីយកថវិកាកសាងអគារសិក្សាផ្ដល់ក្ដីសង្ឃឹមដល់កុមារអូទីស្សឹម

បានផុស

៥ ខែ មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

នៅថ្ងៃទី២៥ ខែវិច្ឆិកា ឆ្នាំ២០២៤ ព្រះវិហារព្រះកុមារយេស៊ូ នៃព្រះសហគមន៍កាតូលិក នៅបឹងទំពុន រាជធានីភ្នំពេញ បានរៀបចំការប្រគំតន្ត្រីសប្បុរសធម៌ផ្ដល់ក្តីសង្ឃឹមដល់កុមារអូទីស្សឹម ដើម្បីរៃអង្គាសប្រាក់សាងសង់អគារសិក្សាកម្ពស់ ១០ជាន់ ជាមជ្ឈមណ្ឌលនៃការអប់រំ និងការថែទាំកុមារដែលមានពិការភាពអូទីស្សឹម ដល់ «សាលាអប់រំពិសេសនៃការលូតលាស់» (GSES)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ភោគ ម៉ានី ស្ថាបនិក«សាលាអប់រំពិសេសនៃការលូតលាស់» GSES បានលើកឡើងថា គម្រោងនេះគឺលើសពីអគារសាលារៀនមួយ តែវាជានិមិត្តរូបនៃក្តីសង្ឃឹម និងសមភាព។

ជាមួយគ្នានេះ ក្នុងកម្មវិធីប្រគំតន្ត្រីសប្បុរធម៌ គឺក្រោមការដឹកនាំផ្នែកសិល្បៈរបស់លោកស្រី Ai Iwasaki ជាអ្នកផលិតចម្រៀងជប៉ុនដ៏ល្បី និងជាផលិតករប្រតិបត្តិនៃគម្រោងល្ខោនអូប៉េរ៉ាកម្ពុជា ព្រឹត្តិការណ៍នេះនឹងមានការបញ្ចូលគ្នានៃតន្ត្រីបុរាណដ៏គួរឱ្យទាក់ទាញ។ ការប្រគំតន្ត្រីនេះមានចំណងជើងថា «A Mozart Spiritual Bouquet» មានការសម្តែងដោយ Cambodia Opera Project និង MusiCA។ ជាមួយនឹងទេពកោសល្យនៃការសម្ដែង ពួកគេមានគោលបំណងបំផុសគំនិតមិនត្រឹមតែការកោតសរសើរចំពោះតន្ត្រីបុរាណប៉ុណ្ណោះទេ ប៉ុន្តែថែមទាំងមានការប្តេជ្ញាចិត្តរួមគ្នាចំពោះបុព្វហេតុនៃការអប់រំសម្រាប់កុមារដែលងាយរងគ្រោះរបស់កម្ពុជាផងដែរ។

ចំពោះ ប្រាក់ចំណូលទាំងអស់ដែលបានមកពីព្រឹត្តិការណ៍នេះ នឹងផ្តល់មូលនិធិដោយផ្ទាល់ដល់ការសាងសង់អគារសិក្សាថ្មីរបស់ GSES ។ ចំពោះអគារថ្មីកម្ពស់ ១០ជាន់ គឺជាគម្រោងផ្លាស់ប្តូរដែលនឹងមានបន្ទប់ចំនួន ៥០ រួមទាំងថ្នាក់រៀន បន្ទប់ព្យាបាលផ្នែកចលនា បន្ទប់ព្យាបាលផ្នែកញាណ បន្ទប់ថែទាំ និងសូម្បីតែអាងហែលទឹក។ រចនាសម្ព័ន្ធទំនើបនេះ នឹងមិនត្រឹមតែបំពេញតម្រូវការអប់រំប៉ុណ្ណោះទេ ប៉ុន្តែថែមទាំងផ្តល់នូវបរិយាកាសចិញ្ចឹមបីបាច់សម្រាប់ការបណ្តុះបណ្តាលបំណិនជីវិត និងការអភិវឌ្ឍន៍ប្រកបដោយបរិយាប័ន្នផងដែរ។ រីឯ តម្លៃប៉ាន់ស្មាននៃអគារនេះគឺ ១,៦៥ លានដុល្លារ ដោយត្រូវការយ៉ាងតិច ១លានដុល្លារសម្រាប់នាំយកក្ដីសុបិន្តនេះក្លាយជាការពិត។

យ៉ាងណាមិញ «សាលាអប់រំពិសេសនៃការលូតលាស់» GSES ជាគំនិតផ្តួចផ្តើម និងដឹកនាំដោយលោកស្រី ភោគ ម៉ានី ស្ថាបនិក និងជាអ្នកសម្របសម្រួល គឺជាគម្រោងដំបូងគេបង្អស់របស់ប្រទេសកម្ពុជា ដែលយកចិត្តទុកដាក់ចំពោះកុមារដែលមានពិការភាពអូទីស្សឹម។ សាលានេះ ត្រូវបានបង្កើតឡើងក្នុងឆ្នាំ ២០១៧ បានអភិវឌ្ឍខ្លួនពីផ្ទះមួយមួយល្វែងសម្រាប់បម្រើកុមារតែប៉ុន្មាននាក់ប៉ុណ្ណោះ។ ប៉ុន្ដែបច្ចុប្បនេះ បានកើនសិស្សដល់ចំនួន ៣១៣ នាក់នៅក្នុងថ្នាក់រៀនចំនួន ១៧ ដែលជាអគារជួលចំនួន ៣ ល្វែង៕