ព័ត៌មានជាតិ
ឯកឧត្ដម ហ៊ុន ម៉ានី៖ ការវិភាគបញ្ហាជាន់មុខងារតាមក្រសួងនាពេលនេះ មិនមែនព្រោះតែរដ្ឋាភិបាលអាណត្តិមុនៗដឹកនាំខុសឡើយ
ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លើកឡើង ដើម្បីបង្ការទុកមុនថា ការត្រួតពិនិត្យរកមើលបញ្ហាជាន់តួនាទីភារកិច្ចគ្នានៅតាមក្រសួងស្ថាប័ននីមួយៗ នៅក្នុងអាណត្តិនៃរាជរដ្ឋាភិបាលដឹកនាំដោយសម្ដេចធិបតី នាពេលនេះ មិនមែនដោយសារតែរាជរដ្ឋាភិបាលអាណត្តិមុនៗធ្វើកំណែទម្រង់មុខងារសាធារណៈខុសឡើយ។ តាមឯកឧត្ដម ហ៊ុន ម៉ានី ការវិភាគមុខងារសាធារណៈ គឺបាន និងកំពុងធ្វើឡើងជាប់ជាប្រចាំ ដើម្បីធានាថាបានផ្ដល់សេវាសាធារណៈប្រកបដោយប្រសិទ្ធភាព សម្រេចបានជាប្រយោជន៍ និងទទួលបានជំនឿទុកចិត្តពីប្រជាពលរដ្ឋ។
![](https://www.kampucheathmey.com/wp-content/uploads/2024/11/image-1351-1024x682.png)
ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា (គ.វ.រ.) លើកឡើងដូច្នេះ គឺដើម្បីបង្ការទុកមុន កុំឱ្យអ្នកនយោបាយ ឬអ្នកវិភាគមួយចំនួន លើកឡើងថា «មូលហេតុដែលរដ្ឋាភិបាលនីតិកាលទី៧ ចាប់ផ្ដើមវិភាគមុខងារសាធារណៈ គឺដោយសារតែរដ្ឋាភិបាលនីតិកាលមុន ធ្វើខុស» ឬយកបញ្ហាការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង-ស្ថាប័ន ដើម្បីកេងចំណេញផ្នែកនយោបាយ។
នៅក្នុងសន្និសីទសារព័ត៌មាន នាព្រឹកថ្ងៃទី២៦ ខែវិច្ឆិកា ឯកឧត្ដម ហ៊ុន ម៉ានី លើកឡើងបង្ការទុកមុនដូច្នេះ៖«ខ្ញុំសូមបញ្ជាក់ ដើម្បីកុំឱ្យមានការបកស្រាយណាមួយថា ការវិភាគមុខងារនៅក្នុងដើមឆ្នាំអាណត្តិទី៧នេះ គឺដោយសារពីមុនៗមកធ្វើខុស។ បើយើងបានសិក្សាជាបន្តបន្ទាប់ គឺការកែទម្រង់រដ្ឋបាលសាធារណៈ មិនថាកម្ពុជា មិនថាប្រទេសណាទេ គឺត្រូវធ្វើការវាយតម្លៃជាប្រចាំ ហើយនឹងវិវត្តន៍ទៅតាមកាលៈទេសៈ និងបរិបទ និងកត្តាតម្រូវ។ ជាពិសេសក្នុងគោលដៅ ជាមូលដ្ឋានក្នុងការផ្ដល់សេវាសាធារណៈឱ្យមានប្រសិទ្ធភាព ស័ក្ដិសិទ្ធិភាព ហើយទទួលបាននូវ ជំនឿទុកចិត្តពីប្រជាពលរដ្ឋរបស់យើងបន្ថែមទៀត»។
![](https://www.kampucheathmey.com/wp-content/uploads/2024/11/image-1352-1024x682.png)
គួរឱ្យដឹងថា ភាពចាំបាច់នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង-ស្ថាប័ន គឺជាការខិតខំប្រឹងប្រែងដោះស្រាយបញ្ហានូវភាពមិនច្បាស់លាស់ ឬការត្រួតជាន់គ្នានៃមុខងារ និងការទទួលខុសត្រូវរបស់ក្រសួង ស្ថាប័ន និងអង្គភាពក្រោមឱវាទក្រសួងស្ថាប័ន, ភាពខ្វះចន្លោះនៃការធ្វើអាទិភាវូបនីយកម្ម ឈរលើមូលដ្ឋាននៃធនធានមនុស្ស របស់ក្រសួងស្ថាប័ន, ភាពស្មុគស្មាញ និងបញ្ហាលំបាកនៅក្នុងអន្តរទំនាក់ទំនងរវាងក្រសួង ស្ថាប័ន, បញ្ហាអសង្គតិភាព ឬភាពមិនរលូន និងប្រទាក់ក្រឡា នែការកំណត់សមត្ថកិច្ចរបស់ក្រសួង ស្ថាប័ន, បណ្តឹងតវ៉ា និងភាពមិនពេញចិត្តពីភាគីពាក់ព័ន្ធ និងអ្នកប្រើប្រាស់សេវា ចំពោះកម្រិតគុណភាពនៃសេវា ដែលផ្តល់ដោយក្រសួង ស្ថាប័ន, និងផលប៉ះពាល់នៃការប្រើប្រាស់បច្ចេកវិទ្យាថ្មីក្នុងការអនុវត្តការងារ និងសកម្មភាពទាំងឡាយរបស់ក្រសួង ស្ថាប័នជាដើម។
រាប់ពីខែមិថុនា មកដល់ចុងខែវិច្ឆិកា ឆ្នាំ២០២៤ នេះ ក្រសួងមុខងារសាធារណៈ បានរៀបចំការវិភាគមុខងារសាធារណៈទៅលើក្រសួង-ស្ថាប័នចំនួន៩ដូចជា ក្រសួងមហាផ្ទៃ, ក្រសួងសង្គមកិច្ច អតីតយុទ្ធជន និងយុវនីតិសម្បទា, ក្រសួងអប់រំ យុវជន និងកីឡា ,ក្រសួងយុត្តិធម៌, ក្រសួងសេដ្ឋកិច្ច និងហិរញ្ញវត្ថុ, ក្រសួងសុខាភិបាល, ទីស្ដីការគណរដ្ឋមន្ត្រី, ក្រសួងរៀបចំ ដែនដី នគរូបនីយកម្ម និងសំណង់ និងក្រសួងការងារ និងបណ្ដុះបណ្ដាលវិជ្ជាជីវៈ។
![](https://www.kampucheathmey.com/wp-content/uploads/2024/11/image-1353-1024x682.png)
នៅក្នុងសន្និសីទសារព័ត៌មាន នាព្រឹកថ្ងៃអង្គារ នេះ ឯកឧត្ដម ហ៊ុន ម៉ានី បានអះអាងថា ក្រោយពីបានប្រមូលព័ត៌មានតាមរយៈការវិភាគមុខងារលើក្រសួងស្ថាប័នរួចរាល់ គណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នឹងរៀបចំរបាយការណ៍ ជូនសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងរងចាំការតម្រង់ទិសពីសំណាក់សម្ដេចធិបតីប្រមុខរាជរដ្ឋាភិបាល៕
ដោយ៖ ង៉ិល ណារ៉ាត់
![](https://www.kampucheathmey.com/wp-content/uploads/2024/11/image-1354-1024x682.png)
![](https://www.kampucheathmey.com/wp-content/uploads/2024/11/image-1355-1024x781.png)
![](https://www.kampucheathmey.com/wp-content/uploads/2024/11/image-1356-1024x683.png)
![](https://kampucheathmey.com/wp-content/uploads/2020/12/1-01-2-01-1.png)
-
សន្តិសុខសង្គម៥ ថ្ងៃ ago
«ចែមុំបុកល្ហុង» សង្ស័យបង្កប់សេវាកម្មផ្លូវភេទ នគរបាលចុះបង្ក្រាបឃាត់ខ្លួនមនុស្ស១១នាក់
-
ជីវិតកម្សាន្ដ១ សប្តាហ៍ ago
ផ្ទុះការចាប់អារម្មណ៍នឹងយុវតីម្នាក់ សំឡេងពីរោះ ច្រៀងស្រដៀងនឹងរាជិនីសំឡេងសារិកាមាស ប៉ែន រ៉ន
-
ព័ត៌មានជាតិ៥ ថ្ងៃ ago
ករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង
-
សន្តិសុខសង្គម១ សប្តាហ៍ ago
អ្នកកាសែតម្នាក់ត្រូវឃាត់ខ្លួនក្រោយដោះមីនតោនដឹកយកទៅឱ្យប៉ូលិស
-
ព័ត៌មានអន្ដរជាតិ១ សប្តាហ៍ ago
ធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់
-
ជីវិតកម្សាន្ដ២ ថ្ងៃ ago
G-Devith ៖ បុគ្គលដែលអាចហែកមេឃចេញបាន មានន័យថា អ្នកនោះអាចរួចពីសំណាញ់ច្បាប់ហើយ
-
បច្ចេកវិទ្យា២ ថ្ងៃ ago
ទូរស័ព្ទថតរូបក្នុងទឹកដំបូងគេក្នុងប្រទេសកម្ពុជា OPPO Reno13 Series 5G សម្ពោធជាផ្លូវការហើយ និងបំពាក់ដោយ AI ទំនើបៗ
-
ជីវិតកម្សាន្ដ៥ ថ្ងៃ ago
G-Devith ដាក់បណ្តឹងទៅ UNICEF នៅកម្ពុជា ដើម្បីលុបជាអចិន្ត្រៃយ៍គ្រប់គណនីហ្វេសប៊ុក ដែលប៉ះពាល់សិទ្ធិកុមារ តាមគ្រប់រូបភាព